Reteru el Beches el Chedal a Governing Body
A WEDNESDAY, January 18, 2023, e ngtilobed a ileakl el announcement er a jw.org el mesubed el kmo a odam el Gage Fleegle me a Jeffrey Winder a mla metutk el mo mesiou el chedal a Governing Body er a Resioning er a Jehovah. Tirka el teru el odam a mla mesiou er a Jehovah el blak a rengrir el kemanget el taem.
Gage Fleegle me a bechil er a Nadia
A Brother Fleegle a mlukeroul er a beluu er a Pennsylvania er a Merikel. Sera dirk lengeasek e a telungalek er ngii a millukl el mora kekerei el beluu el lousbech a ngeso. Kedeb el taem er uriul e ngmiltecholb er a November 20, 1988.
A rechad er a blil a Brother Fleegle a mle blechoel el melisiich er ngii el mo teloi er a mui el taem el omesiou. Te mle blechoel el invite er a re circuit overseer me a re Bethelite el mora blirir me a Brother Fleegle a milsa deurreng el lulebang tirka el odam me a odos. Me a kedeb el taem er uriul er a lemetecholb e ngulemuchel el regular pioneer er a September 1, 1989. Eru el rak er uriul e ngultutii a turrekong el lerirellii er a le 12 a rekil el mo mesiou el ngar er a Bethel. Ngulemuchel el mesiou er a Brooklyn Bethel er a October 1991.
Nguluureor er a Bethel el merenged a babier el 8 el rak e a uriul e ngmlo mesiou el ngar cheungel a Service Department. Ngar tiakid el taem e ngmle teloi er a ongdibel el tekoi er a Russia el sesei el rak. Sera 2006 e ngmlo bechiil ngii me a Nadia, me te mlo dmak el mesiou el ngar er a Bethel. Te mla dmak el mesiou el olengeseu er a rechad el melekoi a Portuguese e mla mo betok er a teruich el rak el lolengeseu er a remelekoi a tekoi er a Sebangiol. Ngmilsiou el ngar cheungel a Service Department el betok el rak e te assign er ngii el mo mesiou el ngar cheungel a Teaching Committee Office e a uriul e ngmlora Service Committee Office. Sera March 2022 e ngmiltutk el mo helper er a Service Committee er a Governing Body.
Jeffrey Winder me a bechil er a Angela
Brother Winder a mlukeroul er a Murrieta, California er a Merikel. Ngika mlukeroul er a klemerang e miltecholb er a March 29, 1986. Ongingil el buil e ngmlo auxiliary pioneer. Ngkmal mlo soal me ngmillilt el mo melemolem el auxiliary pioneer. Uriul er a sesei el buil el le auxiliary pioneer e ngulemuchel el regular pioneer er a October 1, 1986.
Sera lengeasek a Brother Winder e ngmlo oldingel er a reteru el obekul el milsiou el ngar er a Bethel. Tia el omerollel a rirellii el mo soal apply el mora Bethel sel lebo el klou. Me a May 1990, e ngngiluu ongit el mo mesiou er a Wallkill Bethel.
A Brother Winder a milsiou el ngar er a cheungel a kakerous el department er a Bethel, el ua Cleaning Department, Farm Department, me a Bethel Office. Ngmlo bechiil ngii me a Angela er a 1997 e tirkaikid er a ledak el mesiou el ngar er a Bethel. Sera 2014 e te mle transfer er ngii el mora Warwick e ngar isei e ngullengeseu er a okedecherul a world headquarters. A 2016 e te millukl el mora Watchtower Educational Center el ngar er a Patterson, me a Brother Winder a mlo oureor el ngar cheungel a Audio/Video Services. Eua el rak er uriul e te liluut el melukl el mora Warwick, e a Brother Winder a ble le assign er ngii el mo oureor el ngar cheungel a Personnel Committee Office. A March 2022 e ngmiltutk el mo helper er a Personnel Committee er a Governing Body.
Nglunguched el kmo a Jehovah lomekngeltengat er tirka el “ngat el chad” el meringel loureor el kirel a Renged.—Efe. 4:8, NW.