Moukerebai er a Reblak a Rengrir el Anghel

1-2. (a) Ngoeak a ngera el rolel e kede ngodech er a rechanghel? (b) Ngera klaisisiu er kid me a rechanghel?

A JEHOVAH er a lokrolau el mei er a klemerang e ke mlo chedal a klou el telungalek el kmal kaubltikerreng e mengull er ngii el luldimukl er tir a rebetok el miliol el anghel. (Dan. 7:9, 10) Sel dolatk er tir e kede locha melatk a rolel e te kmal ngodech er kid. El ua tiang, a rechanghel a mla kiei el kmal kemanget el taem er kid. (Job 38:4, 7) Te lmuut el mesisiich er kid. Te dirrek el lmuut el chedaol e melemalt er kid e le kid a diak demecherrungel.​—Lk. 9:26.

² Me nguaisei engdi alta te ngodech er kid engdi ngngar ngii a dekaisisiu er ngii. El ua tiang, a rechanghel a di uaikid el sebechir el lolecholt a klebokel el blekerdelel a Jehovah. Te uaikid el ngar ngii a ilmeklir el melilt. Ngngar ngii a ngklir me a personality er tir, e kakerous a ngerechelir er a omesiungir el mora Jehovah. Me tir a di uaikid lousbech el mengull er a Ulemeob.​—1 Pe. 1:12.

3. Ngera sebeched el suub er a reblak a rengrir el anghel?

³ Ngii el betok a dekaisisiu er ngii kid me a rechanghel a uchul me a ungil kerebai er tir a sebechel melisiich e omekllomes er kid. Ngkmal sebeched el suub a meklou a ultutelel el tekoi er tir. Ngar tia el suobel e kede mo melatk er a rolel e ngsebeched el loukerebai er a klengariourreng er a reblak a rengrir el anghel me a bltkil a rengrir er a rechad, ducherreng er tir, me a meringel lurerir el meruul er a ongdibel me ngmelemolem el klikiid.

A RECHANGHEL A NGARIOU A RENGRIR

4. (a) Te mekera rechanghel e ochotii a klengariourreng? (b) Ngera uchul me a rechanghel a kmal ngariou a rengrir? (Psalm 89:7)

⁴ A reblak a rengrir el anghel a ngariou a rengrir. Alta ngkmal klou a experience er tir, e mesisiich, e mellomes, engdi te olengesenges a tekingel a Jehovah. (Psa. 103:20) Sel loruul a ngerechelir e ngkmal diak loumead er tir el kirel me a lechub e lousbech a klisichir el olechau a attention el mo er tir. Te dmeu a rengrir el meruul er a soal a Dios alta rechad a diak lodengei a ngklir.a (Gen. 32:24, 29; 2 Ki. 19:35) Te kmal diak lekengei a klebkall el kirel el mora Jehovah. Ngera uchul me a rechanghel a kmal ngariou a rengrir? E le ngbetik a rengrir er a Jehovah e kmal dmolech a respect er tir el mo er ngii.​—Monguiu er a Psalm 89:7.

5. Ngmilekera ta el anghel e ochotii a klengariourreng er a losmechokl er a apostol Johanes? (Dirrek el momes er a siasing.)

⁵ Molatk er a ta el tekoi el lochotii a klengariourreng er a rechanghel. Ngar er a bekord el 96 C.E., e a anghel el diak el medung a ngklel a ulechotii a kmal mengasireng el ues el mora apostol Johanes. (Och. 1:1) Me ngmilekerang a Johanes? Ngmlo terrob el mengull er ngika el anghel. Engdi anghel a di mle mereched el stob er ngii e kmo: “Lak mua isei! Ngak a di ua ikau ma re bebil er kau, el tar a re mesiou, . . . Ng Dios a kirem el mengull er ngii!” (Och. 19:10) Tia kmal lochotii a klengariourreng! Ngika el anghel a dimlak el soal a ilad me a chetengakl. Ngkmal di mle mereched el turn er a attention er a Johanes el mora Jehovah el Dios. A osisiu el taem e ngdimlak lemetengel osengel er a Johanes. Alta ngika el anghel a mla mesiou er a Jehovah el kmal kemanget el taem er a Johanes e lmuut el mesisiich er ngii, ngmle ngariou a rengul e ulemekedong er a Johanes el ta er ngii el mesiou. E alta ngmle kirel el mesmechokl er a Johanes, ngdimlak longokl me a lechub e lemekngit el mengedecheduch er ngii. Ngbai mle ungil mengedecheduch, le nglocha miltebengii el kmo a Johanes a mirruul el uaisei lengii el kmal mle mechas a rengul er a kldekdelel a tekoi el lilsang.

