Morrenges e Mosuub
1. Ngera me ngklou a ultutelel a dekerekikl el orrenges e dosuub er a temel a ileakl el eru el sils el ongdibel?
1 Ngdi kmedung e ngmo er ngii aike el ileakl el eru me a edei el sils el ongdibel (district conventions) er a rak er a 2013. Ngmla meketmokl a klou el ureor el kirel a prokuram el mo mesaod aike el lousbech a rechad el meliuekl er a beluulechad el rokir. Kau ke mla kutmeklau el mo sebechem el mech aike el eru me a lechub e ng edei el sils? Ngbetok a tekoi el ngar er aika el meklou el ongdibel el sebechel el mo mengesang er kid. Me ngkmal kired el mo kerekikl el lorrenges el kemanget el taem, e le temel aika el ongdibel a kuk kemanget er aike el bebil er a miting er kid. A omerael me a lmuut el bebil er a tekoi a sebechel el mo uchul e kede mo skareter. Me ngera sebechel el ngosukid el mo blechoel el klekar me bo el sebeched el orrenges e mesuub?—Dut. 31:12.
2. Ngmekerang e sebeched el kutmeklii a rengud el kirel a prokuram er a ileakl el eru el sils el ongdibel?
2 A Uchei er a Lomuchel a Ileakl el Eru el Sils el Ongdibel: A www.jw.org el Web site er kid a olecholt er a prokuram el kirel tia el ongdibel el uldimukl er ngii a dai er a cheldecheduch me a tang me a lechub e ngteblo el bades. A lsekum e ngar er ngii a Internet er kau, e ngungil a omomes aika el tekoi me bo el sebechem el kutmeklii a rengum el kirel aike el mo soadel. (Esra 7:10) Sel letemel a Omengull el Telungalek er kemiu, e ngungil a mousbech a taem el omekeroul er a klemeriarreng er kemiu el kirel tia el prokuram.
3. Ngera mo ngosukid el mo kerekikl el orrenges?
3 Sel Letemel a Prokuram: A lsebechel, e bo er a benjo er a uchei er a lomuchel a prokuram. Ngungil a omokodir a cell phone er kau me lak bo mechesang sel loudengua me a lechub e le text er kau a rechad, me a lechub e bo lsoam el text sel lengar er ngii a prokuram. A lsekum e ngdiak el kirel el mad a dengua er kau, e mrellii el mo diak a ngerel me lak bo longesang er a rebebil sel loudengua a chad. E a omousbech a tablet, e ngungil a omoruul er ngii el ngar er a rolel el diak bo longesang er a rebebil. Lak mongang me a lechub e molim sel lengar er ngii a prokuram. (Oli. 3:1) Bo mkerekikl el orrenges er a chad el mengedecheduch, e momes er a Biblia er kau sel lemedung a bades, e moluches aike el meklou a ultutelel el tekoi.
4. Ngmekerang a chedam me a chedil e ngosuterir a rengelekir el mo orrenges e mesuub?
4 Ngdirrek el soad a rengeleked a bo lorrenges e losuub. A Osisechakl 29:15 a kmo: A “ngalek el di cheloit a klemtengel a omekrur er a delal.” Me a leuaisei, e ngungil a ledak a telungalek el dengchokl me bo el sebechir a rechedam me a rechedil el kerekikl el lomes me a rengelekir lorrenges er a prokuram er a bai longedecheduch, e lomibais, me a lechub el text. Me alta rengalek a dirk mekekerei e diak lodengei aike el rokui el soadel, engdi ngsebeched el olisechakl er tir me lak bo lemechiuaiu e lolemolem el di dengchokl.
5. Ngera uchul me ngungil a domelekl aike el mla er a prokuram, e mekerang a doruul el uaisei?
5 Sel Bo Lemerek a Prokuram: Ngungil a lak di momais el mo osoi, e bo mereched el mo mechiuaiu me bo lemesisiich a bedengem. Sel omomelekl aike el omrirenges e tiang a ngosukau el mo blechoel el melatk er ngii. Me a leuaisei, e ngungil a omousbech a sesei el bung el mo mesaod er a prokuram sel leklebesei el obengkel a telungalek er kau. A lsekum e ke mo er a blil a blengur el obengterir a resechelim, e ngungil a omngai aike el tekoi el mliluches me bo el sebechem el mesaod aike el mle soam. Sel omluut el mo remei er a uriul er a klou el ongdibel, e ngsebechem el ousbech er a temel a Omengull el Telungalek el mesaod a rolel a omoltaut aike el omsiluub. Ngdirrek el sebechem el kutmeklii a taem el mo mesaod a telkib er aike el beches el babier el tilobed.
6. Ngungil a lsekum e kede di mo er a ileakl el eru el sils el ongdibel e merekong? Mosaod.
6 Sel lengar er ngii a mur e lak el mekang a kall e ngdi mo diak a ultutelel tia el mur. Ngsebeched el melekoi er a osisiu el tekoi el kirel a mur el mo er ngii er a temel a ileakl el eru el sils el ongdibel. Me a leuaisei, e debo er tia el ongdibel e dengai a klungioled er ngii el oeak a dekerekikl el orrenges e doltaut aike el desiluub.