Sel Bo Momdasu el Kmo Ngdikea el Sebechem el Melemolem

A Adriana er a Brazil a kmo, “A uldesuek a kmal di uleldechelakl er ngak. Me ak mlo melatk el kmo nglocha bai ungil a di knguu a klengar er ngak.”

NGMLA ta lekora kmal mo mekngit a rengum me ngdikea el sokom el ngar? Ke locha kmal medengelii a lolechesuar er ngii a Adriana. Ngika ngar ngii a secherel el di ngera ngmo suebek a rengul. Tia rirellii el kmal mo mekngit a rengul. Me te mle diagnose er ngii er a clinical depression.

Mdirrek el melatk er a Kaoru el chad er a Siabal. Ngika ulemekerreu er a rechad er a blil el mla mo mechuodel e bekesechesecher. Ngkmo: “Ngar tiakid el taem e ak mle chelebangel er a klou el pressure er a urerek. Cherengel a taem e ngmlo diak el soak lomengur e diak lungil a cheliuek. Ak mlo omdasu el kmo, a bai lmuut lungil ak mad.”

A Ojebode el chad er a Nigeria kmo, “Ngkmal di mekikngit a renguk me ak mo lmangel. Ak mlo osiik a rolel a melai er a klengar er ngak.” Ngdmeu a rengud le Ojebode, Kaoru, me a Adriana dimlak lolai a klengar er tir. Me nguaisei engdi bek el rak e te betok el dart el telael el chad a di tir melai a klengar er tir.

SEBECHEM EL MO ER NGII E METIK A NGESO

Oumesingd el chad el melai a klengar er tir a sechal, el betok er tir a kmal merur lolengit a ngeso. A Jesus a dilu el kmo a rechad el smecher ousbech er a toktang. (Lukas 5:31) Me a lsekum ke mo depressed e soam el melai er a klengar er kau, e lak omerur losiik a ngeso. A rebetok el chad el smecher er a depression a mla metik el kmo sel lolai a kar e ngkmal ngosuterir. A Ojebode, Kaoru, me a Adriana mlora ukeruul el kirel tiang e chelecha ngbeot er tir loutekangel.

A toktang a locha mo msang a chad a kar el kirel a depression me a lechub e ngdmu er ngii me ngomes er a therapist, me a lechub e ngngii el teblong. Tirka el chuarm er tia el rakt a ousbech er a kllourreng me a support er a resechelirir me a telungalek er tir. E ngike el kot lungil chad el sebeched el mo sechelil a Jehovah el Dios, el ngii a meskid a ngeso loeak a Tekingel el Biblia.

NGNGAR NGII A PERMANENT EL SOLUTION?

A rechad el smecher er a depression a blechoel lousbech a treatment el kemanget el taem e kirir el melodech a bebil tekoi er a klengar er tir. A lsekum e kau a smecher er tia el rakt e ngkmal sebechem lomes el beduluchei el ua Ojebode. Ngkmo, “Ak kmal omes el beduluchei el kirel a otutel a Isaia 33:24, el ngii ouchais er kid el kmo ngmo er ngii a taem el diak a chad el mo melekoi el kmo ‘ng smecher.’” Ngdi ua Ojebode, lemechelaod a rengum er a telbilel a Dios el kirel a “beches el beluulchad” el diak a “ringel” er ngii. (Ocholt 21:1, 4) Tia belkul a kmo ngmo diak a chad el chuarm er a ringelel a uldasu me a ringelel a rengul. Aike el luchul a ringelel a rengum a mo diak el mo cherechar. Ng “mo diak [mlatk]” aike el rokui el luchul a ringelel a rengum.—Isaia 65:17.

Bades er a Biblia el Sebechel Ngosukau

A Dios a medengelii a uchul me ke feel el uaisei.

“Ngak a RUBAK el Dios er kau; ak melisiich er kau . . . ‘Lak medakt, e ak mo ngosukau.’”—Isaia 41:13.

Jehovah a ngaruchei el medengei a uchul me kede feel el uaisei e kmal soal lolengeseu er kid.

Molebedebek a Tekingel a Dios.

“[Elias] uluureng me le mad. Ng milluluuch el kmo, ‘[Jehovah] . . . Mnguu a klengar er ngak; ng bai ungil a kmad!’”—1 King 19:4.

A Ojebode a kmo: “A omelebedebekek er a Tekingel a Dios a kmal ngilsukak. Ak mlo mesa el kmo a profet Elias a ulemelechesiu osisiu el tekoi el kulechesuar er ngii.”

Mngai a klubelem er tirke el ngar er a Biblia.

“Ngak [el Jesus] a mla meluluuch el kirem e Simon [Petrus], me lak bo mechitechut el oumerang.”—Lukas 22:32.

A apostol Petrus er a lotngeklii a Jesus el edei el taem, e ngkmal mlo oberaod a rengul me ngkmal di lilangel. A Kaoru a kmo: “A tekoi el dilubech el mora Petrus a ngilsukak el mo mesa el kmo a Jehovah me a Jesus a kmal millatk er a tekoi el blo lolechesuar er ngii a Petrus. Tia kmal millisiich er ngak.”

Ng “mo diak [mlatk]” aike el rokui el luchul a ringelel a rengum.—Isaia 65:17