Reference el kirel a Subeled er a Miting er a Klengar me a Omesiunged
© 2025 Watch Tower Bible and Tract Society of Pennsylvania
JULY 7-13
MEKREOS EL TEKOI EL NGAR ER A BIBLIA OSISECHAKL 21
Mellomes el Omellach el Kirel a Deurreng el Chebechiil
w04 3/1 4 par. 5
Ke Mekerang e Mo Sebechem el Ungil el Melilt?
Aike el ko er a di mereched e diak el ungil uldasu el omelilt a sebechel mo mekngit er a uriul. Osisechakl 21:5 a mellach el kmo: “A telbilel a meses a ulterekokl el mo ungil, engdi a rokui el mereched a rengrir a oltirakl a sorir.” (NW) El ua itiang, a rekaiunganged el ekebil ma rebuik a kirir el diak el orreched e mekekokterir el mengiil er a uchei er a bo lolilt el mo melisiich er a delongelir el oeak a chebechiil. E le lak, e ngsebechir el mo chormii sel klemerang el tekingel a William Congreve, el chad er a omeluches el chad er a England er sera chelsel a 1700, el kmu el kmo: “A rurreched el mo bechiil, a mo chemoit a klou el taem el ouuchel a rengrir.”
Lak Momdasu el Kmo Ngkmal Klou a Ultutelem
3 A Jehovah a rirellii a chebechiil el mo uchul a deurreng er a bechiil el sechal me a redil. Me nguaisei engdi ngdiak a chad el cherrungel, me ngsebechel mo er ngii a mondai er a chebechiil. A Paulus a milluches el kmo tirke el mo bechiil a mo metik a ringel. (1 Ko. 7:28) A rebebil a blechoel el di kautoketok, me te omdasu el kmo nglocha dimlak el kirir el mo bechiil. Me a lsekum e te mla mechetakl er a uldasu er tia el beluulechad, e te mo omdasu el kmo ngkirir el dortii a chebechiielir. A uldesuir a kmo a kot el klou a ultutelel el tekoi a bo lolatk a ungil el kirir.
4 Ngdiak el kired el omdasu el kmo a chebechiieled a mla mo mekngit. Kede medengei el kmo a di ta el uchul a dertel a chebechiil el mengai er a Bades a laokreng. (Mt. 5:32) Me sel bo dechelebangel er sel ringel el lulluches el kirel a Paulus, e lak debecherei kldidairreng me lerellid el mo melatk el kmo: ‘Tia el chebechiil, ngmeskak aike el kuusbech? Ak nguu a bltikerreng el kuusbech er ngii? Ak mo metik er a klou el deurreng a bo kubengkel a ta er a chad?’ Mutebengii el kmo aika el ker a di mesaod er a soam. A llomeserreng er tia el beluulechad a dmu er kau el kmo, bo moltirakl er a soal a rengum e mrellii sel meskau a deurreng alta ngmo kirem el dortii a chebechiielem. Engdi a llomeserreng er a Dios a kmo ‘bo le beiusech a medam el omes a ikel mo klungiolel a ta ma tang . . . e lak di momdasu er a di kau.’ (Fil. 2:4) Me a Jehovah a soal a mlemelemii a chebechiielem. (Mt. 19:6) Ngdiak el soal a di molatk er a soam, e ngbai kirem el kot e ke lotkii.
5 A bechiil el sechal me a bechiil redil a kirir el mo kaubltikerreng e kakull. (Monguiu er a Efesus 5:33.) A Biblia olisechakl er kid el mo blechoel el merous er a bai dolai. (Rel. 20:35) Ngera el blekeradel a mo ngosuterir a rebechiil el chad el mo kaubltikerreng e kakull? Ng ngariourreng. A rebechiil el sechal me a rebechiil el redil el ngariou a rengrir a diak bo losiik a mo uchul a klungiolir, e te bai osiik a ungil er a rebecherir.—1 Ko. 10:24.
w06 12/1 6 par. 13
“Mosiik er a Deuil a Rengum el Obengkel a Ekebil el Blo Bechil”
13 E kuk mekerang a lsekum a chebechiil a soal el metemall e le omerellel a chad el mo er a bechil a uchul? A lsekum e ngsoad el osiik a rolel el mo sumecheklii a mondai e ngkired el mo outekangel. El ua tiang, ngsebechel a chad el mla mo smau el di meterekakl a omelekingel el mo er a bechil. (Osisechakl 12:18) El ua bla desodii er a suobel er a uchei, tiang a sebechel el mo uchul a mekngit. A osisechakl er a Biblia a kmo: “Ng bai ungil a de kiei er a ked er a de kiei el obengkel a betok a tekingel e becheremermangel a ngerel el redil.” (Osisechakl 21:19) A lsekum e kau a redil el uaisei a chebechiielem, e di lekau el oker er kau el kmo, ‘A blekerdelek nguchul e ngmeringel er a bechik el me kmeed er ngak?’ A Biblia a melekoi er a rebechiil el sechal el kmo: “Bo le betik a rengmiu rar bechemiu, e lak le mekngit a ngeriu er tir.” (Kolose 3:19) Ma lsekum e kau a bechiil el sechal, e di lekau el oker er kau el kmo, ‘A blekerdelek ngua lak a bltikerreng er ngii ma uchul e a bechik a mocha osiik a ongelaod er a kmung ker?’ Ngmera el tekoi, a deleboes a diak lemelemalt el omeruul, engdi choua ika el tekoi a sebechel el duubech ma uchul e ngkired el mesaod aika el mondai.
