Ak Mla Meseterir a Reblak a Rengrir el Meloseb

Ak ulecherechur le kulemdasu el kmo a sechelik a diak el chad er a klechelid. Me a kuleker er ngii el kmo, “Ngera ke medengei el kirel a Biblia?” Ngdimlak el mereched longer er ngak. Engdi a uriul e nguluuchais el kmo a delal a ta er a Sioning er a Jehovah me ngsiluub a bebil el tekoi er ngii. Me a kullengit er ngii me louchais er ngak a lmuut el betok.

Aki mle chadecheduch el kemanget el taem. Nguluuchais er ngak el kmo a Biblia kmo ng Satan a mengedereder er a beluulechad. (Jn. 14:30) Alta ke locha medengelii tia el tekoi er a klemengetel a klengar er kau el rokir, engdi tia mle beches el uldasu er a renguk. Ak mle blechoel lorrenges el kmo a ungil e melemalt omerellel el Dios a mengedereder er a beluulechad. Engdi tia kmal dimlak el chatter er a blekeradel el kumes. Alta ngdirk mle 26 a rekik engdi ak miles a betok el kmal milengesang er a renguk.

A demak a ulemekall a skoki er a United States Air Force. Me ak di mle ngalek e medengei el kmo a resoldau a mle kltmokl el mo omuu a dub er a ngii di el taem. A mekemad er a Vietnam a dilubech er ak ngar er a college er a California. Ak mlo teloi er a rengalek er a skuul el mle protest. A rebulis ullab a chelebedir loltoir er kemam, e kemam a chemiis el diak el sebecham lungil omes e outeliil le ngmla er ngii a tear gas. Ngmle taem er a ringel me a ultok. Te ulemekoad er a rullab a dereder er a balatiks me a protest me a uldikel. A rechad a kmal di mle kakerous a uldesuir el kirel a kmo ngera ungil lemeketmokl. Ngkmal mle klou a rraurreng.

A 1970 a kulemuchel loureor er a Alaska e chiludel a kmal betok ludoud. Me ak silebek el mora London e mecherar a otobai e mirrael el bedul a dimes el dimlak a ileakl el basio el kurael el bedul ngii. Betok el buil er uriul e ak mlora Africa. Ngar omerollek e ak mlo medengelterir a rebebil el dirrek el mle sorir chemiis a mondai er tir.

Me aika el rokui el tekoi el krirenges e mes a uchul me a osisecheklel a Biblia el kirel a mekngit el reng el mengedereder a tekoi er tia el beluulechad a mle make sense er a renguk. Me a leuaisei e ngngar ker a Dios? Ngkmal mle soak el mo medengei.

Ak mlo medengelii a nger er ngii er aike el oeak uriul el buil. E a cherengel a taem e ak mlo medengelterir e mo betik a renguk er a rebetok el sechal me a redil el mla ochotii a blakerreng er tir el mora di ta el mera el Dios er a chelsel a kakerous el blekeradel.

DILUCHES ER A BELUU ER A IRELAND, EL “BELUU ER A DUB ME A BOES”

Sera kluut el mora London e ak mle contact er a delal a sechelik, me ngmilskak a Biblia. Uriul er a kbora Amsterdam, er a Netherlands, e a Sioning a milsekak el menguiu er a Biblia er cheungel a streetlight, e ngilsukak el mo medengei a lmuut el betok. Ongingil e ak mlora Dublin, Ireland e miltik er a branch office er a Resioning er a Jehovah. Ak millengod er a medal a chesimer. Tiakid ak mle meet er a Arthur Matthews, el mellomes a rengul odam el kmal mle klou a experience er ngii. Me a kullengit omesubel a Biblia me ngkilengei el mo mesuub lobengkek.

Ngkmal mle blak a renguk el mesuub e menguiu aike el rokui el babier el bla lotobed a Resioning er a Jehovah. Ak dirrek el milenguiu er a Biblia. Ak mle semeriar el kirel! E ngar er a miting er a ongdibel e ngmle sebechek el mesang el kmo, mo lmuut er a rengalek me te mle medengei a nger er a ker el rechad el ngar ngii a skulir a mla mo betok el dart el rak el dirk lolatk el ua: ‘Ngera uchul me ngngar ngii a mekngit? Ngtecha Dios? Ngera duubech el mo er kid sel demad?’ A resechelik el rokui a di mle Sioning er a Jehovah. E tia mle beot le ngdimlak kudengelii a ngii di el chad er tia el beluu. Te ngilsukak el mo betik a renguk er a Jehovah e mo soak el meruul a soal.

