Mousbech er Ngii er a Bek el Techall

1. A Medengelii a Klemerang el babier ngungil el kirel a ngerang?

¹ Sel babier el Kau Ngsoam el Mo Medengelii a Klemerang? a mleketmokl el mo olengeseu er kid el mo omuchel a omesubel a Biblia. Engdi ngdirrek el ta er a ungil el dongu el sebeched el ousbech er ngii el omriid a tane er a klemerang. (Oli. 11:⁠6) Aikaikid a bebil er a ulekrael el sebechel el ngosukid el mo ungil el ousbech er tia el babier.

2. Ngmekerang a dousbech er tia el babier el omuchel a cheldecheduch?

² Omuchel a Cheldecheduch: Ngsebechem el msa tia el babier el mo er a chad er a blai, e ocholt aike el kllolem el ker el ngar er a medal, e oker er ngii el kmo: “Ngmla ta el molatk el kirel a ta er aika el ker?” Uriul er a omrengesii a nger er ngii, e bisii el mo er sel suobel el mesaod er a nger er a keril el mlengai er a Biblia e sola e mchiuii a ta er aike el llechukl el bades. Mchiuii me a lechub e msodii sel ulebongel el llel, e bsang a Doruul el babier. A lsekum e ngdiak el nguu a Doruul el babier, engdi ngmla nguu tia el Medengelii a Klemerang el babier, el ngii a sebechel el dolemii a klemerang er a chelsel a rengul.​—Mt. 13:⁠23.

3. A lsekum e ngmechesang a chad er a blai, e ngera sebeched el meruul er ngii?

³ A lsekum a Chad er a Blai a Mechesang: Nglocha sebechem el dmu el kmo: “Nglocha diak el ungil el taem er chelechang, engdi ngsebechek el di mecherei tia el babier el obengkem. Ngocholt er kid a kllolem el ker el betok er kid a mla oker e meskid a nger er ngii el mla er a Biblia. Me sel kluut el mei, e ngsebechem el ouchais er ngak a uldesuem el kirel.”

4. Ngera sebeched el dmung sel dorous er tia el babier sel doldingel er a tkul a rael?

⁴ Sel Doldingel er a Tkul a Rael: Nglocha sebechem el dmu el kmo: “Alii. Ngmla ta el moker a ta er aika el ker? [Morrenges er a nger er ngii.] Tia el babier a ocholt a bleketakl e ungil el nger er aika el ker el sebeched el metik er a Biblia.” A lsekum a chad a diak el orreched, e nglocha sebechem el mesaod er a ta er aike el nger el ngar tia el babier e sola e msang a Doruul el babier.

5. Ngmekerang a dousbech er tia el babier a lebebil er a taem er aike el blai el diak a chad er ngii?

⁵ A Lak a Chad er a Blai: Ngar er a bebil er a basio el doldingel, e tirke el mla mo oldingel a blechoel el omechei er tia el babier er a basio el diak el sebechir a rengodech el chad el mes sel sekum e ngdiak a chad er a blai. A lsekum e kom meruul el uaisei er a ongdibel er kemiu, e ngsebechiu el bebil er a taem e kom mecherei tia el Medengelii a Klemerang el babier er a blai. E sel omluut el mong, e ngsebechem el dmu el kmo: “Sera ta er aki mei, e ngdimlak omngar er a blai, me aki milecherei tia el babier er a tungelem. Ngera er aika el ker a soam el mo medengelii a nger er ngii?”

6. Ngera rullii a Medengelii a Klemerang el babier me ngta er a ungil el dongu el sebeched el ousbech er ngii el omerk er a klumech?

⁶ A Medengelii a Klemerang el babier a mesaod er a klemerang el ngar er a beot e melemalt el rolel. Ngomeksemeriar er a rechad el kakerous a klechelid me a siukang er tir. Ngkmal beot a dorous er ngii e le ngmo lmuut er a remekekerei el ngalek me a rebeches el dirk mlo oldingel me ngsebechir el merous er ngii. Kau ke ousbech er tia el babier er a bek el techall?