Morriter er a Tekingel a Dios
w05 5/1 13 par. 9
Sel Telkib el Osenged er a Rengedel a Dios a Mocha Bleketakl
9 A Jesus a mla mo diak lechad el ngar er a bebul a ngelekel a roba, e ngbai mla mo mesisiich el King. Ngii a mocholt el ngar er a bebul a uos—el ngii a okesiu er a Biblia el kirel a mekemad. (Osisechakl 21:31) A Chocholt 6:2 (BT) a kmo, “E mesang, ngtobeda becheleleul uos el mei, e ngikal dengchokl er ngii choba ukar; ma krone el le bilsang, me ngtilobed el mla mo kats el lmuut el mo kats.” Ma dirrek, el kirel a Jesus, e a David el milluches a psalm a kmo: “A Rubak [el Jehovah] a mo komengelii a klisichem el king el omuchel er a Sion. Ng dmu el kmo, ‘Mongedereder er a re cherrouem.’”—Psalm 110:2.
JULY 14-20
MEKREOS EL TEKOI EL NGAR ER A BIBLIA OSISECHAKL 22
Mellomes el Omellach el Kirel a Okerulir a Rengalek
Te Mukeroul el Mo Mesiou er a Dios?
7 A lsekum ko bechiil e somiu el mo oungalek, e di lekemiu el oker: ‘Kemam, ngariou a rengmam e betik a rengmam er a Jehovah me a Tekingel? A Jehovah ngmo melilt er kemam el mo omekerreu er ngika el mekreos el tolechoi?’ (Psa. 127:3, 4) E a lsekum ke oungalek, e di lekau el oker: ‘Ngak a kulisechakl er a ngelekek er a klungiolel a meringel el ureor?’ (Oli. 3:12, 13) ‘Ngak ak mora tkurrebab el klisichek el omekerreu er a rengelekek er aike el mo uchul a telemellir er a klechad me a klereng el locha bo lechebangel er tia el beluulechad er a Satan?’ (Osi. 22:3) Ngdiak el sebechem lomekerreu er a rengelekem er a rokui el omelsemai el locha bo lechelebangel. Ngkmal diak el sebechel tekoi. Me nguaisei, engdi ngsebechem el mekekokau e dirrek loba bltikerreng el mengetmokl er tir el kirel a mondai er a klechad loeak sel molisechakl er tir el mo ultuil er a Tekingel a Dios el kirel a ulekrael. (Monguiu er a Osisechakl 2:1-6.) El ua tiang, a lsekum a chedemiu a melilt el mo otngeklii a mera el omengull, e mngesuterir lokiu a Tekingel a Dios el mo medengelii a klungel a ultutelel a lolemolem el loba blakerreng el mora Jehovah. (Psa. 31:23) Me a lechub a betik er a rengmiu a mad, e mochotii er tir a rolel a lousbech er a Tekingel a Dios el mengelaod a rengrir e lebesterir a budech.—2 Ko. 1:3, 4, BT; 2 Ti. 3:16.
Ruungalek—Mosisecheklterir a Rengelekiu el Mo Betik a Rengrir er a Jehovah
17 Momuchel el osisecheklterir a rengalek sel dirk lemekekerei. Ngkmal ungil a lsekum a ruungalek a omuchel el osisecheklterir a rengelekir sel dirk lemekekerei. (Osi. 22:6) Ka molatk er a Timothy, el ulemais el obengkel a apostol Paulus. A delal a Timothy el Eunice me a delal mechas el Lois a ulsisecheklii er a ‘lekekerei’ el dirk tolechoi.—2 Ti. 1:5; 3:15.
18 A lmuut el ta er a obekel er a Côte d’Ivoire, el Jean-Claude me a Peace, a mle sebechir el mekeruleterir a retelolem el ngelekir el mo betik a rengrir e mo mesiou er a Jehovah. Ngera ngilsuterir el mo sebechir el kutmeklii tia el tekoi? Te uleltirakl er a kerebil a Eunice me a Lois. Te melekoi el kmo, “Te di mle mekekerei a rengelekam, el telkib el taem er a uriul er a lemechell, e aki ulemuchel el olisechakl er tir er a Tekingel a Dios.”
19 Me ngera belkul a ‘dolisechakl’ er a Tekingel a Jehovah el mora rengeleked? A tekoi el ‘dolisechakl’ a belkul a kmo ‘kede olisechakl e omelekl el betok el taem.’ A bo el sebechir a ruungalek el meruul er tiang, e ngkirir el mo blechoel el obengterir a remekekerei el ngelekir. Me a lebebil er a taem e ngsebechir el mo mechitechut a rengrir e le ngkirir el blechoel el omelekl a ulekrael el mora rengelekir. Nguaisei engdi a ruungalek a sebechir el omes er tiang el ua letechall el sebechir el ngosuterir a rengelekir el mo medengelii a Tekingel a Dios e oltirakl er ngii.
Mosisecheklii a Ngelekem el Mo Mesiou er a Jehovah
6 Me kemiu el betik a rengmiu er a rengelekiu a uchul me kom medengei el kmo ngkmal kiriu el mellach er tir. A lebebil er a taem e ngsebeched el di smodii el mo er tir sel uchul me a tekoi el dilubech a melemalt me a lechub e ngcheleuid. Engdi ngmekerang a lsekum te di melemolem el diak lolengesenges? (Osi. 22:15) Sel bo leuaisei e moukerebai er a Jesus. Bo leklou a rengum e molemolem el mellach er tir el omekrael e olisechakl e omeklemalt er tir. Momes er a ungil el taem me a techall, e mollach er tir el ngar er a ungil el rolel. A odos er kid er a South Africa el Elaine a melatk er sel rolel er a demal me a delal a lollach er ngii. Te mle blechoel el ouchais er ngii a uldesuir. Me a lsekum te dilu er ngii el kmo ngmo mechelebed sel bo lak lorrenges e te mo rullii a tekoi el ledillii. Engdi ngdmu el kmo: “Ngdimlak a ta el taem el lekesib a rengrir e lollach er ngak me a lechub e lak louchais er a uchul me ngkirek el mechelebed.” Me ngokiu a omerellir e ngmle ungil el medengei el kmo a demal me a delal a betik a rengrir er ngii.