Sera 1972 e ak miltecholb. Ta el rak er uriul e ak ulemuchel el pioneer e mlo teloi er a kekerei el ongdibel er a Newry, el beluu el ngar er a diluches er a Ireland. Ak mle rent er a blai el ngar bita er a rois. Ngmla er ngii a kerbou er a ked er bita er ngak me ak mle blechoel practice a cheldechedechak er mederir. Te kora kmal mle blak a rengrir lorrenges er ngak e menga kelir. Alta ngdimlak el sebechir el meskak a ngeso er a uldasu, engdi te ngilsukak el mo meduch lomes er a rechad sel kungedecheduch er a seked. A 1974 e ak mlo special pioneer e mle pioneer lobengkel a Nigel Pitt, el ngii a mlo ta er a kmal ungil sechelik.

Tiakid el taem e ngkmal mle klou a uldikel me a omelemall er a rechad er a diluches er a Ireland. A rebebil ulemekedong er ngii el “beluu er a dub me a boes.” Ngdimlak el mechas a rengud lomes er a rechad el kaudechelakl er a rael, rechad loboes, me a mlai lobuu. A mondai a mle blechoel el tekoi er a balatiks me a klechelid. Me nguaisei engdi a Rebrodestant me a Rekatolik a milsa el kmo a Resioning a dimlak lomekbitang er a tekoi er a balatiks me ngmle sebecham el mimokl el omerk. A rechad er obliil a mle blechoel el medengei el kmo ngngar ker a mo er ngii a uldikel er ngii me te ouchais er kemam me lak ki bo er ngii.

Me nguaisei, ngdirk mle kdekudel a blekeradel. A ta er a klebesei e ngak me a Denis Carrigan el dirrek el ta er a pioneer a mlo oldingel er a basio el kmeed er kemam engdi ngdimlak a Resioning er ngii e dirk ta el taem el ki bong. Ta el redil uleltelechakl er kemam el kmo aki soldau er a rechad er a Britain el oureor el undercover, le nglocha ngii el mle ngodech a accent er kemam. Aki mlo medakt er tia el ultelecheklel. A dolecholt a ungil mora resoldau e ngsebechem el mad me a lechub e te moes a bkul ochim. Me aki mle dechor er rikl el di kemam el tang e kmal mekelekolt, e mesa mlai el touchakl el mora café el ngike el redil uleltelechakl er kemam er ngii. Ngtilobed e mengedecheduch er a reteru el chad el ngar er a chelsel ngii el mlai e melutk er kemam. Tirka el chad a milekekoketerir lomekall el mei er kemam e uleker er kemam a bebil ker el kirel a schedule er a bus. A bus er a lemei e te milengedecheduch er ngike lomekall. Ngdimlak el sebecham el remenges a tekingir. Ngdimlak a chad er a chelsel a bus me ngkmal mle ulterekokl a rengmam el kmo te mo ngoikemam el mora ikrel a beluu e melemall er kemam. Engdi ngdimlak el bo leuaisei. Sera ki mkerd er a bus e a kuleker er ngike el omekall el kmo, “Tirke el chad te uleker el kiram?” Me ngdilu el kmo, “Ak medengelkemiu, me ak dilu er tir. Lak obekikl. Kemiu a diak a telemelliu.”

Sera 1976 e ak mlora district assemblya er a Dublin, e meet er a Pauline Lomax el special pioneer el mlara England el mei. Ngkmal mle ungil odos el blak a rengul e ngariou a rengul. Ngii me a ochedal er a Ray a mlukeroul er a klemerang. Ta el rak er uriul e aki mlo bechiil e millemolem el mesiou el special pioneer er a Ballymena, el beluu el ngar er a diluches er a Ireland.

Aki milsiou el oldingel a ongdibel el telkib el taem. Aki uleldingel er a rudam me a rudos el mlara Belfast, Londonderry, me a lmuut el bebil er a kengaol el basio. Te kmal millisiich er kemam a reblak a rengrir el rudam me a rudos el kilengei el chemoit a klsuul el klaumerang el kmal mle delalem er a rengrir, omengetukel, me a kltui e mo mesiou er a Jehovah. Ngkmal ulemekngeltengat e omekerreu er tir!

