Melasem el Oltirakl a Ungil el Kerebai

NGAK a milechell er a Wichita, Kansas, er a Merikel er sera December 10, 1936. Ak kot el klou er a reteua el ngalek. A demak me a delak el William me a Jean a mle blak a rengrir el mesiungel a Jehovah. A demak a mle company servant, el ngii a mle tekoi el luluusbech er ngii el mesaod er ngike el oungerachel er a ongdibel. E a delak a silubii a klemerang er a Biblia el okiu a delal el Emma Wagner. E ngika el Emma a ulsisecheklterir a rebetok el uldimukl er a Gertrude Steele, me ngmlo mesiou el missionari er a beluu er a Puerto Rico.a Me te mle betok a rungil el kerebai el mle sebechek el mesuub er tir.

MELATK ER TIRKE EL UNGIL EL KEREBAI

A ta el Sebadong er a kebesesengei er a dirk el 5 a rekik, e a kulebengkel a demak el ngar er a tkul a rael el merous a Watchtower me a Consolation (Awake! er chelechang) el mo er a rechad el me engelakl. Seikid el taem e ngultaut a Ongeru el Mekemedil a Beluulechad. A ta el toktang el cheltelaol a mle engelakl e melekoi er a Demak el kmo ngbedelkall e chemiis a ngerachel, e le ngii el dimlak lekengei el mo er a mekemad. Ngmlo bereked er a demak e dmu el kmo “Ka bong, momar kau el bedelkall!” Ak kmal mlo medakt engdi ak kmal chilat er a Demak, e le ngdi millemolem el merous a babier el mo er a rechad el mla me kldibel. E ngii a me engelakl a ta el soldau me ngika el toktang a oldiu el mo er ngii el kmo, “Ka mesa ngika el bedelkall el chad!” Me ngika el soldau er a lesang el kmal cheltelaol, e ngdilu er ngii el kmo, “Bo mrei e bo bad!” Me te di dul mirrael. Me sel kulatk er tia el tekoi, e ak kmal mo mereng a sulel a Jehovah el milsa demak a blekeu. A demak a mla er ngii a eru el blil a omengimd er ngii, e ngika el toktang a ta er tirke el blechoel el mo mengimd er ngii!

Sera bo el 8 a rekik, e a demak me a delak a ulterur a blimam me a siobai er tir, e rullii a kekerei el mobile home, e aki millukl el mo er a Colorado el beluu el uluusbech a ngeso. Me aki mlo kiei er bita er a Grand Junction, e a demak me a delak a mlo pioneer e mirruul a mekekerei el ureor er a sers me a ranch. Me ngokiu a klengeltengat er a Jehovah me a blakerreng er tir, e ngmlo er ngii a ongdibel er tia el beluu. Me sera June 20, 1948, e a demak a millecholb er ngak, me a relmuut el bebil el kilengei er a klemerang, el uldimukl er a Billie Nichols me a bechil. Tirkang a mlo teloi er a ureor el merael el oldingel a ongdibel. E a uriul e a ngelekir el sechal me a bechil a dirrek el mlo meruul er a osisiu el ureor.

Ngkmal mle kmes a klausechelei er kemam el obengterir tirke el mirruul er a ureor er a Renged el ileakl el obengterir tirke el telungalek er a Steele, el Don me a Earlene me a Dave me a Julia me a Si me a Martha el tir a millisiich er ngak. Te ulechotii el kmo a klengar a mera el mo er ngii a belkul sel denguu a Renged el mo kot.

LMUUT EL MELUKL

Sera bo el 19 a rekik, e a Bud Hasty el sechelil a telungalek er ngak a ullengit er ngak me ak mo obengkel el oureor el pioneer er a dimes er a Merikel. Me ngike el odam el oldingel a ongdibel a ullengit er kemam me aki melukl el mo er a mats er a Ruston, Louisiana, el ngar er ngii a rebebil el Sioning el mla mo diak el oldingel a obliil. Ngmle kiram el oltobed a miting er a bek el sandei el diak el ior er a ildisir a rechad el mei. Aki miltik er a basio el sebecham el oumiting er ngii e mlo ungil kutmeklii. Aki mle blechoel el oltobed a miting er aike el blsechel, engdi a lebebil engdi mo kemam el terung a ngar er a miting. A lebebil er a taem e a tang a oltobed er a miting e ngike el tang a mo onger a rokui el ker. Me a lsekum ngmo kiram el otebedii a olechotel e kemam el terung a mo er a medal ongdibel e mo diak a chad el omes! E a uriul e a chuodel el odos a ulemuchel el mei er a miting. Me a cherengel a taem, e a rebebil el mesuub er a Biblia me a rebebil el dikea el loldingel a obliil a mlei er a miting me ngdi mle telkib el taem e ngmlo er ngii a ongdibel.