Morriter er a Tekingel a Dios
Betik a Deurreng er Aike el Techall el Molab er Chelechang
11 Ngdi osisiu, ngsebeched el menglou er a deurreng er kid sel bo leblak a rengud el meruul aike el sebeched er a omesiunged el mora Jehovah. Bo le ‘blak a rengum’ el omerk er a klumech e bo mui el teloi a tekoi er a ongdibel. (Rel. 18:5, BT; Heb. 10:24, 25) Bo mungil kltmokl el kirel a miting me bo el sebechem el onger el ngar er a rolel e ke melisiich er a rebebil. Bo mungil kutmokl a part er kau er a miting. E a lsekum e te olengit er kau el molengeseu er a ileakl el ureor er a ongdibel e bo molab a taem e dirrek el bo el sebeched el ultuil er kau. Lak bo momdasu el kmo a ngerachel el bla mnguu a diak el sal klou a ultutelel e kmal di waste a temem. Bo meringel el oureor el menglou a duch er kau. (Osi. 22:29) Sel mongoit er a klou el temem el meruul a tekoi el kirel a Jehovah e ke mo olengeriakl e lmuut el mo dmeu a rengum. (Gal. 6:4) Ngdirrek el mo beot er kau a mo dmeu a rengum el kirir tirke el ngmai a ngerachel el mle soam el ngmai.—Rom 12:15; Gal. 5:26.
JULY 21-27
MEKREOS EL TEKOI EL NGAR ER A BIBLIA OSISECHAKL 23
Mellomes el Omellach el Kirel a Usbechel a Rrom
w05 4/1 27 par. 5-6
Moba Tabesul el Osengem el Kirel a Usbechel a Rrom
5 E mekerang oleko a chad a melim a rrom engdi ngkerekikl me ngdiak lolim me lebo lecheltelaol er a osengir a rebebil? A rebebil el chad a sebechir el melim a betok e diak bo lecholt el kmo te cheltelaol. Engdi, a bo lomdasu el kmo choua ika el omeruul a diak a telemellel a kuk ta er a rolel e a chad a di ngii el mengeblad er ngii. (Jeremia 17:9) Cherengel a taem, el mekekokil, e a chad a sebechel el merael el mo smecher er a omelim el rrom e mo “sibil a chomelim el bilong.” (Titus 2:3) A Caroline Knapp a melekoi el kirel a rolel e a chad a mo smecher er a omelim el rrom, el kmo: “Ngmeoud, e mekekokil el mo uaisei.” Ngkol ua ngera el omekodall el bedikl a imis el usbechel a rrom!
6 Dirrek el molatk er a uleklatk er a Jesus el kmo: “Mkekerengemiu ma rengmiu lak bo loberaod er chomelechemakl, ma cheltelaol ra rrom, ma ulekerreu er tial klengar, me lak dilemereched el mer kemiu sel sils el ua bedikl el omdechem er kemiu; ngmei el mor tirikel rokui el kiei er a bebul chutem ra belulechad el rokir.” (Lukas 21:34, 35) A omelim a diak el kirel el mo er sel telkael el lebocha lecheltelaol er a rrom a chad er a uchei er a lerellii a chad el mo mesulaul e mesaik—a bedengel ma klereng er ngii. E mekerang oleko a sils er a Jehovah a mei e ngii a ngar er chouai sel blekeradel?
Bo Mukrael er a Osengel a Dios el Kirel a Rrom
Engdi a Rekristiano a oltirakl a ulekrael el mlara betik a rengul el Ulemeob. El ua tiang, ngmla ouchais er kid a kngtil a dolim a rrom el mo imis. Kede locha mla menguiu el kirel a komakai el omesodel a chad el imis el melim a rrom el losaod er ngii a Osisechakl 23:29-35 me a mondai el dilubech el mo er ngii. Daniel el ta er a remechuodel el ngar er a Europe a mesaod el kirel a klengar er a uchei er a lebo lemera el Kristiano el kmo, “Imis el omelim el rrom er ngak a mlo uchul a betok el mekngit el omelilt me a mekngit el experience el sel bo kullatk e ngkmal mo mekngit a renguk.”
Morriter er a Tekingel a Dios
A Mera el Llomeserreng Omekedong el Klou a Ngerel
16 Bo lungil a rengum er aike el ngar ngii er kau. A Biblia meskid tia el ulekrael: “Lak di le kau el mengitechut a bedengem el melasem el mo merau. A ududem a sebechel di mereched el nguemed, el ua bla le redem osebekel el sebek el mo cheroid el ua uasi.” (Osi. 23:4, 5) A rechad a kmal sebechel di beot er tir oriid a ududir me a kloklir. Me nguaisei engdi a remerau me a remechebuul a di diul di sorir el mengereker a betok el udoud. Tia uchul me te blechoel el mo meruul a tekoi el ngii a tomall chisir, deleuill er tir me a rechad, me a dirrek el health er tir. (Osi. 28:20; 1 Ti. 6:9, 10) Me nguaisei engdi llomeserreng a ngosukid el moba tabesul el uldasu el kirel a udoud. Tia mo ngosukid me ngdiak lebo el merechorech a rengud e mo dmeu a rengud er aike el ngar ngii er kid.—Oli. 7:12.
