A Tekoi el Bo Loruul a Dios el Kirel a Mekngit

A Biblia a bleketakl el ouchais aike el tekoi el bo loruul a Jehovah me a Ngelekel el Jesus Kristus el kirel a ringel el ngar er ngii el Satan el Diabelong a uchul. Ngdmu el kmo: “A Ngelekel a Dios [el Jesus] a mle duum el tiakid a uchul, el mo melemall a urerel a Diabelong.” (1 Johanes 3:8) Me a blekeradel er a beluulechad er chelechang, el ngii a mui er a rechorecherreng, kltui, me a mekngit el omeruul a mo nguemed. A Jesus a tibir el kmo, a Satan el Diabelong el “merreder er tial beluulchad a mo moiis.” (Johanes 12:31) Me sel bo lak a ongetikaik er a Satan, e ngmo klou a budech me a llemalt er a beluulechad.​—2 Petrus 3:13.

E ngera mo duubech el mo er tirke el chetirir el obult er a mekngit el omerellir e di melemolem el meruul a mekngit? Molatk er tia el bleketakl el telbiil el kmo: “A re melemalt e diak a telemellir el chad a mo kiei er a beluu el diak bo le cheroid er ngii. Ngdi Dios a mo melai er a re dengerenger el oltobed er tir er a beluu, e mengurs er a re mekngit el chad el oltobed er tir er ngii el ua lomadel a dellomel er a chutem.” (Osisechakl 2:21, 22) Me ngmo diak a mekngit el chad el mengesuseu er a rebebil el mo meruul a mekngit. Me a rebekongesenges el chad a mo kiei el ngar er a budech e a cherengel a taem e te mo mengubet er a klengit e mo cherrungel.​—Rom 6:17, 18; 8:21.

Me ngar er a beches el beluulechad, e ngmekera Dios e mo okngemed a rokui el mekngit? Ngdiak bo lolai er sel ilmeklir a rechad el melilt a tekoi, e loruul er tir el di mo ua robot. Ngbai mo olisechakl er a rebekongesenges el chad el mo meruul a soal, e ngosuterir el mo melodech a mekngit el uldesuir me a omerellir.

Ngmo mekerang a Dios el kirel aike el tekoi el duubech el dimlak dolatk me a lechub a accident? Ngmla tibir el kmo ngdi kmedung e a Rengedel a mo mengedereder er a chutem. E a Dios a mla tutkii a Jesus Kristus el mo King er tia el Renged, e ngii a sebechel el omekungil er a resmecher. (Mateus 14:14) A Jesus a dirrek el ngar er ngii a klisichel el sebechel el omtebechel e mengellakl a meklou el tellemall er a beluu. (Markus 4:35-41) Me seikid el taem e ngmo diak a ringel el duubech el mo er a rechad el “taem ma techall” a uchul. (Olisechakl 9:11) Ngar er cheungel a omengederederel a Kristus e ngmo diak a meklou el tellemall el omekringel er a rechad.​—Osisechakl 1:33.

Ngerang a omeltkir tirke el betok el miliol el diak a telemellir el mlad el meklou el telemellel a beluu a uchul? A uchei er a lokisii a sechelil er a Lasarus er a kodall e a Jesus a dilu el kmo: “Ngak a okiis er a kodall e klengar.” (Johanes 11:25) Me a Jesus a ngar er ngii a klisichel el sebechel el olekiis er a rulekoad!

A lsekum ngkmal soam el mo kiei er a beluulechad el diak a mekngit el tekoi el duubech el mo er a rungil el chad, e ngungil a cho bo mosuub er a Biblia me bo el sebechem el mo medengei a lmuut el betok el kirel a mera el Dios. A Resioning er a Jehovah el kiei er a beluam a dmeu a rengrir el mo mesuub el obengkem. Me aki mengemedaol er kau el mo mengedecheduch er tir me a lechub e ke meluches el mo er tirke el mirruul er tia el babier.