A ta er a klebesei, e ngak me a Bud a mlo metik er a mengeteklel a klechelid er a Church of Christ, el milsaod a bades el dimlak a klaodengei er ngak er ngii. Tia kmal rirellak el mo melebedebek el kirel a klaumerang er ngak. Me ngmle ta el sandei el di kmekar el mo osoi el osiik a nger el kirel aike el keril. Tiang a mera el ngilsukak el mo oterekeklii a klemerang er a chelsel a renguk, me a kuluureng el kmo bo el sebechek el metik er a kuk ta er a mengeteklel a klechelid.

A uriul, e a odam el oldingel a ongdibel a ullengit er ngak me ak melukl el mo er a mats el El Dorado, er a Arkansas, el mo olengeseu er a ongdibel er isei. Me sera kngar isei, e ak mle blechoel el mo er a Colorado el mo omes er a draft board, el obis el kirir tirke el mo soldau. Me ngar er a ta er a omerollam, e ngak me a rebebil er a re pioneer a dilak el merael el ngar a mlik e mlo accident er a beluu er a Texas el di tilemellii a mlik. Me aki ulemekedong er a odam me ngmlei el ngoikemam el mo er a blil e sel kesus e aki mlo er a miting er a ongdibel. Me te ultebedii a subed el kmo aki mle accident, me a rudam a milskemam a udoud el olengeseu er kemam. A odam a dirrek el ulterur a mlik el kirel a 25 el kluk.

Ngmle sebecham el ngar er a mlai el mo er a Wichita, el mo omes er a kmal kmeed el sechelil a telungalek er ngak, el E. F. “Doc” McCartney a ngklel, el milsiou el pioneer. A rekebtot el ngelekel el sechal el Frank me a Francis, a kmal mle sechelik er seikid el taem el me lmuut er chelechang. Ngmla er ngii a mechut el mlirir el lulterur er ngak el kirel a 25 el kluk, e tia di osisiu a cheral er sel miltemall el mlik. E tiang a kot el taem el kmal mlo bleketakl er a renguk el kmo a Jehovah a omeskak aike el kuusbech e le kmla nguu a tekoi er a Rengedel el mo kot. Ngar er tia taem, el okiu a telungalek er a McCartney, e ak mlo medengelii a kmal klebokel el odos, el Bethel Crane a ngklel. Me a delal el Ruth a kmal mle blak a rengul el Sioning er a mats er a Wellington, Kansas, el millemolem el pioneer el mo lmuut er a bo le 90 me a derengel a rekil. Me ngdi mle kesai er a ta el rak e ak mo bechil a Bethel er sera 1958, e ngmlo obengkek el pioneer el ngar er a El Dorado.

KMAL UNGIL EL OKEDONG

Aki millebedebek a ungil el kerebai er a rebebil, e tilbir el mo kongei a ngii di el ngerachel el beskemam a Jehovah. Aki mlodurech el mo mesiou el special pioneer er a mats el Walnut Ridge, Arkansas. E sera 1962, e ngkmal mlo ungil a rengmam el ngiluu a okedong el mo er sel 37 el Skuul er a Gilead. Ngkmal mlo dmeu a rengmam e le Don Steele a mle ngar er a osisiu el class. Sera ki mtobed er a skuul, e aki mlodurech el mo er a Nairobi, Kenya. Ngkmal mlo mekngit a rengmam er aki mtobed er a beluu er a New York, engdi ngkmal mlo ungil a rengmam er aki mesterir a rudam er kemam el ngar er a skozio er a Nairobi!