6. Ngmekera sebeched el loukerebai er a klengariourreng er a rechanghel?

⁶ Ngmekera sebeched el loukerebai er a klengariourreng er a rechanghel? Ngdi ua rechanghel, kede meruul a ngerecheled el diak doumead er kid me a lechub e dolai a credit el kirel aike el doruul. (1 Ko. 4:7) Me a lmuut kung ngdiak el soad el mo omdasu el kmo kede kuk ungil er a rebebil e le kid el mla mesiou er a Jehovah el kemanget el taem er tir me a lechub e ngkid el olab a ileakl el ngerachel. Ngbai a lsekum kede olab a betok el ngerachel e aika el ngerachel a kirel el rullid el lmuut el mo ngariou er a rebebil. (Lk. 9:48) Ngsoad el mesiou er a rebebil el ua rechanghel. Ngkmal diak el soad lolengesechekl er kid.

7. Ngmekera sebeched el lochotii a klengariourreng a lsekum e ngmo kired el mesmechokl me a lechub e kede omeklemalt er a chad?

⁷ Ngdirrek el sebeched lochotii a klengariourreng sel lebo el kired el mesmechokl me a lechub e kede omeklemalt er a chad, el ua ta er a odam me a odos me a lechub e ngngeleked. A lebebil e ngkirel mo mesisiich a tekinged. Me nguaisei engdi nguai ngike el anghel el mle ungil mengedecheduch er a Johanes, ngsebechel mesisiich a tekinged engdi ngdiak lerellii a chad el mo mechitechut a rengul. A lsekum ngdiak dongedidai er kid er a rebebil e ngmo sebeched el mesmechokl lousbech er a Biblia el ngar er a rolel e kede ochotii a respect me a bltikerreng.​—Kol. 4:6.

A RECHANGHEL A BETIK A RENGRIR ER A RECHAD

8. (a) A doltirakl er a Lukas 15:10, e ngmekera rechanghel a lochotii a bltkil a rengrir el mora rechad? (b) Ngmekera rechanghel a lolengeseu er kid er a berkel a klumech? (Momes er a siasing er a medal tia el babier.)

⁸ A rechanghel a diak lolechib osengir er aike el duubech el mora rechad me a lechub e lomdasu el kmo ngdiak el meklou a ultuteled. Te bai kmal betik a rengrir er a rechad. Ngkmal mo dmeu a rengrir sel lobult a chad el ngar er a klengit, a leririid el sib el mla lmuut el mei me a lechad el mla melodech omerellel e mei er a klemerang. (Monguiu er a Lukas 15:10.) A rechanghel a dirrek el lolengeseu er a ureor er a berkel a klumech. (Och. 14:6) Alta te diak longedecheduch er a rechad, engdi te omekrael er kid el mora rechad el sorir el mo medengelii a Jehovah. Nguaisei ngdiak el sebeched el kmal melekoi el kmo te rechanghel a mle uchul a ileakl el tekoi el dilubech e le Jehovah dirrek el sebechel lousbech a lmuut el bebil er a rolel e ngolengeseu er a rechad me a lechub e ngomekrael er a rechedal. El ua tiang, ngsebechel lousbech er a chedaol reng er ngii. (Rel. 16:6, 7) Me nguaisei, engdi ngkmal klou lultuil er a rechanghel er ngii. Me sel domerk er a klumech er a ungil chais, e ngkmal sebechel mo ulterekokl a rengud el kmo a rechanghel a mo support er kid.​—Momes er a baks el “Ngmlonger a Nglunguchir.”b

