A Ureor el Ngii a Mo Uchul a Klungiaol

A edei el sandei er a uchei er a lomuchel a ileakl el eru el sils el ongdibel (district conventions), e a rokui el ongdibel a lmuut el mo mengemedaol er a resemeriar el ngar er a territory er tir. E ngar er ngii a ungil el uchul e kede meruul er tiang. Tirke el kongei er a siotaikeng e mei er tia el ongdibel a blechoel el mechas a rengrir er aike el cheldecheduch el mengai er a Biblia, me a ungil el ureor el loruul a rechad el ousbech a di temir, me a ungil blekeradel me a kltarreng el mocholt. (Psa. 110:3; 133:1; Isa. 65:​13, 14) Me nguaisei, engdi tia el ureor ngmo uchul a klungiaol, el ileakl el ngar aike el basio el resemeriar el chad a kirir el merael er a kemanget el omerael el mo er a klou el ongdibel?

A uriul er sel 2011 el klou el ongdibel, e a ta er a branch obis a ngiluu a babilengel a ta el redil el miltik er a siotaikeng el mla er a chesmerel a blil. Ngmle blechoel el omart er ngii sel lemei a Resioning er a Jehovah er a blil. Ngmelekoi el kmo: “Ngmla er ngii a ungil el blik me a bechik a mle ungil a blekerdelel, me a kulemdasu el kmo a kulab aike el rokui el mo uchul a deuil a renguk. Me nguaisei, engdi ngdimlak el deu a renguk e dimlak a mera el belkul a klengar er ngak. Me sel Sebadong e a kulemekall el 200 el mael el mo orrenges aike el cheldecheduch er seikid el sils.” Ngkmal mle soal aike el rirenges me ngulemekedong er a bechil el ouchais er ngii el kmo ngdi ngar sei e le ngsoal el mo orrenges aike el cheldecheduch er a Sandei. Ngmelemolem el kmo: “Ak ulerrenges a rokui el cheldecheduch, e mlo medengelterir a rebetok el Sioning er a Jehovah, e mera el dimlak el soak el mo remei.” Sera bo el rei, e ngmlo mesuub e a uriul er a 4 el buil e ngmlo ta er tirke el dirkak el metecholb el publisher. Ngmelekoi el kmo: “Ngmera el dmeu a renguk el miltik er a siotaikeng el mla er a chesmerek e le chelechang e ngmla mo er ngii a mera el belkul a klengar er ngak!”

A rebebil el nguu a siotaikeng a mo er a klou el ongdibel. Me a leuaisei, e bo leblak a rengud el meruul er tia el ureor. Aike el mo medeel el siotaikeng a ungil a omolab el mo er sel basio el obo er ngii el kirel a ileakl el eru el sils el ongdibel, me bo el sebechem el ousbech el omerk a klumech er a ngii di el taem.

[Baks el ngar er a 5 el llel]

Ngmekerang a Bo Dorous er Tia el Siotaikeng?

Ngsoad el di mengedeb a cheldechedechad me bo el sebeched el rokir a basio el doureor er ngii. Ngsebeched el dmu el kmo: “Alii. Aki merous er tia el siotaikeng el ngii a ureor el ki moruul er ngii er a beluulechad el rokir. Me tiakid a siotaikeng er kau. E ngar er ngii a lmuut el betok el omesodel el ngar tia el siotaikeng.” Mochotii a klemeriarreng er kau el kirel. E sel morous er tia el siotaikeng er a Sebadong me a Sandei, e ngdirrek el ungil a dorous a magazine el obengkel a lsekum e ngdi ungil.