Ngkmal mle somam a beluu er a Kenya me a ungil el omesiungam er ngii el beluu. E a kot el mle ungil el olengeriakl er a omesubel a Biblia a Chris me a Mary Kanaiya, e dirk blak a rengrir el mesiou el mui el taem el me lmuut er chelechang. E a ongingil el rak, e te ullengit er kemam el mo melukl el mo er a Kampala, Uganda, el mo kot el missionari er sel beluu. E aike el taem a kmal mle ungil el taem e le rebetok el chad a kmal mle sorir el mesuub a klemerang er a Biblia, e a uriul e te dirrek el mlo Sioning er a Jehovah. Me nguaisei, engdi a uriul er a edei el rak me a tedobech el ki mngar er a Africa, e a ki liluut el mo remei e le ngsomam el mo er ngii a telungalek er kemam. Aki mo omekeroul er a ngelekam el ngar er a Africa me a lechub aki lmuut el mo er a Merikel? Me aki liluut el mo er a Merikel. Sel sils er aki mtobed er a Africa, e a kngtil a rengmam a lmuut el mle klou er sel kngtil rengmam er aki mtobed er a Merikel. Ngkmal mla mo betik a rengmam er a rechad er a Africa me aki uluureng el lmuut el mong er a ta er a klebesei.

NGUU A BECHES EL NGERACHEL

Aki mlo kiei er a diluches el mla er a delongelel a rois er a Colorado, el kiliei er ngii a delak me a demak. Engdi mle telkib el taem e ngmlo er ngii a ngelekam el redil el Kimberly, e a ta el rak me a eua el buil er a uriul e ngliluut el mo er ngii a ngelekam el redil el ngklel a Stephany. Ngkmal mle blak a rengmam er a ngerechelam el omekeroul er tir, me aki ullisechakl er a klemerang el mo er a chelsel a rengrir tirka el klebokel el ngelekam el redil. Ngmle somam el olecholt er a osisiu el kerebai er a omesiou el mle er kemam el mo er a rengelekam. E ngmle meringel er kemam el omdasu er tia el tekoi el kmo, a ungil el omeruul a kmal ungil el kerebai el kirel okurulir a rengalek, engdi tiang a diak loterekeklii el kmo, te mo mukeroul el mo mesiungel a Jehovah. A ochellek me a ochedak a mlo diak le ngar er a klemerang. Engdi aki kmal oureng el kmo ngmo sebechir el lmuut el mo oukerebai a ungil kerebai er a omesiou el dirrek el mlocholt el mo er tir.

Aki miltik er a deurreng er aki momekeroul er a rengelekam, e mle blechoel el dmak el meruul a tekoi. Kemam el kiliei el kmeed er a Aspen er a Colorado a uchul me aki dilak el telungalek e ousekool a ski. Aikaikid el taem el ki mdak aki muluusbech el chadecheduch el ongalek. E dirrek el mle sebecham el camp. Me sel ki mdengchokl el iliuekl er a kmard el ngau e aki chadecheduch el ongalek el mlo uchul a deuil a rengmam. Alta e a rengelekam a mle mekekerei engdi te uleker a bebil er a ker el kmo “Ngera bo kuruul sel bo klou?” me a “Ngua techa el chad a soak el mo bechil?” Me aki millasem el olisechakl er tir a meklou a ultutelel el llechul a Dios er a chelsel a uldesuir me a rengrir. Me aki mle blechoel el millisiich er tir me lerellii a turrekong er tir el mo mesiou el mui el taem. Me a dirrek el rolel a llomeserreng a bo lebechil a chad el osisiu a turrekong er tir. E millasem el olengeseu er tir el mo mesang a klungiolel a lak bo lebechiil sel ledirk lemekekerei. Me ngmle somam a lak lobes er a tekoi el kmo “Lak bo bechiil el mo lmuut er a lekesengil e ng 23 a rekmiu.”