9. Ngmekera sebeched loukerebai er a bltkil a rengrir a rechanghel el mora rechad?

⁹ Ngmekera sebeched el loukerebai er a bltkil a rengrir a rechanghel el mora rechad? Sel derengesii a announcement er a chad el mla reinstate e ngsebeched el mo ua rechanghel el dmeu a rengrir. Ngsebeched el rullii ngii el odam el mo medengei el kmo ngbetik a rengud er ngii e kmal dmeu a rengud er ngii el mla lmuut el mo mesiou er a Jehovah. (Lk. 15:4-7; 2 Ko. 2:6-8) Ngdirrek el sebeched loukerebai er a rechanghel loeak a doruul aike el rokui el sebeched er a ureor er a berkel a klumech. (Oli. 11:6, NW) E di ua rechanghel el support er kid sel domerk er a klumech, me kid me ngsebeched losiik a rolel e kede support er a rudam me a rudos er a ureor er a berkel a klumech. El ua tiang, kid ngsebeched el remuul a plans er kid lobengkel a publisher el dirk beches lomerk er a klumech? Kid, ngsebeched el support er a rudam me a rudos el mechudelang me a lechub e ngngar ngii a secherir me bo el sebechir el teloi er a ureor er a berkel a klumech?

10. Ngera sebeched el suubii er a experience er a Sara?

¹⁰ E kuk mekerang a lsekum a blekeradel er a klengar er kid a uchul me ngdiak el sebeched el kutmokl aike el rokui el soad el ngar er a omesiunged el mora Jehovah? Ngdirk sebeched el losiik a lmuut el bebil er a rolel e ngsebeched loureor lobengterir a rechanghel er a ureor er a berkel a klumech. Molatk er a experience er a Sarac el odos er a India. Ngika mle pioneer el 20 el rak e mo smecher e mlo dengarech er a bet. Me kede understand er a uchul me ngmlo depressed. Me ngoeak a ngelsurir a rudam me a rudos me a omengiuel er a Biblia er a bek el sils e a Sara mlo sebechel el lmuut el mo positive a uldesuel. Me nguaisei engdi ngmlo kirel losiik a beches el rolel e ngomerk er a klumech. Ngdimlak el sebechel mekiis el mo dengchokl e meluches el meruul a letter writing me ngdi mle sebechel loldingel loeak a dengua. Me ngulemekedong er a re return visit er ngii me tir uluuchais er ngii er a rebebil el locha mo semeriar. Me ngngera dilubech? Ngdi mle chelsel a sesei el buil e ngmlo er ngii a re 70 el study er ngii! Ngdimlak el sebechel di ngii e mesuub el lobengterir el rokui. Me ngmle turn over er a rebebil er tir el mora rechedal ongdibel. Te betok er tir a mla mo ngar er a miting. A rechanghel a ulterekokl el kmal dmeu a rengrir loureor lobengterir a rudam me a rudos el meruul aike el rokui el sebechir er a ureor er a berkel el klumech el ua Sara.

A RECHANGHEL OLECHOLT ER A DUCHERRENG

11. Te mekera rechanghel e mla ochotii a kmal ileakl el ducherreng?

¹¹ A reblak a rengrir el anghel a ungil kerebai er a ducherreng. Te mla outekangel a chelebirukel lomeruul me a klengit el betok el telael el rak. Te milsa Satan me a rebetok el anghel el milsiou lobengterir el mo omtok er a Jehovah. (Gen. 3:1; 6:1, 2; Jud. 6) A Biblia ouchais el kirel a ta el anghel el blo lomtok er ngii a ta el mesisiich el mekngit el anghel. (Dan. 10:13) Me a lmuut kung, a rechanghel a di mla mesterir a rekesai el chad er a uchelel a reksi er a rechad el mei el melilt el mora mera el omengull. Me nguaisei engdi tirka el blak a rengrir el anghel a melemolem el mesiou er a Jehovah loba deurreng me a blakerreng. Te medengei el kmo a Dios a mo choroid a rokui el chelebirukel er a melemalt el taem.

12. Ngera sebechel ngosukid loutekangel?

¹² Ngmekera sebeched el loukerebai er a ducherreng er a rechanghel? Kid a locha mo ua rechanghel el mo chobangel a chelebirukel lomeruul me a lechub e ngultok. Me nguaisei, kede uai tir el ulterekokl a rengud el kmo a Dios a mo choroid a rokui el chelebirukel er a melemalt el taem. Kede di uai tir el ‘diak bo de mesaul el meruul a ungil.’ (Gal. 6:9) E a Dios a tibir el mo ngosukid el loutekangel. (1 Ko. 10:13) Ngsebeched el meluluuch el mora Jehovah lolengit er a chedaol reng er ngii, el ngii a ngosukid el mo oba kllourreng me a deurreng. (Gal. 5:22; Kol. 1:11) E a lsekum ke mo chobangel a ultok? Moumerang el ulsirs er a Jehovah e lak bo medakt. A Jehovah mo blechoel el lolengeseu e melisiich er kau.​—Heb. 13:6.