JULY 28–AUGUST 3
MEKREOS EL TEKOI EL NGAR ER A BIBLIA OSISECHAKL 24
Msisichau el Kirel a Kerior
it-2 610 par. 8
Odechelakl
A Rekristiano a dirrek el oba omereng el saul el kirel sel nguked el longiil er ngii tirke el outekangel. A Jesus a milsaod er tia el nguked el kmo: “Te ngeltengat a re modechelakl ele te meruul a soal a Dios; ele te mediukes er a Rengedel a Dios.” (Mt 5:10) Klemedengei el kirel a okiis lobengkel a klemedengei el kirel Ngike el uchul tiang a smisicheterir. Ngmelisiich er tir el lomelemii a blakerreng er tir el mora Dios alta ruldechelakl a omekdakt er tir er a meringel el kodall. Tir el oumerang er aike el mo er ngii el kodellel a Jesus a uchul me te mla mo mimokl er a dakt er a chouaisei el kodall. (Heb 2:14, 15) A uldesuel a Kristiano a klou a ultutelel a lsoal lomelemii a blakerreng er ngii er cheungel a meringel el ultok. “A reng el ngar a chelsiu a kirel el mo ua blekerdelel a rengul a Kristus Jesus . . . [el] mlo olengesenges el mo lmuut er a kodall, el kodellel er a kerus.” (Fil 2:5-8) “Sel deurreng el dirk merael el mei a uchul me ng dimlak a belkul er ngii a rrengel a mo mad er a kerus.”—Heb 12:2; dirrek el momes er a 2Ko 12:10; 2Th 1:4; 1Pe 2:21-23.
w09 12/1 20 par. 12-13
Molemolem el Oldeu a Rengmiu er a Taem er a Chelebuul
12 A Osisechakl 24:10 a kmo: “A lsekum ke mo mechitechut sel bo le chetituokel a tekoi, e kau a mechitechut.” E a Osisechakl 15:13 a kmo: “A ungilreng a mekebekii a mad, e a klengiterreng a mengam a reng.” A rebebil el Kristiano a mlo mechitechut a rengrir e mlo diak losuub e lolebedebek er a Tekingel a Dios, el Biblia. Me a nglunguchir a ua lekea belkul, misei e te mocha meleakl er tir er a rekldemir el Kristiano. Me ngkmal bleketakl el kmo ngkdekudel el tekoi a lsekum e kede melemolem el mekngit a rengud.—Osisechakl 18:1, 14.
13 Engdi a lsekum e kede omes a ungil er a tekoi e ngsebechel el ngosukid el mo melelem aike el tekoi er a klengar er kid, el ngii a sebechel el mo uchul a deurreng. A David a milluches el kmo: “Dios er ngak, ng kmal soak el meruul a tekingem.” (Psalm 40:8) Me a lebo er ngii a cheleuid el tekoi er a klengar er kid, e ngdiak el kired el torebengii a mla meketmokl el temel a omengull er kid. Nguaisei, a kot el ungil el rolel e kede melemolem el dmeu a rengud a sel bo demechesang el kirel aike el tekoi el ngii a sebechel el mo uchul a deurreng. A Jehovah a ouchais er kid el kmo, ngsebeched el metik a deurreng sel deblechoel el menguiu er a Tekingel, el Biblia. (Psalm 1:1, 2; Jakobus 1:25) Me ngoeak a Chedaol el Llechukl me a miting er a Rekristiano, e ngsebeched el ngmai a “ungil tekoi” el ngii a melisiich er kid, e dirrek el mo uchul a deuil a rengud.—Osisechakl 12:25; 16:24.
A Ker el Mla er a Remenguiu
A Osisechakl 24:16 a kmo: “Ele melemalt el chad a mo euid el bo lobiou e mekiis, ngdi kerior a mo okngemedii a dengerenger.” Tia ngmelekoi el kirel a chad el blechoel el ruebet er a klengit engdi Dios a ousubes er ngii?
Tia el bades a diak lolekoi el uaisei. Ngbai melekoi el kirel a chad el blechoel el osiuekl a mondai me a lechub e ngkerior e lmuut el mekiis el belkul a kmo ngoutekangel.
Me aika el rokui a olecholt el kmo a Osisechakl 24:16 a diak lolekoi er a derebet er a klengit, e ngbai melekoi er a bo dechelebangel a mondai me a lechub e ngringel, el betok el taem. Ngar tia el mekngit el beluulechad er chelechang, e a melemalt el chad a sebechel mo chemau a secher me a kuk bebil er a mondai. Ngdirrek el sebechel mo chuarm a meringel el odechelakl er a kabelment. Me nguaisei, engdi ngsebechel loumerang el kmo a Dios a mo ngosuir el outekangel e mo mesisiich. Molatk er a ildisel a taem el di blechoel el mo ungil a tekoi el kirir a remesiungel a Dios. E ngera uchul? Ngulterekokl a rengud el kmo a Jehovah “olengeseu er a rokui el ngar a chelebuul; e mengedidai er a rokui el ngariou a rengrir.”—Psa. 41:1-3; 145:14-19.
Morriter er a Tekingel a Dios
Chebechiil—A Sengk el Mla er a Betik a Rengul el Dios
13 A lsekum ke mocha melatk el kirel a chebechiil e ngungil a di lekau el oker el kmo: ‘Ngak ak mla mo kltmokl el mo bechiil?’ A nger er kau a diak el kirel el di mo ultuil er a uldesuem el kirel a bltikerreng, me a durs er a chebechiil, me a chelmengem, me a klengelakel. E le ngar er ngii a meklou a ultutelel el ngerachel el kirel a sechal me a redil el melatk er a uchei er a bo lebechiil.
