Dmak el Oureor Lomerk er a Klumech er a Territory el Betok a Omelekoi er Ngii

A rechad a blechoel el mengedecheduch er kid sel domerk er a klumech er a Renged el ngar er a omelekingir. E tiakid a locha mle uchul me sera Pentekost er a rak er a 33 C.E., e a Jehovah kiltmeklii a rolel e tirke el “mengull ra Dios el chad ra Judea, el tilobed ra bek el beluu er cheungel a eanged” a mo rongesii a ungil chais er a ‘tekoi ra ikel le mlechell er ngii el beluu’ alta rechad a millekoi a tekoi er a Hebru me a lechub e ng Grik. (Rel 2:5, 8, BT) Me ngar er a basio el betok a kakerous el omelekoi er ngii, e aike el ongdibel el ngar ngii a betok el miting er ngii el melekoi a kakerous el omelekoi a locha oureor er a osisiu el territory. Me te mekera re publisher el ngar er aike el ongdibel e merkii a klumech el mora rokui el chad, e a osisiu el taem e te diak bo lomelekl er a osisiu el blai el locha mo ongasech a rengrir a rechad?

• Chadecheduch (Osi 15:22): A rudam el oungerachel a tekoi er a odingel a obliil a kirir el chadecheduch er a delongelir, e osiik a rolel e ngmo ungil er a rokui el ongdibel el dmak el oureor el mo omerk er a klumech. E a lsekum e ngdiak lebetok a territory er tir, e aike el ongdibel el omerk a klumech el mora kakerous el omelekoi a locha mo sorir a lako bo er aike el blai el ngar er a territory er tir. Engdi a lsekum e ngmo diak el sebechir el blechoel el rokir e le blai a chacheroid, e nglocha sorir a obo er aike el blai engdi ngkirem el subedeterir a lsekum te ngar ngii a resemeriar. (od-E 93 par. 37) Me a lechub e te locha mo olengit er a ongdibel er kau el mo ngosuterir el osiik er a rechad el melekoi er a omelekingir, e ngmai a address er tir el mesterir. (km 7/12 5, baks) E lak mobes el kmo a lebebil er a taem, e a ta el blai a melekoi er a kuk betok er a di chimo el omelekoi. Me aike el tekoi el mla moterekokl el mo rokir a territory a kirel loltirakl a llach er a beluu lolekebai er a rolel a dousbech a information er a rechad.

• Dmak el oureor (Efe 4:16): Bom kerekikl el oltirakl a rokui el ulekrael el mngai er a odam el oungerachel a tekoi er a odingel a obliil. Me kau, ngar ngii a chad el mesuub a Biblia el obengkem el soal lousbech er a kuk ta er a omelekoi el diak el omelekingem? A chad el mesuub a locha mo mereched el olengeriakl a lsekum ke nguu el msa ongdibel, me a lechub a group el kmeed er kau el ousbech er a omelekingel.

• Ungil kltmokl (Osi 15:28; 16:1): A lsekum a chad er a blai el ngar er a territory er kau a melekoi a ngodech el omelekoi, e bora tkurrebab el sebechem el merkii a ungil chais el mo er ngii. Ngsebechem el kutmeklau lokiu sel bo modengei a omelekingir a rechad er a basio er kau, e mereched el download a Biblia me a video el ngar er aike el omelekoi el mora dengua er kau. Ngdirrek el sebechem lousbech er a JW Language app el mo mesuub aike el tekoi er aike el beluu el dousbech loutkeu er a rechad.