Kerrir A Rechad

◼ A re publisher ngkirir el blechoel el ousbech er a Internet el ousioning me a lechub e te mesuub el obengkel a chad el kiei er a ta er a beluu?

A rebebil el publisher a mla ousbech er a Internet el osiik er a rechad el mo mesuub er a Biblia el obengterir el ngar er aike el beluu el merrob er a urered me a lechub e ngdi mekesai a rumerk er a klumech er ngii. Ngmla meketmokl a bebil el ungil tekoi el okiu tiang. Engdi ngar er ngii a telemellel sel sekum a re publisher a mengedecheduch er a rechad el diak lodengelterir el okiu a e-mail me a lechub e ng chat room. (Momes er a July 2007 el Omesiunged el Kirel a Renged, er a 7 el llel.) A moktek er kid a soad el ouchais er a remelemalt a rengrir el chad el kirel a klumech er a Renged, me a chouaika el omesaod a sebechel el mo uchul e a odam me a lechub e ngodos a mo teloi a mekngit el klausechelei, el uldimukl er a rumtok a mera el osisechakl. (1 Ko. 1:19-25; Kol. 2:8) Me a lmuut el tang, ngar er aike el beluu el merrob er a ureor er a Renged, e a rulab a derreder a sebechir el omes a tengami er a rechad. A chouaitia el tekoi a sebechel el mo uchul a telemellir a rudam me a rudos er sel beluu. Sei a uchul me a re publisher a diak el kirir el mo er a Internet el mo osiik er a rechad el kiei er a ngodech el beluu el bo lomerk er a ungil chais el mo er tir.

A lebebil er a taem e a branch office a mo tutkii a chad el mo ousioning el mo er a chad er a ngodech el beluu er a uriul er a bo lrei er a belual. Me a lsekum e ngdimlak denguu tia el ngerachel, e ngdiak el kired el melasem el omekeroul er a klemeriarreng er ngii. Ngbai sebeched el ochotii er ngii a rolel a lousbech er a jw.org el mo ngmai a lmuut el betok el omesodel a tekoi me a lechub a rolel e ngsebechel mengedecheduch er a branch office. Ngdirrek el sebeched el melisiich er ngii el mo oldingel er a Blil a Ongdibel el kmeed er a blil. Nguaisei el diak a Blil a Ongdibel er a bebil er a beluu. A lsekum e ngsoal a Resioning a bo loldingel er ngii, e ngkired el luchesii a Please Follow Up (S-43) el form e nguu el msang a melechesel a ongdibel, e ngii a mo odureklii el ousbech er a jw.org. A branch office el oungerachel er a ureor er sel beluu el lekiei er ngii ngika el chad el semeriar a medengei aike el blekeradel el ngar isei me ngsebechel el msang a ngeso el lousbech er ngii.​—Momes er a June 2014 el Omesiunged el Kirel a Renged, er a 7 el llel, me a November 2011 el Omesiunged el Kirel a Renged, er a 2 el llel.

A lsekum a chad el doldingel er ngii a melukl el mo er a ta er a beluu me a lechub e kede mesuub el obengkel a chad el kiei er a ta er a beluu el di dodengelii el okiu a Internet, e ngkired el oltirakl er a ulekrael el mla medung er bab. Engdi ngsebeched el melemolem el omekeroul er a klemeriarreng er ngii el mo lmuut er sel taem el publisher el ngar er a belual a mo omes er ngii. Nguaisei engdi lsekum a chad a kiei er a beluu el merrob er a urered, e ngkmal kired el mo kerekikl sel dosaod a suobel er a Biblia el obengkel el okiu a tengami, dengua, me a lechub e ng Internet.​—Mt. 10:16.