14 A kekerei el chad el osiik er a mo bechil a kirel el kerekikl el melatk er tia el omellach el kmo: “Mkedmeklii a uchul a kerrekerngem, e mkedmokl a bek el tekoi er a sersem, e bochu momekedechor er a blim.” (Osisechakl 24:27) E tiang ngera belkul? A irechar e a chad el soal el mo bechiil, e meleketek er a telungalek er ngii a kirel el di ngii el oker el kmo, ‘Ngak ak mla mo kltmokl el mo bechiil e dirrek el mo oungalek?’ Ngmle kirel el omuchel el mo oureor el mengetmokl er a sersel me a lechub e ngdellemelel. Me tia el osisiu el omellach a dirrek el ungil el kired er chelechang. A chad el soal el mo bechiil a kirel el mo ungil el kutmeklii el kirel a ngerachel el bo lechelebangel. Me a klemengetel a taem el lemesisiich a bedengel e ngkirel el oureor el mengereker. Me a Tekingel a Dios a meketeklii el kmo, a chad el oumerang e diak losiik aike el ousbech a telungalek er ngii er a klechad, me a uldasu, me a omesiungir el mo er a Dios, a kuk mekngit er ngike el diak a klaumerang er ngii!—Monguiu er a 1 Timothy 5:8.
15 A redil el soal el mo bechiil a dirrek el kirel el melatk el kmo, ngar er ngii a ngerechelel el olengeseu el meruul a meklou a ultutelel el tekoi er a chebechiielel. A babier er a Osisechakl a omasech a duch me a blekeradel el bechiil el redil a ousbech sel lolengeseu er a bechil el omekerreu er a telungalek er ngii. (Osisechakl 31:10-31) Me a sechal me a redil el di mereched el mo bechiil el diak lungil el kltmokl a ochotii el kmo, te di melatk er a di tir e diak lomdasu el kmo ngera ngousbech a chad el bo lebechil. E a ngarbab er ngii el rokui, a chad el melatk el mo bechiil a kirel el mesuub el mo ungil el oltaut a omellach er a Biblia sel bo lebechiil.
AUGUST 4-10
MEKREOS EL TEKOI EL NGAR ER A BIBLIA OSISECHAKL 25
Mellomes el Omellach el Kirel a Cheldechedechad
A Cheldechedecham Bo Luchul a Omelisiich
6 Ngera me ngklou a ultutelel el kired el melilt er a ungil el taem el dongedecheduch? A Osisechakl 25:11 a kmo: “A ngesou er a ungil uldasu el medung er sel kirel belsechel a ua kolt el ringngo el ngar a klebokel belatong el silber.” A kolt el ringngo a kmal klebokel, engdi sel denguu el okedii er a klalo el rruul er a silber e nglmuut el mo klebokel. Me ngdi osisiu, nglocha ngar er ngii a ungil el tekoi el soad el dmu er a chad, engdi kede osiik er a ungil el taem e mo dmung, me bo el sebeched el ngosuir ngii el chad. Me ngmekerang a doruul er tiang?
7 A rechad a sebechir el mo rrau a rengrir me a lechub e ngdiak lekengei a tekoi el dedung er a diak lungil el taem. (Monguiu er a Osisechakl 15:23.) El ua tiang, ngar er a March 2011 e a klou el desiu me a tsunami a tilemall a betok el mats er a beluu er a Siabal, me te kuk betok er a 15,000 el chad a mlad. Me alta e a rebetok el Sioning er a Jehovah a urrideterir a rechederir me a resechelirir, engdi te milengoit a temir el ousbech er a Biblia el olengeseu er a rechad el chilarm a osisiu el mondai. Tirka el Sioning a mle medengei el kmo a rebetok el chad a mle Buddhist me ngdimlak a klemedengei er tir er a Biblia. Me ngdimlak losaod er a taem er a okiis el mo er tir e bai milengelaod er tir e milsaod er a uchul me a mekngit el tekoi a duubech el mo er a rungil el chad.
A Cheldechedecham Bo Luchul a Omelisiich
15 Sel rolel a dongedecheduch er a rechad a dirrek el kmal klou a ultutelel. A rechad a mle ungil a rengrir el orrenges er a Jesus, e le ngmle medemedemek e ungil a rolel a longedecheduch. (Lk. 4:22) Me sel lungil a rolel a dongedecheduch e a rechad a mo sorir el orrenges er kid e dirrek el mo kongei a tekoi el dolekoi. (Osi. 25:15) Ngmo sebeched el ungil el mengedecheduch er a rechad a lsekum kede oba omengull el bedul tir e kerekikl me lak detemall a rengrir. E tiaikid a lurruul er ngii a Jesus. El ua tiang, sera lesa seked el kmal mle blak a rengrir el oltirakl er ngii e le ngmle sorir el orrenges er ngii, e ngkmal mlo chubteterir me ngmilengoit a taem el obengterir e olisechakl er tir. (Mk. 6:34) Ngmo lmuut er a taem el rechad a uleltuub er ngii e ngdimlak lolaitechei a mekngit el omerellir.—1 Pe. 2:23.
16 Me alta ngkmal betik a rengud er a rechedad me a resechelid, engdi kede locha mo mekngit a ngered sel dongedecheduch er tir e le kid el ungil el medengelterir. Kede locha omdasu el kmo ngdiak a belkul a desal kerekikl a tekoi el dolekoi el mo er tir. Engdi a Jesus a dimlak a ta el bo lemekngit el mengedecheduch er a resechelil. Sel taem er a lekaititekangel er a kmo ngtecha er tir a kot el ngarbab, e ngmle ungil a tekingel el mesmechokl er tir el ousbech er a kerebil a kekerei el buik. (Mk. 9:33-37) Me a remechuodel er a ongdibel a kirir el oukerebai er a Jesus er a taem el lollach er a rebebil.—Gal. 6:1.