Mak mle kiei er a Ireland el teruich el rak. E a 1981 e te mle invite er kemam el mora 72 el klas er a Gilead. Sera ki mtobed er a skuul e te tiltkemam el mo mesiou er a Sierra Leone, West Africa.

SIERRA LEONE​—KLAUMERANG ER A TEMEL A CHELEBUUL

Aki kiliei er a chimo el blai el blirir a remissionari, lobengterir a reteruich me a tang el chad. Ngdi mle chimo uum, kldei a benjo, teblo olechelubel, di chimo dengua, di chimo mesil er omesilek, e di chimo dryer. Ngmle blechoel el di mekmad a dengki. A beab a kiliei er a tenzio er a blai, me a bersoech a metutuu er a basement.

Alta ngdimlak lungil a delengchokl engdi ureor er a berkel a klumech a milskemam a klou el deurreng. A rechad a kmal milengull er a Biblia e mle kerekikl lorrenges. A rebetok a mlo mesuub er a Biblia e mei er a klemerang. A rechad er a beluu a mle blechoel loleker er ngak el “Mister Robert.” E a Pauline a mle “Missus Robert.” Engdi omerollel a taem e ngmlo betok a ureor er a branch me ngmlo diak el klou a temek loldingel me a rechad a mlo oleker er a Pauline el “Missus Pauline,” e ngak a mlo “Mister Pauline.” Tia kmal mle soal a Pauline!

A rebetok er a rudam a mle mechebuul, engdi Jehovah milsterir aike el lousbech, el lebebil e ngkmal ngar er a ileakl el rolel. (Mt. 6:33) Ak lotkii a ta el odos el di mle enough a ududel el mechar a kelel ngii me a rengelekel el kirel ngii el sils, engdi ngngilai el msang a odam el dimlak a ududel mechar a kerul el kirel a malaria. Uriul er tia el osisiu el sils e a redil a di mle kiul el tmoech e harau er ngika el odos el meruul er a bdelul. Ngmle betok a blekeradel el uaikang.

NIGERIA​—MESUUB ER A BECHES EL SIUKANG

Aki kiliei er a Sierra Leone el etiu el rak, e te ngilikemam el mo mesiou er a Bethel er a Nigeria. Tia mle klou el branch office. Ak mirruul osisiu el ureor el kurruul er a Sierra Leone engdi ngmle klou e meringel el omelodech el kirel a Pauline. Ngika milengoit a 130 el sikang lomerk er a klumech e mle betok a study er ngii el olengeriakl. Chelechang e ngoureor er a blil omerasem er a branch, e milengoit a sils er ngii el merasem a selodel el bail. Nguluusbech a taem el mo smau er tia el beches el blekeradel engdi ngmlo mtebengii el kmo a rechad a kmal uleba omereng el saul el kirel a urerel, e mle ulturk osengel el meruul er sel sebechel melisiich er a re Bethelites.

Ngdimlak ki modengei a siukang er a rechad er a Nigeria e kmal mle betok a kiram el suub. A ta el taem e a odam a mle er a obis er ngak el lolecholt er a odos el ble le accept er ngii er a Bethel. Me a leko ak mo orekedii chimal e ngii a mo terrob er bita er a ochik. Ngkmal mlo mechas a renguk! Ak di mle mereched el lmatk a teblo el bades: Rellir 10:25, 26 me a Ocholt 19:10. Me a kulemdasu, ‘Ngungil a kdu er ngii el kmo lak loruul er tiang?’ A osisiu el taem, e ak miltebengii el kmo te kilengei er ngii el mei er a Bethel, me ngmedengei aike el lolisechakl a Biblia.

Me ak kora di mle metitur e melemolem er a cheldecheduch, engdi uriul ak mirruul a research. Ak mlo medengei el kmo ngika el odos a mirruul er a tekoi el dirk loruul er ngii a rebebil er aike el beluu er a Nigeria. A resechal me te dirrek el mirruul er tia el tekoi. Tia loruul er ngii lolecholt omengull. Ngdimlak longull er a chad, e ngar ngii a olechotel el ngar er a Biblia. (1 Sa. 24:8) Ngkmal dmeu a renguk le ngdimlak kdu tekoi el mo uchul a rur el mora odos. 