Me nguai a kerebai el ulechotii a rechad er a blimam, e aki millasem el mo er a bek el miting e dirrek el blechoel el mo oldingel a obliil el ta el telungalek. Me aki milengetmokl er kemam me bo lsebechir a rebebil er a rudam me a rudos el milsiou el mui el taem el me kiei el obengkemam. Aki dirrek el mle blechoel el mesaod aike el dilubech er a taem el ki ble missionari. Aki dirrek el ulechotii a urungulam el kmo a ta er a klebesei e kemam el teua el ongalek a dmak el mo er a beluu er a Africa. A rengelekam a kmal mle sorir tia el tekoi.

Aki mle blechoel el mesuub a Biblia el ongalek, e a lebebil e aki remuul el mo sibai aike el tekoi el sebechel duubech er a skuul. A rengelekam a millasem el onger aike el ker el bo lechelebangel er a skuul. Me ngmle dmeu a rengrir el mesuub a tekoi lokiu tia el rolel el mlo uchul e ngmlo ulterekokl a rengrir. Sera bo lemeklou e ngmla er ngii a ta er a taem e te mlo diak lesemeriar er a omesubam el telungalek. Ngdimlak el soak tia el tekoi, me ak dilu er tir me te mo er a delemerab er tir e diak ki mosuub. Ngkmal mlo mechas a rengrir er a tekingek me te lilangel e kmo ngsorir el mesuub. Tiaikid e aki mlo melechesuar el kmo aki olengeseu er tir el mo oba omereng el saul er a tekoi er a klereng er a chelsel a rengrir. Me te mlukeroul el mo sorir el mesuub er a Biblia. Aki dirrek el milsterir a ilmokl el mo ouchais aike el ngar er a uldesuir. Engdi ngdirrek el mle meringel er kemam el rongesterir el melekoi el kmo ngdimlak el kengei a bebil er a klemerang el lulsuub. Nguaisei, engdi uriul er aki mosaod aika el tekoi el dimlak loumerang, e ngmlo ungil er a rengrir a uldesuel a Jehovah el kirel aika el tekoi.

OMELODECH EL KIREL A BECHES EL TEKOI

A okurulir a rengelekam a kmal mle mereched el tekoi er sel ki mulemdasu er ngii. Me ngokiu a ulekrael er a cheldebechelel a Dios, e aki mirruul aike el sebecham el omekeroul er tir el mo betik a rengrir er a Jehovah. Me ngkmal mlo dmeu a rengmam er a bo le pioneer er a uriul er a letobed er a skuul. Te dirrek el mlo oureor el meruul a lesiluub el tekoi el mengereker el kirel aike el ousbech. Te millukl el mo er a Cleveland, Tennessee el obengterir a reteru el odos el milsiou er a beluu el ousbech a ngesou er a berkel a klumech. A lebebil er a taem e aki kmal moureng el meseterir, engdi ngdmeu a rengmam e le tousbech a klengar er tir el ngar er a mui el taem el omesiou. E ngak me a Bethel a liluut el mo pioneer el mlo uchul a lmuut el bebil er a techall er a omesiou me a deuil a rengmam. Aki milsiou el ua ngike el omtechei er a odam el oldingel a ongdibel me aike el meklou el ongdibel.

A uchei er a lolukl el mo er a Tennessee, e te diul mlo er a London, England el mlo oldingel er a obis er a Resioning er a Jehovah. Ngar tiakid el omerollir e a Stephany el mle 19 a rekil a mlo kaodengei ngii me a Paul Norton el mle ngeasek el odam er a Bethel. E a uriul, e a Kimberly a mlo kaodengei ngii me a odam el uluureor el obengkel a Paul Norton el Brian Llewellyn. A Stephany a mlo bechiil er sera blo le 23 a rekil. E a Kimberly a mlo bechiil er a ongingil el rak er a blo el 25 a rekil. Me te millemolem el mesobil el kesengil e ngmlo 23 a rekrir. Aki kilengei er a chelsel a rengmam el kirel a omelilt el leriruul el kirir a rechad el leblo lebecherir.