“Bo Leblak a Rengud” el Kasisiich er a Delongeled
10 Ngdiak di el remechuodel a kirir el melisiich er a rebebil. A Paulus a milengelechel er a rokui el Kristiano el mo melekoi “a ikel ngar ngii a le rellii, el ikel ngosuir a chad e ngar ngii a belkul, me bo le sebechel a ikel molekoi el mor ngii a le rellii” er a rebebil. (Efesus 4:29) Me kid el rokui a kired el mo kerekikl el melatk aike el ousbech a rebebil me bo el sebeched el ngosuterir. A Paulus a milluches el mora Rekristiano el chad er a Hebru el kmo: “Modars a ikel mesula el chim, e msisiich a ikel omretelal bkul a uach. Muklemalt a roliu, ma chitechut el uach lak leiit a chiuesel, e bai bo lungil.” (Hebru 12:12, 13) Me kid el rokui el mo lmuut er a remekekerei a sebeched el kasisiich er a delongeled lokiu a tekinged.
Morriter er a Tekingel a Dios
Sel Omedemedemek, e Kau a Mesisiich
3 A remedemedemek a rengrir el chad a diak el mechitechut a rengrir. Ngkirel mesisiich a rengud a lsekum kede melemolem el chelellakl a rengud er a chelsel a meringel el blekeradel. A delemedemek a ta er a “rodech ra Reng.” (Gal. 5:22, 23, BT) A tekoi er a Grik el moiuid el “delemedemek” a lebebil e te uluusbech er ngii el mesaod er a tebelik el uos el mla mo kedung. Ka molatk er a tebelik el uos el mla mo chelellakl. Me alta ngmla mo kedung engdi ngdirk mesisiich. Kid a rechad, ngmekera sebeched el mo oba delemedemek engdi osisiu el taem e ngdirk mesisiich a rengud? Tia diak lultuil er a klisiched. Ngkired el meluluuch lolengit er a chedaol reng er a Dios me lengesukid el mekurulii tia el blekeradel. Experience er a rechad ochotii el kmo ngsebeched el mekurulii tia el blekeradel. A rebetok er a Resioning ulechotii a delemedemek er a lomtok er tir a rechad. Tia ngilsuterir a rechad el mo ungil a uldesuir el kirir a Resioning. (Monguiu er a 2 Timothy 2:24, 25, NW.) Ngmekera sebechem el rullii a delemedemek el mo ta er a dechal a rengum?
AUGUST 11-17
MEKREOS EL TEKOI EL NGAR ER A BIBLIA OSISECHAKL 26
Mongeroid er Kau er a “Kebelung el Chad”
it-2 729 par. 6
Chull
Blsechel. A blekerdelel a eanged er a Beluu er a Nglat a mle oumesingd el blsechel a kleald me a blsechel a kelekolt, el ngii a taem el medirt me a taem el chull. (Momekesiu er a Psa. 32:4; Sal 2:11.) Ngomuchel er a melengel a April el mora melengel a October e ngdiak a kmal chull. Ngdiak el klou a chull er tiakid el taem el blsechel a omeridm. A Osisechakl 26:1 ochotii el kmo a chull er a temel a omeridm a mle ngodech el tekoi. (Momekesiu er a 1Sa 12:17-19.) Sel blsechel a chull e ngdiak di lolemolem el chull; ngkuk chull e kuk mo ungil a eanged. Chouaitia el taem a dirrek el blsechel a kelekolt a uchul me kede mo mekerasem. (Esr 10:9, 13) Sei a uchul me a ungil omderungel a klou a ultutelel.—Isa 4:6; 25:4; 32:2; Job 24:8.
w87 10/1 19 par. 12
Omesmechokl a Mo Uchul a Ungil Rodech
12 A rebebil er a rechad a ousbech er a lmuut el meringel el omesmechokl el ua lolekoi a Osisechakl 26:3 el kmo: “A chelebed a mor a uos, ma uak a mor a donkey, ma chelebed a mor a ulkel a kebelung el chad.” A Jehovah a lebebil e ngmilecherei a renged er a Israel me ngmai a medal a omerellel: “Tulemtok a tekingel a Dios el Olab a Bek el Klisiich, e mla otngakl osisecheklel. Ng mla tmurk a rengrir er a meringel el ureor; te mochu ubuu e diak a ngosuterir. Tulemekedong er a RUBAK er a chelsel a chelebulir, me ng ulsebelterir er a chelsel a chelebulir.” (Psalm 107:11-13) Nguaisei engdi a rebebil er a remekebelung a kmal medecherecher a rengrir me ngdikea omesmechokl el sebechel lomeklemalt er tir: “A lsekum ng mengal mo medecherecher a rengum sel bek el losmechokl er kau, e a tar a klebesei e ke mo metemall e kmal diak bo mungil.”—Osisechakl 29:1.
it-2 191 par. 4
Chitechut
Usbechel er a Osisechakl. A King Salomon a dilu el kmo: “Ngikel mesumech a tekoi er a kebelung a di ngii el meluk ochil e olechau a mekngit el omeruul.” Nguaisei a chad el ousbech er a kebelung el chad el kutmokl a tekoi el kirel a di ngii el meluk ochil el di mo uchul a telemellel. Ngulterekokl a ureor el metemall el diak bo luchul a klungiolel.—Osi 26:6.
