1 Korintios
Eꞌzsa Dxus tasxte mjĩisaçxáathaꞌw
3 Yakhthẽꞌjweꞌsx, makwe wala jiisa neꞌkwe nawa Dxusaꞌs ew jiisa yakh naꞌwẽ yuꞌ weꞌweyaꞌ ãjameeth, Dxusaꞌs kĩh yuhwa jiimeesa yakh naꞌwẽçxáath weꞌweyaꞌ ãja. Kristo kaapiyaꞌjni yuꞌs kĩh yuhwa jiimée luuçx leꞌçxkwe naꞌwẽçxáa iꞌkwe. 2 Luuçx leꞌçxkwesaꞌs maꞌwẽta leçxiçxáana puuçuꞌ vxite ũꞌ yuꞌs puuçmée txãꞌwẽy iꞌkweꞌsxtxiꞌ kaapiyaꞌjçxawa thẽymeekuẽsaçxáanath kaapiyaꞌjçxa nvxiht, txãꞌwẽ thẽysa yuꞌsaꞌ ãjameeiꞌkwe naa paꞌga saꞌ ãçxpkaçx jiyuyaꞌ ãjaꞌçmeeiꞌkwe. 3 Txãasa ãçxpkaçx iꞌkweꞌsx ũuste Dxusaꞌs yuꞌ kĩh yuhwa jiꞌphmeeiꞌkwe, txãasa iꞌkwe puutx yahçena puiina txuteeçxa fxiꞌzeꞌ. Txãꞌwẽ yũunisaꞌ, Dxusaꞌs ũuste jiꞌphmeesa fxiꞌzenisaꞌ. 4 Txãꞌwẽ Adxaꞌ Pablo yakh uꞌjsath jĩçpkaçxhaꞌ vxiteꞌ Apolos yakh uꞌjsath jĩna txãꞌwẽ yũuçxaꞌ, Dxusaꞌs ¿maꞌwẽçxáa yuhwa ũuste jiꞌphmeesa naꞌwẽ yuh meekwe wakx? 5 Ũus miiyajkxwe: Pabloꞌ ¿kĩh yũusaana? Açaꞌ Apoloswa ¿kĩh yũusaana? Kweꞌsxaꞌ naasáa Dxusna selpisaçxáathaꞌw, Dxus maꞌwẽ jxkaatheꞌ txãꞌwẽy mjĩithaꞌw teeçxsa naꞌwẽçxah, txãa paꞌga iꞌkwe Kristoꞌs jiyuwaꞌjaꞌs jiꞌphu. 6 Adxaꞌ nyafxte uuhsaçxáath yuꞌ, naapkaçxhaꞌ Apolosaꞌ yuꞌawsak yuꞌ. Nawa Dxusku kbuuçxaꞌjçxa nuywala. 7 Txãꞌwẽ uuhsa vxiteꞌ yuꞌawsa txãꞌwẽ yũusaꞌ kĩhwa jxtuhthesameetaꞌ, naasáa Dxus yuuçxáa jxtuhthesaꞌ, txãꞌwẽ kbuuçxaꞌjçxa nuywalapaꞌga. 8 Uuhsa vxiteꞌ yuꞌawsa txãaweꞌsxaꞌ maa yuhwa jxthaakwesamée, txãa naꞌwẽçxaçxáataꞌ. Nawa dewewaꞌj yuꞌsaꞌ txakweçxaçxáa yuꞌmée Dxusaꞌ deweena, makwe mjĩiteꞌ, txãꞌsçxáan deweena. 9 Dxus mjĩinite kweꞌsxaꞌ kxtee mjĩisaçxáathaꞌw, açaꞌ iꞌkweꞌsxaꞌ Dxus mjĩini kiwe naꞌwẽsa iꞌkwe.
