Ngera te oumerang er ngii a Resioning er a Jehovah?

A Resioning er a Jehovah a oumerang el kmo a Biblia a mlukrael el Tekingel a Dios el di mo uchul a klungioled. (2 Timothy 3:16) Me aki ousbech er a Biblia el omekrael er kemam e mesuub el kirel ngike el Ulemeob me bo el sebecham el kiei el ngar er ngii a belkul a klengar er kemam.

A Biblia a kmo: “Bo lodengei el kmo, ng di kau el tang a RUBAK, ke ngarbab el merreder er a beluulchad el rokir.” (Psalm 83:18) Seikid a uchul me ngdi ta el Jehovah el Dios aki mongull el ua kim Sioning er ngii, me ngblak a rengmam el ouchais el kirel tia el ileakl el ngklel.​—Isaia 43:10-12.

Me kemam el Kristiano a oumerang el kmo a Jesus el “Ngelekel a Dios,”a a mlei er a chutem e dirrek el mlo Mesias. (Johanes 1:34, 41; 4:25, 26) E sera lemad e ngii el Jesus a milekiis er a kodall el mo er a eanged. (1 Korinth 15:3, 4) E a uriul e ngmlo King er a Rengedel a Dios. (Ocholt 11:15) E tia el Renged a mera el kabelment el ngii a mo rullii tia el chutem el lmuut el mo Baradis. (Daniel 2:44) Me a Biblia a kmo: “Ngdi tirkel medemedemek a mo ungilbesrir el kiei el ngar a beluu el ungil a rengrir er a cherrungel budech.”​—Psalm 37:11, 29.

A Resioning er a Jehovah a oumerang el kmo a llach el ngar er a Biblia a uchul a klungiolir a rechad er a irechar el mei er chelechang. (Isaia 48:17, 18) Seikid a uchul me ngblak a rengmam el olengesenges aika el llach. El ua tiang, a Biblia a mengelechel er kid el mo mengikiid er kid er a tekoi el sebechel el tomall a uldesued me a bedenged. Tiaikid a uchul me ngdiak ki molamech a dekool me a lechub e ki mousbech a mekngit el kar. (2 Korinth 7:1) Aki dirrek el mengeroid er kemam er aike el tekoi el Biblia a omasech el kmo ngmekngit, el ua cheltelaol er a rrom me a deleboes el omeruul me a omerechorech.​—1 Korinth 6:9-11.