Morriter er a Tekingel a Dios
Sel Omedemedemek, e Kau a Mesisiich
18 Nguaisei, mo lmuut er a bo dungil smodii me ngii a diak el rokui el chad a mo kongei. Engdi sel dongedecheduch loba delemedemek e ngar er a ungil rolel e ngkmal ngar ngii a lerellii. (Monguiu er a Kolose 4:6.) Ngsebeched lomekesiu er a dongedecheduch er a chad el kirel a klaumerang er kid el mo er sel dometech er a btuu. Ngsebeched el omidokl me a lechub e kede ometech. Sel debideklii e ngbeot er a chad a medir e mo soal el melemolem el ousekool. Ngdi osisiu, sel dongedecheduch loba delemedemek e ngar er a ungil rolel, e a rechad a locha mo kongei lorrenges e melemolem er a cheldecheduch. Me nguaisei engdi lsekum a chad a soal melemolem el loutoketok me a lechub e ngmelekoi a mekngit el kirel a klaumerang er kid, e ngdiak el dolemolem er a cheldecheduch. (Osi. 26:4) Engdi oumesingd er a rechad a diak el bo leuaisei, e ngbai betok a locha mo kongei lorrenges.
AUGUST 18-24
MEKREOS EL TEKOI EL NGAR ER A BIBLIA OSISECHAKL 27
Klungiaol el Dengai er a Remera el Sechelei
A Jehovah a Omes er a Rengariou a Rengrir el Mesiungel el Mekreos
12 A ngariou a rengul chad a mereng a saul el kirel a uleklatk el lenguu. Ke domekesiu er ngii er tiang: Oleko ke ngar a miting er a Rekristiano. E a uriul er a cho mongedecheduch er a rebebil kldemem er a klaumerang, e a ta er tir a choteklau el mo cheroid e subedau el kmo ngar ngii a tbetbil a kall el ngar a delongelel a ungelem. Ke ulterekokl el mo merur. Me kau, ke mo mereng a sulel el mle subedau? A mera er ngii, ke locha bai oureng el kmo ulekum a chad a mle mereched el subedau! Me ngdi osisiu, ngkirel mo ngariou a rengud e mereng a sulel a kldemed er a klaumerang el mle bekeu a rengul el omeklatk er kid. Kede omes er ngii el chad el sechelid el diak el cherroued.—Monguiu er a Osisechakl 27:5, 6; Gal. 4:16.
it-2 491 par. 3
Ngar Bita er Kid
Nguaisei engdi a klaumerang er kid er a sechelid me kid el sebeched el ultuil er ngii sel dousbech a ngeso a medung er a Osisechakl el kmo: “Lak mchitii a sechelim ma lechub e ng sechelil a demam, e lak bor a blil a ta er kau sel bo mchebuul. A ngar bitar kau el kmeed er kau a kuk ungil er a tar kau el cheroid er kau.” (Osi 27:10) Ngar tiang e ngike el milluches a kmo a kmeed el sechelil a telungalek er kid a sebeched el ultuil er ngii el kirel a ngeso er a ta er kid, a lsekum ngii el chad a kiei er cheroid me ngdiak el kltmokl el sebechel ngosukid el ua sechelil a telungalek er kid.
Rengeasek, Ngmo Ua Ngera Klengar er Kemiu?
7 A ta er a tekoi el desuubii er a mekngit el omelilt er a Joas a kmo, ngkired el melilt er a re friends el tir a betik a rengrir er a Jehovah e sorir el lodeuir a rengul. A resechelid a diak di le tirke el ua meklunged. Lak mobes el kmo, a Joas a kmal mle kekerei er a sechelil er a Jehoiada. Molatk er a resechelim e di lekau el oker: ‘Te olengeseu er ngak el melisiich er a klaumerang er ngak er a Jehovah? Te melisiich er ngak el mo kiei loltirakl a llechul a Dios? Sel longedecheduch e te mesaod el kirel a Jehovah me a klemerang er a tekingel? Te mengull a llechul a Jehovah? Te di ouchais er ngak aike el soak lorrenges, me a lechub ngngar ngii a blekengir el omeklemalt er ngak sel bo kuusbech er ngii?’ (Osi. 27:5, 6, 17) A lsekum a resechelim a diak lebetik a rengrir er a Jehovah, e ngkmal diak mousbech er tir. Engdi a lsekum te ngar ngii a resechelim el betik a rengrir er a Jehovah, e lak mongoit er tir le te ungil kirem.—Osi. 13:20.
Morriter er a Tekingel a Dios
Lak Mobes el Kmo a Jehovah a “Dingar el Dios”
9 Sel bo desa el kmo a Jehovah dingar e mera el chad e ngmo ngosukid el mo omes a ringel el dechebangel loba melemalt el uldasu. Ngoeak a ngera el rolel? Kede mo omuchel lomes a ringel el dechebangel el kmo ng part er a lmuut el klou el mondai er a delongelel a Jehovah me a Satan. A Diabelong a melekoi el kmo sel bo dechebangel a ringel, e kede mo choitii a Jehovah. (Job 1:10, 11; monguiu er a Osisechakl 27:11.) Me sel dolemolem el loba blakerreng alta kede chelebangel a ringel e kede ochotii a bltkil a rengud el mora Jehovah e meketeklii el kmo a Diabelong a cheblad. Kau, ke chelebangel a ultok er a kabelment, ringelel a keizai er a beluu, rechad el momerk el mo er tir a diak el semeriar, me a lechub e ngkuk ta er a ringel? A leuaisei e lak mobes el kmo a blekeradel el omchelebangel er ngii a meskau a techall el mo rullii a Jehovah el mo dmeu a rengul. E dirrek el lak mobes el kmo ngkmal diak bo lebechikau me bom chuarm lengelakl er sel sebechem. (1 Ko. 10:13) Ngmo meskau a klisiich el mousbech er ngii el loutekangel.