A rengelekam a silebedemam el kmo, a ungil el kerebai er kemam me a redemmam me a redelemam a ngilsuterir el mo olengesenges er a omellach er a Jesus el mo ‘blak a rengrir er a Rengedel a Dios,’ alta e a lebebil er a taem e ngmlo er ngii a ngelsengesel a ududir. (Mateus 6:33) E sera April 1998, e a Paul me a Stephany a mlo er a 105 el Skuul er a Gilead, e a uriul e te miltutk el mo mesiou er a beluu er a Malawi er a Africa. E a osisiu el taem, e a Brian me a Kimberly a mlo mesiou el ngar er a Bethel er a London, e a uriul er tiang e te kuk mlo mesiou el ngar er a Bethel er a Malawi. Ngkmal mlo dmeu a rengmam e le ngdiak a kuk ta er a ungil el rolel el sebechir a rengeasek el ousbech a klengar er tir sel losiou er a Dios.

A LMUUT EL TA ER A OKEDONG

Sera January 2001, e ak ngiluu a okedong er a dengua el dulsaod er ngii er a uchei. A odam el ngklel a Marais, el ngike el oungerachel er a Obis er a Ruliuid a Babier a milsaod el kmo, a rudam a mengetmokl er a omesuub el kirir tirke el oliuid a babier el meliuekl er a beluulechad el kirel a English comprehension. E sera el 64 a rekik e ngmle sorir ak bo er a omesuub el kirir tirke el mo olisechakl er tia el tekoi. Me ngak me a Bethel a milluluuch el kirel tia el tekoi e mlo mesaod er ngii el mo er a redelemam me bo ki modengei a uldesuir el kirel tia el tekoi. Tir el terung a mle sorir a kibong, alta e ngmo diak el sebecham el ngosuterir. Me ak uluudengua el mong el ouchais el kmo ngkmal somam el mo nguu tia el kmal ungil el techall.

Seikid e a delak a mlo smecher el kasinoma. Me ak dilu er ngii el kmo aki di kiei e obengkel a ochedak er a Linda el omekerreu er kau. Me a delak a dmu el kmo: “Ngkmal diak el soak a bo moruul el uaisei, ak bai mengal mo smecher a lsekum e ngdiak morael.” E a Linda a dirrek el mle osisiu a uldesuel. Me aki kmal mlo oba klou el omereng el saul el kirel a uldesuir me a dirrek el ngelsurir a resechelimam el kiei er bita tir! Me sel sils er a ki morael el mo er a Watchtower Educational Center el ngar er a Patterson, e a Linda uluudengua el ouchais el kmo, a Delemam a mla mad. Ngmlo blak a rengmam el kirel tia el beches el ureram, el oltirakl er sel uldesuel a delemam el kiram.

Ngkmal mlo ungil a rengmam e le tia el kot el ureram a mla er a obis er a beluu er a Malawi, el lekiei er ngii a reteru el ngelekam el redil me a rebecherir. Ngkmal mlo dmeu a rengmam el mlo kasoues! A uriul, e aki mlo olisechakl er tia el suobel er a beluu er a Zimbabwe e a uriul e a ki mlo er a beluu er a Zambia. E a edei el rak me a tedobech el ki molisechakl er tia el suobel, e te ullengit er kemam me aki lmuut el mo er a Malawi e mo meluches aike el tekoi el dilubech el mo er tirke el Sioning el mlodechelakl e le tir el diak lomekbitang er a tekoi er a balatiks.b

Me ngkmal mle mekngit a rengmam e merolang el mo er a belumam er a Basalt, Colorado, er a rak er a 2005 e ngak me a Bethel a melemolem el mesiou el pioneer. E sera rak er a 2006, e a Brian me a Kimberly a millukl el me kiei er bita er kemam e omekeroul er a reteru el ngelekir el redil, el Mackenzie me a Elizabeth. A Paul me a Stephany a dirk ngar er a Malawi, e a Paul a mesiou el ngar er a Chelechad el Omekerreu a Obis er a Resioning er a Jehovah. Me chelechang el bochu el 80 a rekik, e ngkmal uchul a deuil a renguk sel kisterir a remekekerei el chad el kuluureor el obengterir er a betok el rak er a uchei el mla mo olab aike el ngerachel el kullab er a ngar a mong. Me a deurreng el ki momelechesiu er ngii a mlo er ngii el okiu aike el ungil el kerebai el ki mulemes er a medemam, e dirrek el mla melasem el mo oltirakl el mo uchul a klungiolir a rengelekam me a rengelekir a rengelekam.