Aki mlo medengelterir a rebetok el chad er a Nigeria lullecholt er a ileakl el blakerreng er aika el mereko el rak. Molatk er a Isaiah Adagbona.b Ngsilubii a klemerang er a ledirk kekerei el chad, engdi uriul e ngmlo smecher er a chebedes. Te ngiluu el mo kiei er a basio el blirir a rechebedes e di mle ngii el tang a Sioning er sei. Alta ngmlo chobangel a ultok, ngngilsuterir a betok er a re 30 el chebedes el mo kongei er a klemerang e rullii a ongdibel er tia el basio.

KENYA​—RUDAM ULECHOTII A KLLOURRENG EL MEI ER NGAK

A 1996 e te mle assign er kemam el mora branch er a Kenya. Tia ketengek el lmuut el mei er tia el beluu er uriul er sel blekeradel el kulsaod er ngii er a uchelel. Aki mle kiei er a Bethel. A uldimukl er tirke el mle oldingel er kemam a mongkii lokedongall el Chlorocebus pygerythrus. Te blechoel el merechorech a rodech lulluchel a rudos. A ta er a klebesei e a ta er a odos er a Bethel a di milecherei a mado er ngii me ngbelkais. A lebe el rei e ngngar ngii a telungalek er a mongkii el kmal ungil a rengrir el menga aike el kall el mlara blil. Ngdi uleldiu e chemiis el remurt el tuobed. A mongkii me nguleldiu e chemiis el tobed er a mado.

Ngak me a Pauline a mlo teloi er a ongdibel el melekoi a tekoi er a Swahili. Ak mlo oungerachel er a Book Study er a Ongdibel (el chelechang e ngokedongall el Omesubel a Biblia el Ongdibel). Me nguaisei engdi klemedengei er ngak er tia el omelekoi a di ua klemedengei er a tolechoi. Me ngdi uchei ak suubii a suobel, me lsebechek el chemuiu a ker. Engdi lsekum a nger er a rechad a mle telkib el ngodech er aike el llechukl er a babier, e ngdimlak kudengei a tekingir. Ngmera el telemall! Ak mera el mle chubteterir a rudam me a rudos. E kmal rirtechii a renguk le te uleba kllourreng me a klengariourreng lotirakl er tia el ulekrael.

MERIKEL​—KLAUMERANG ALTA RECHAD A UNGILBESRIR

Ngdimlak bo le ta el rak el ki mngar er a Kenya, e le 1997 e te mle invite er kemam el mora Bethel el ngar er a Brooklyn, New York. Aki mlara beluu el rechad a kmal betok a ungil kloklir, el ngii a sebechel mo uchul a mondai. (Osi. 30:8, 9) Me nguaisei a rudam me a rudos er kid olecholt er a mesisiich el klaumerang. Rudam er kid ousbech a temir me a kloklir el diak el kirel a kerruul e ngbai tousbech el olengeseu er aike el ungil lureor loruul a cheldebechelel a Jehovah.

Me a chelsel aika el mereko el rak aki mla mesa klaumerang er a rudam me a rudos er kid er a chelsel a kakerous el blekeradel. Ngar er a Ireland, ki milsa klaumerang er a chelsel a klou el uldikel. Ngar er a Africa, klaumerang er a chelsel a chelebuul me a cherroid er a rechad. Merikel, klaumerang alta ngungilbesrir. A Jehovah locha kmal mo dmeu a rengul sel lomes er a rechedal lolecholt er a bltkil a rengrir el mo er ngii er a chelsel a kakerous el blekeradel!

Ngkmal mereched a taem, “el di ua rechedel a mesil er chomengaus el rekodoll.” (Job 7:6) Chelecha ki oureor lobengterir a rebebil er a world headquarters er a Warwick, New York, e mesiou lobengterir a rechad el mera el kaubltikerreng. Ngmera el dmeu a rengmam e ungil a rengmam el support er a King er kid el Jesus Kristus, el ngii a di kmedung e ngmo omekngeltengat er a rechad loba blakerreng el mo er ngii.​—Mt. 25:34.