Osisechakl 17:17, NW: A mera el sechelid a olecholt a bltikerreng er a bek el taem, e ta er kid el sechal el mlechell el kirel sel bo er ngii a chelebuul.
AUGUST 25-31
MEKREOS EL TEKOI EL NGAR ER A BIBLIA OSISECHAKL 28
Klekakerous er a Chebirukel el Chad me a Melemalt el Chad
w93 5/15 26 par. 2
Kau Ke Cherrungel Loltirakl er a Jehovah?
“Melemalt el chad a bekeu el kor a laion.” (Osisechakl 28:1) Te olecholt a klaumerang, mui lultuil er a Tekingel a Dios, e bekeu el meruul er a omesiungir el mora Jehovah er cheungel a ngii di el kdekudel el blekeradel.
it-2 1139 par. 3
Sekutaberreng
Tirke el mo ikrii Ngike el uchul a sekutaberreng. A chad el mora klengit a mla mo diak lolatk er a Dios sel loruul a omelilt e lolib a tekoi. (Job 34:27) Chouaisei el chad a mecherei a rengul me ngrullii me ngdiak leues a kngtil a omerellel e diak lungil lomtab a tekoi. (Psa 36:1-4) Ngmo lmuut me a ledu el kmo ngmengull er a Dios, ngolab a llecherir a rechad el mo ruchei er a Dios; ngsoal a llecherir a rechad. (Isa 29:13, 14) Ngdi ngii lomeklemalt er ngii e meruul a excuse el kirel a mekngit lomerellel el ua le “klekool” (Osi 10:23, NW) e kmal kikiongel, e mekngit, e klebelung a omesodel er a tekoi, el kmal imis me ngmocha omdasu el kmo a diak lemoues el Dios a diak leues me a lechub e lomtab a kngtil, el di ngii me a bla bo lak loureor a duch er a Dios el omtab a tekoi. (Psa 94:4-10; Isa 29:15, 16; Jer 10:21) Ngoeak a omerellel e ngua ledu el kmo, “Ngdiak a Jehovah” (Psa 14:1-3, NW) e Ngii a dikea el ngar er a klengar er tir. A omellach er a Dios a diak lomekrael er ngii a uchul me ngdiak lungil merriter a tekoi, e lebleketakl el mes a mondai el ngar ngii, e lomiich aike el tekoi el uldimukl er aika el mondai, e lerellii a ungil omelilt.—Osi 28:5.
it-1 1211 par. 4
Blakerreng
A chouaisei el klengar er a blakerreng a di sebechel mo er ngii el diak lokiu a klisichel a dechal a rengul a chad, e ngbai okiu a mesisiich el klaumerang er ngii er a Jehovah me a klisichel el olsobel. (Psa 25:21) A Dios a tibir el kmo ngmo “mesebechakl” e mengkar a rolir tirke el merael el ngar er a blakerreng. (Osi 2:6-8; 10:29; Psa 41:12) Tir el di melatk el kmo te oba kengei er a Jehovah me a lechub e ngdiak a uchul me ngultebechel a klengar er tir, el uchul e te merael er a rael el mo nguu a turrekong er tir. (Psa 26:1-3; Osi 11:5; 28:18) Ngdi ngua lulsa Job, a rediak a telemellir a locha mo chuarm e le omengederederir a remekngit me te locha mo mad lobengterir a remekngit, engdi a Jehovah oterekeklii el kmo ngmedengelii a klengar er a diak a telemellel el chad e tibir el kmo a dikesel a chouaisei el chad a mo melemolem, me a klengar er ngii er a ngar medal a mo budech, e ngii a mo ngmai a ungil. (Job 9:20-22; Psa 37:18, 19, 37; 84:11; Osi 28:10) Ngua desa er a Job, a doba blakerreng, el diak demerau, e ngmo er ngii a belkud me a rechad a mo mengull er kid. (Osi 19:1; 28:6) Rengalek el demerir me a lechub a derrir a uaisei a dmeu a rengrir (Osi 20:7), e mla nguu a kmal ungil diukes er a kerebai er a demerir me a lechub e ngderrir, e oldeu a rengrir er a ungil chisel me a omengull er a rechad el mora demerir me a lechub e ngderrir.
Morriter er a Tekingel a Dios
Kau, Kungil Medengei a Rokui el Tekoi?
14 Kede mla mesang el kmo ngsebechel mo meringel er kid el mo medengei a mera el omesodel a tekoi. Me a lmuut el ta er a tekoi, kid a diak demecherrungel. Me nglocha mla mo betok el rak el dosiou er a Jehovah e dirrek el locha mla mukeroul a klemedengei er kid lokiu a bebil tekoi. Me a rechad a locha mo olecholt a omengull el bedulkid, e le kid el ungil el omtab a tekoi. Engdi tia el tekoi, ngsebechel mo uchul a mondai er kid?
15 Ochoi, ngsebeched el omuchel el di mo ultuil er a di klemedengei er kid. Kede locha mo omuchel el mechei a uldesued me a rengud me ngomtebechel er a rolel a domdasu a tekoi. Kede locha mo oumerang el kmo kede ungil medengelii a tekoi el dilubech alta e ngdiak dodengelii a mera el omesodel a tekoi. Tia el blekeradel a kmal kdekudel! A Biblia a bleketakl el mengelechel er kid me lak desal mo ultuil er a di klemedengei er kid.—Osisechakl 3:5, 6; 28:26.