Txãꞌwẽy iꞌkweꞌsxaꞌ yat naꞌwẽsa iꞌkwe, açaꞌ txãa yataꞌs txahna pheuꞌjsaꞌ Dxusaꞌ. 10 Dxus jxkaathe adxaꞌ yat txajxaꞌ jiisa naꞌwẽ yat txaahwaꞌjaꞌs kaaçxidaꞌjsaçxáath. Açaꞌ adx takhni kajkweteꞌ vxite mjĩina ũsaꞌ yataꞌs. Nawa maꞌwẽ mjĩiwaꞌjaꞌswa jxpaꞌyakx mjĩiwaꞌj jiꞌphaꞌ teeçxsa naꞌwẽçxah. 11 Yat txaahwaꞌjaꞌs takhna kaaçxidaꞌjni ũsyãꞌjaꞌ txãꞌ Jesukristoꞌ, açaꞌ kim yuhwa vxite fxiy kaaçxidaꞌjwaꞌj jiꞌphmeetaꞌ. 12 Naꞌwẽ kaaçxidaꞌjni kajkwete kĩh yakhwa mjĩitxna: vxyuu beh, vxyuu çxihme, kwet zhiçxkwesa yakh meeçxawa fxtũu, çhĩçh, khĩh txãꞌwẽsa yakh. 13 Nawa Dxus kastigãywaꞌj ente yaꞌpdxiꞌpuçxa yaꞌjiyuna maꞌwẽ mjĩiniꞌswa. Txãa enteꞌ ipx yakh kĩijana, açaꞌ txãa ipxaꞌ kaajiyuꞌjuna mjĩisa maꞌwẽ mjĩiniꞌswa. 14 Txãa kaaçxidaꞌjni kajkwete mjĩisaꞌ ew wáa mjĩina ipxte çxhavxywaꞌjmeesa yakh açaꞌ txãꞌwẽ ew mjĩipaꞌga dewení yuuna. 15 Nawa txãa yatte mjĩisaꞌ ipxte çxhavxywaꞌjsa yakh wáa mjĩina açaꞌ jxuka çxhavxyteꞌ, mjĩipaꞌga dewenimée yuuna. Naasáa kxtee mjĩisa yuuçxáa ewte neeyũuna, txãa ipx walajũ ũphna kasehsa naꞌwẽ.
16 Iꞌkweꞌsxíi Dxus ũswaꞌj yatiꞌkwe, naa paꞌga Dxus Espiritu iꞌkweꞌsx ũuste uꞌpwaꞌjsate jiimeewáꞌkwe. 17 Dxus ũswaꞌj yataꞌ kĩh pkal yuhwa jiꞌphmeesa naꞌs maawa Dxus ũswaꞌj yataꞌs ivxiituteꞌ, Dxusaꞌ ivxiituna txãꞌwẽ yũusaꞌs. Txãa Dxus ũswaꞌj yataꞌ iꞌkweꞌsxiꞌkwe.
18 Iꞌkweꞌsxaꞌ maa yuhwa jxpubanuwe, wala jiisathaꞌw sũhna. Maawa naa kiweteweꞌsxaꞌs wala jiisa ũsçxaꞌ, jiimeekwesa naꞌwẽçxáa miiyajkxwe. Txãꞌwẽ yuuçxáa, wala jiisa yuuna paꞌjaneꞌkwe. 19 Naa kiweteweꞌsxçxáana wala jiyuniꞌ, Dxus dxiꞌpteꞌ kĩh yuhwa seelpimeesaꞌ. Txajíik Dxus librute naꞌwẽ weꞌweꞌ: Wala yãꞌj jiithaꞌw sũhna fxiꞌzesatxiꞌ ewmeete khẽewaꞌjaꞌsku vxituꞌ Dxusaꞌ, txãꞌwẽ yaakxpaꞌga. 20 Txãꞌwẽy vxite ajkhẽwa naꞌwẽ fxiꞌjni ũsaꞌ: Wala jiithaꞌw sũhna fxiꞌzeniꞌ, kĩhte yuhwa seelpimeetewa jiiaꞌ Dxusaꞌ jĩꞌk. 21 Txãa paꞌga nasaçxáatx jxthaakwe iiwejçx iiwejçx yajkxna fxiꞌzewaꞌjmeꞌ. Txãꞌwẽ yaakxkahmeníi kĩhwa jxuka iꞌkweꞌsx jĩiçxaçxáataꞌ. 22 Pablo maꞌk yuu, Apolos maꞌk yuu, Pedro maꞌk yuu, naa kiwe maꞌk yuu, ĩtxi fxiꞌzenisa maꞌk yuu, uuwaꞌj maꞌk yuu, naa ensu fxiꞌzeni maꞌk yuu, vxite ensu fxiꞌzewaꞌj maꞌk yuu, nawa txãꞌ jxuka iꞌkweꞌsx jĩiçxaçxáataꞌ. 23 Naapkaçxhaꞌ iꞌkweꞌsx yuꞌ Kristo jĩi iꞌkwe, açaꞌ Kristo yuꞌ Dxus jĩꞌ.