“Mongudel er a Re Chad”
1. Ngera klaisisiu er a delongelel aike el district me a international convention me sel klou el kldibel el lurruul er ngii a rechad er a Israel er a letobed er a Ekipten?
1 Telkib el taem er a uriul er a letobed er a Ekipten, e a Jehovah a dilu er a Moses el kmo “mongudel er a re chad” er a Rois Sinai el mo orrenges a tekingel me bo el sebechir el meluu er Ngii e losisecheklterir a rengelekir el mo oltirakl a rolel a Jehovah. (Dut. 4:10-13) Tiang a kmal mle ileakl el kldibel el millisiich er a klaumerang er tirke el mla er isei! Ngar er aika el merael el mei el buil, e a rechedal a Jehovah a mo dmak el ngar er aike el district me a international convention el mo mosisechakl er a Jehovah. Ngera kired el meruul me bo el sebeched el ngmai a mui el klungioled er aikang?
2. Ngera kired el meruul er ngii el “mo kldmokl” el kirel aike el convention er kid?
2 ‘Bo Mkltmokl’: A Jehovah a milengelechel er a rechad er a Israel el “mo kldmokl” el kirel sel klou a ultutelel el kldibel el ngar er a Rois Sinai. (Exo. 19:10, 11) Me ngdi osisiu, kid el rokui a kired el mo kerekikl el mengetmokl er kid el kirel aike el convention er kid, el diak di el tirke el mo er ngii a cheldechedecherir. El ua tiang, a rebetok a kirir el mo melai a ulengellir er a ureor. Alta ke chelebangel er a osisiu el tekoi el uai a Nehemia. Ngmle soal el mo olengull er a urerel el oungerachel a imelel a King Artakserses me bo el sebechel el mo er a Jerusalem el mo meleketek er a cheotelel, e ngdi ngmle medengei el kmo a king a locha mo diak el soal a lebong. A Nehemia a milluluuch e a uriul e ngmlo diak el medakt e uleak a omengull e ngmlo sebechel el olengit er a king er a ongtil. Me a king a kilengei er ngii me lorael e dirrek el ullengeseu er ngii el kirel tia el ureor. (Neh. 2:1-9) Kau ke mla olengit er a merredelem me bo el sebechem el olengull e dirrek el mla oterekokl a temel a omerollem me a basio el bo mkiei er ngii? A remechuodel a kmal sorir el ngosuterir tirke el ousbech a ngeso. Molasem el mo mereched el mo er a bek el sils er a temel a convention, e bo mkltmokl el ‘mo blak a rengum’ el orrenges.—Heb. 2:1.
3. Ngera sebechel el ngosukid el mo mengetmokl er a rengud el kirel a prokuram?
3 A lmuut el ta er a klou a ultutelel el tekoi a kired el mo kltmokl el rullii er a rengud el mo orrenges e mesuub. (Esra 7:10) A prokuram er a convention a mo motobed er a jw.org Web site er a uchei e mo llechukl a dai er aike el rokui el cheldecheduch el mo er ngii me a tang me a lechub e ngteblo el bades el obengkel. Aikang a kmal ungil el suobel el sebeched el mesaod er a temel a Omengull el Telungalek er kid el mo er sel temel a convention er kid. A rebebil el publisher a print er tia el prokuram e ousbech er ngii el meluches aike el meklou a ultutelel el tekoi sel letemel a convention.
4. Te mekerang a ruungalek a lousbech er a convention el olisechakl er a rengelekir?
4 ‘Molisechakl er a Re Ngelekiu’: A ta er a moktek er sel convention el mla er a Rois Sinai a mo kirir a ruungalek el chad er a Israel el mo ‘olisechakl er a re ngelekir.’ (Dut. 4:10) A convention a dirrek el mesterir a ruungalek a kmal ungil el techall el mo meruul a osisiu el tekoi. A ruungalek a kirir el dmak el dengchokl tir me a rengelekir sel temel a convention e olengeseu er tir el mo ungil el orrenges. Sel ulebengelel a bek el sils me a uriul el ngar er a omengull el telungalek er tir, e ngsebechir el dmak el telungalek el mesaod er a prokuram.
5. Ngmekerang a bo dengai a klungioled er tia el merael el mei el convention?
5 Sel klou a ultutelel el convention el mla er a Rois Sinai a ngilsuterir a rechad er a Israel el mo oba omereng el saul el kirel a ileakl el techellir el chedal a Dios. (Dut. 4:7, 8) A merael el mei el convention er kid a mileketmokl el mo uchul a klungioled el ngar er a osisiu el rolel. Ngmo sebeched el mo cheroid er a mekngit el blekeradel er a beluulechad er a Satan e mo oldeu a rengud er a osisecheklel a Dios me a ungil el klausechelei el ngar er a ungil el blekeradel er a klengar el ta el sils. (Isa. 35:7-9) Me chelecha el lolekedang a sils er a Jehovah, e lak dongoit er tia el techall el sebeched el mo dmak e kasisiich!—Heb. 10:24, 25.