A RECHANGEL A MERINGEL LOUREOR EL MERUUL ER A ONGDIBEL ME NGMELEMOLEM EL KLIKIID

13. Ngera el ileakl el ngerachel a loba rechanghel er a taem er a uriul sils? (Mateus 13:47-49)

¹³ Taem er a uriul sils e a Jehovah mo mesterir a rechanghel a ileakl el ngerachel. (Monguiu er a Mateus 13:47-49.) A ureor er a berkel a klumech olechau er a rebetok el miliol el kakerous el chad. A rebebil er tirkang a mo bliochel a rengrir el Kristiano e a rebebil a diak. A rechanghel a mla mukngerachel el “mo meleakl er a re mekngit el chad er a re ungil chad.” Tia belkul a kmo te mukngerachel el mo protect er a ongdibel me ngmelemolem el klikiid. Me nguaisei, engdi ngdiak lebelkul a kmo a ngii di el chad el mo stob el teloi er kid a diak a techellel el lmuut el mei me a lechub a ongdibel a diak lebo er ngii a mondai er a chelsel. Engdi ngsebechel mo ulterekokl a rengud el kmo a rechanghel a meringel loureor el meruul er a ongdibel me ngmelemolem el klikiid.   

14-15. Ngmekera sebeched loukerebai er a rechanghel el kmal kerekikl el meruul er a ongdibel me lolemolem el klikiid? (Dirrek el momes a siasing.)

¹⁴ Ngmekera sebeched el loukerebai er a rechanghel el kmal kerekikl er a kikidel ongdibel? Loeak sel doruul er a part er kid me a ongdibel lolemolem el klikiid. Kede meringel loureor el omekerreu er a rengud loeak a dolilt a rungil sechelei e doltngakl a ngii di el tekoi el mo tomellii a deleuill er kid me a Jehovah. (Psa. 101:3) Ngdirrek el sebeched lolengeseu er a rekldemed er a klemerang me lolemolem el loba blakerreng el mora Jehovah. El uai tiang, kede mo mekerang a lsekum kede remenges el kmo ngngar er ngii a ta er a kldemed el mla rullii oberaod el klengit? Bltkil a rengud el mo er ngii a uchul me kede dmu er ngii me ngmo mengedecheduch er a remechuodel. E a lsekum e ngdiak longedecheduch er tir, e ngkired el louchais er a remechuodel. Ngkmal soad a kldemed el mla mo mechitechut a lemereched el mongeseu!​—Jak. 5:14, 15.

¹⁵ Ngklengiterreng e le rebebil ruebet er oberaod el klengit a mo kirir el mesuld a ngklir. Sel bo le uaisei e ngkired el ‘diak dobengterir.’d (1 Ko. 5:9-13) Tia el teletael a mo uchul me a ongdibel a melemolem el klikiid. Me a lmuut kung, sel bo lak dobengkel a seluld a ngklel e kede meruul er a ungil er ngii. Sel dolengesenges er a Jehovah e mo diak dobengterir e nglocha mo ngosuterir el lmuut el mei er a Jehovah. E sel lluut el mei e kede oldeu er a rengud el kirel el ua Jehovah me a rechanghel.​—Lk. 15:7.

16. Ke mo melasem loukerebai er a rechanghel er a ngera el rolel?

¹⁶ Ngmera el ileakl el techall el Jehovah kongei er kid me kede mesuub el kirir a rechanghel e oureor el lobengterir! Me doukerebai a kmal ungil blekerdelir: klengariourreng er tir, bltkil a rengrir el mora rechad, ducherreng er tir, me a meringel lurerir el meruul er a ongdibel me ngmelemolem el klikiid. A lsekum kede mo oukerebai er a reblak a rengrir el anghel e kede dirrek el mo chedal a telungalek er a Jehovah el mo cherechar.