A August a Mo Ileakl el Buil er a Ureor!

1. Ngera el ileakl el ureor a mo er ngii er a beluulechad el rokir er chelecha el lolekedang a 100 el rak el anniversary er a Renged?

¹ A 100 el rak el anniversary er a cherellel a Rengedel a Dios a olekedang. Me ngkmal ungil a bo doldanges er a Jehovah el oeak a ileakl el ureor! Ngar er a August, e kede mo merous er a beches el tract el dai er ngii a kmo Kede Mo er Ker e Metik a Nger er a Meklou a Ultutelel el Ker el Kirel a Klengar? el ngar er a beluulechad el rokir. Tia el tract a melisiich er a remenguiu me lebo losiik a nger er a Biblia me a omesodel a rolel a jw.org a sebechel el ngosuterir.

2. Ngmekerang e sebeched el ‘klou a ngered el oldanges er a RUBAK’ el ngar er a eanged er a August?

² Klou el Diu er a Odanges: A ileakl el tekoi a mla meketmokl el mo ngosuterir tirke el publisher el sorir el menglou er a omesiungir el mo auxiliary pioneer er a August. Ngar er tia el buil, e tirke el publisher a sebechir el auxiliary pioneer el 30 el sikang. A August a ngar er ngii a eim el Ongeim el Ureor, Sebadong, me a Sandei er ngii me a rebetok el publisher el oureor me a lechub e te mo er a skuul a sebechir el mo auxiliary pioneer. Me a lsekum a chad el mosuub el obengkel a mla olengeriakl me a lechub a ngelekem a soal el mo publisher, e bo mereched el mengedecheduch er a tebechelel a chelechad er a remechuodel. Ngkmal mo uchul a omelisiich el kirir tirka el chad el mo publisher el me obengked el oldingel el ngar er tia el klou a ultutelel el buil! Me alta rebetok el mesiou el pioneer a olengull er a August sel bla leketmokl aike el sikang el lousbech el kirel a ta el rak, engdi nglocha sebechir el melodech a schedule er tir me bo leteloi er tia el ileakl el ureor. Chelechang e ngmla mo taem el kirir a rebetok el telungalek el mo mesaod er a rolel e ngsebechir el mo “klou a ngerir el oldanges er a RUBAK” el ngar er a eanged er a August.​—Esra 3:11; Osi. 15:22.

3. Ngera doureng er ngii el kirel tia el ileakl el ureor?

³ Me alta kede mla meruul a osisiu el ureor er a omerusel a babier er a uchei, engdi kede oureng el kmo ngdiak bo dobes er tia el ileakl el ureor. Ngsebechel mo er ngii a beches el ngarbab el ildois er a sikang, publisher, me a auxiliary pioneer er a August? Chelecha el dolekedang er a ulebengelel a 2014 el rak er a omesiou, e a Jehovah bo lomekngeltengat er a blakerreng er a rechedal er a beluulechad el rokir el rullii tia el buil er a August el mo kot el klou a ultutelel el buil er a berkel a klumech el mla ngar er ngii!​—Mt. 24:14.