Ngsebechem el Omuchel a Omesubel a Biblia er a Chelsel a Ongeteruich el Buil?
1. Ngera el babier a bo dorous er ngii er a Ongeteruich el Buil?
1 A babier el bo dorous er ngii er a Ongeteruich el Buil a Ongkerongel. Me sel deluut el mo omes er a resemeriar el chad, e ngungil a dochotii sel Kau Ngsoam el Mo Medengelii a Klemerang? el babier e dolasem el omuchel a omesubel a Biblia el obengterir. Kede mekerang a doruul er tiang?
2. Ngmekerang e sebeched el ousbech er a Medengelii a Klemerang el babier el mo omuchel a omesubel a Biblia sel deluut el mo omes er tirke el ngilai a babier?
2 Ngmekerang a Dousbech er Tia el Babier: Ngsebeched el dmu el kmo: “Aike el babier el kbilskau a melisiich er a rechad el kakerous a blekerdelel a klengar er tir me a klechelid er tir el mo merriter er a Biblia. [Mnguu a Medengelii a Klemerang el babier el msang a chad er a blai, e mtutk aike el ker el ngar er a medal.] Aikakid a bebil er a ker el omeksemeriar er kid, el Biblia meskid a kmal ungil el nger er ngii. Ngar er ngii a ta el bla moker aika el ker? Uriul er a louchais er a uldesuel, e mdak el omes er a nger er a keril er tia el babier, e mchiuii a ta er aike el mocholt el bades. E sola e mosaod el kmo tia di kekerei el olechotel aike el lolisechakl a Biblia, e sola e bsang a Doruul el babier. Nglocha sebeched el mesaod er sel kot el parakurab er a bliongel el lengileltii er sel bldeklel a suobel. Me a lechub e ngsebeched el misii el mo er sel bliongel el mesaod a lmuut el betok el tekoi el kirel sel suobel el dulsaod er ngii er sel Medengelii a Klemerang el babier. Aikakid a bebil er a suobel el sebeched el lousbech.
● A Dios ngngar er ngii a ngklel? (ongeru el suobel, par. 2)
● Ngmo diak a mekemad? (ongelolem el suobel, par. 6)
● Ngkired el medakt er a rulekoad? (ongeteruich me a ta el suobel, par. 5)
● Ngar er ngii a omelatk el kirir a rulekoad? (ongeim el suobel, par. 6)
● Ak mekerang e meluluuch e morenges er a Dios? (ongeuid el suobel, par. 3-5)
● Ngmekerang e mo er ngii a deurreng er a chelsel a telungalek er ngak? (ongeai el suobel, par. 1-5)
3. Ngmekerang a dolodech er a rolel a cheldechedechad el oltirakl er a blekeradel el ngar er ngii?
3 Nguaisei, engdi a lsekum a blekeradel a mo uchul e ngmo diak el sebeched el mechelii e ochotii a rolel a omesubel a Biblia el ousbech er a Doruul el babier sel dekot el mo mengedecheduch er a chad el mle semeriar, e nglocha sebeched el kutmeklii a taem el lmuut el mong e melemolem er a cheldechedechad. Nglocha dirrek el sebeched el mo mesaod a teblong me a lechub e ngkldei er aike el ker sel deluut el mo omes er ngii el chad er a uchei er a debsang a Doruul el babier, e tiang a di mo ultuil er a klemeriarreng er ngii. Me bo demeduch el ousbech er tia el kmal ungil el babier er a chelsel a Ongeteruich el Buil el mo omuchel a omesubel a Biblia e dengesuterir a remelemalt a rengrir el mo ‘medengelii a klemerang.’—Jn. 8:31, 32.