1 Korintios

Jesukristo jxkaahnisaweꞌsx mjĩini

4 Txãꞌwẽyãꞌtheꞌ, kweꞌsxtxiꞌ naa sũhnaçxáa mfxiꞌzewe: Kweꞌsx ewte neeyũuwaꞌjaꞌs Dxusaꞌ txãniitey pheuꞌjçxa jiꞌphuꞌk kim yuhwa jiyunimeesa txãꞌsna ptaꞌsxkahn neeweꞌweçxa nvxihtte Kristo tasxte selpisaatxna sũhnaçxáa mfxiꞌzewe. 2 Txãꞌwẽ mjĩiwaꞌjaꞌs jxpaꞌgasaꞌ maꞌwẽ mjĩiwaꞌjaꞌswa jxuka kxtey yuuwaꞌj jiꞌphaꞌ. 3 Adx mjĩiniꞌs iꞌkweꞌsxaꞌ maꞌwẽwa nuyweꞌweneꞌkwe. Nawa iꞌkweꞌsx weꞌwenitxiꞌ adxaꞌ leꞌçxkweçxáa yuhwa yaakxwaꞌj jiꞌphmeeth. Adxíiçxáa yuhwa adx mjĩiniꞌ ewaꞌ sũjuꞌçmeeth. 4 Nawa adx ũuste yuꞌ ewmeꞌ sũhna yuꞌçmeꞌ. Açaꞌ adxaꞌ ew mjĩisath jĩçxa txãꞌwẽ weꞌweçmeeth. Jesukristo yuuçxáa adx maꞌwẽ mjĩisatewa weꞌwewaꞌj jiꞌphaꞌ. 5 Txãa paꞌga mjĩiniꞌs weꞌwewaꞌj en ãhmeyna yuꞌ, iꞌkweꞌsxaꞌ nuyweꞌwenuwe. Mũythaswe Jesukristo kĩhpkaçx. Txãa yuuçxáa ew maꞌk yuu ewmée maꞌk yuu nawa kaajiyuꞌjuna makwe jiyunimeesa ũusteçxáa yaakxnisa sũthni yuu maꞌk nawa jxuka. Txãꞌwẽ yũunijũ yaꞌjiyuna nasaa iisa maꞌwẽ yũusaaçxawa.

6 Yakhthẽꞌjweꞌsx, txãꞌwẽ nuyweꞌwena fxiꞌzeniꞌsthu yuꞌkxpejeꞌ, Apolos fxiꞌzeni vxiteꞌ adx fxiꞌzeni txãatx thegçxa txãꞌwẽy fxiꞌzekahn. Txãꞌwẽ yuuçxáa, iꞌkweꞌsxaꞌ jxpubamée fxiꞌzeneꞌkwe Dxus yuwe maꞌwẽ jxkaatheꞌ txãꞌsçxáa kxtey yuuna. Saꞌ kim yuhwa txãꞌwẽ teeçxsaçxáꞌs weeçx yajkxna wedxçxaꞌ, vxite yuꞌs ahçena fxiꞌzemeeneꞌkwe. 7 Idxaꞌs ¿kimga jxthaakwe walasa vxit? Txãꞌwẽ Dxus peesnimeesa ¿kĩhçxáꞌ jiꞌphgaꞌ? Txãꞌwẽ kĩhwa jxuka Dxus peesniçxáꞌs jiꞌphçxaꞌ, ¿maꞌwẽçxaga iiwejçx yaakiꞌ, idxçxáa pakweçxa uysáa naꞌwẽ?

8 Iꞌkweꞌsxaꞌ kĩhwa peejxmée jiꞌphsa naꞌwẽ yãꞌjiꞌkwe yaakiꞌ. Kweꞌsx yuutxiꞌ eꞌskhẽ nvxihtçxa, jxkaahsa naꞌwẽ iꞌkwe yaakiꞌ. Wejxwa jxkaahsaíi yuuwaçaꞌ ewna, kxah iꞌkweꞌsx jxkaahnite kweꞌsxwa ih ũsyaꞌ ãjaꞌnjaꞌw sũjuꞌth. 9 Kweꞌsxaꞌ Jesus jxkaahnisathaꞌw nawa Dxusaꞌ nmejkhẽ neꞌ nvxiht sũjuꞌth, naasáa ikhwaꞌj nvxiitnisa naꞌwẽçxáathaꞌw. Kweꞌsx pxthaa yuuçxa uuçteꞌ, angelesweꞌsx vxiteꞌ nasawa thegkahn nasa walaa ksxavxyte nvxiitni naꞌwẽ ũsthaꞌw. 10 Kristo kaapiyaꞌjniꞌs ptaꞌsxpaꞌgaçxáa kweꞌsxtxiꞌ kĩhtewa jiimeesa luuku weꞌwesataꞌ jĩꞌtx, naapkaçxhaꞌ iꞌkweꞌsx yuꞌ Kristo kaapiyaꞌjniꞌs sxiigmée jxuka jiisa naꞌwẽ iꞌkwe yaakiꞌ. Kweꞌsxaꞌ ãhmeekwesathaꞌw, naapkaçxhaꞌ iꞌkweꞌsx yuꞌ jxtuhthesa iꞌkwe. Kweꞌsxtxiꞌ açeꞌtx nasaꞌ, nawa iꞌkweꞌsx yuutxiꞌ peeygãjaꞌtx. 11 Ãçxpkaçx pxthaa yuunathaꞌw fxiꞌzeꞌ, nasa ewmée nuyweꞌweni, wẽena, yũꞌwẽena, athwaꞌj ropa jiꞌphmée, yatwa jiꞌphmeethaꞌw, 12 saꞌ kuseju mjĩina wahtxnathaꞌw fxiꞌzeꞌ. Nasaꞌ kweꞌsxtxi wẽesxutewa, ewçxáathaꞌw pasuꞌ. Kweꞌsxtxi pkxuuna pãpaçtewa, wantãyçxa iideeweꞌçmeethaꞌw. 13 Kweꞌsxtxi açeweꞌweçtewa, kaꞌtuꞌ peeygãhnathaꞌw yuꞌkxpejeꞌ. Naa kiwete kxtãꞌ seelpimeesa naꞌwẽthaꞌw fxiꞌzeꞌ, kazxsaꞌs wãataani naꞌwẽthaꞌw yahçena fxiꞌzeꞌ ãçxpkaçx.

14 Iꞌkweꞌsx thaamekahn txãꞌwẽ fxiꞌjaçmeeth, wejxwa adx luuçx wedxnisa naꞌwẽ yuꞌkxpehnaçxáath fxiꞌjaꞌ. 15 Kristo jxkaahniꞌs kaapiyaꞌjsa diez mil maꞌkwe jiꞌph yuu, nawa ney naꞌwẽsa yuꞌ kuhmée jiꞌphiꞌkwe. Txãꞌwẽ Kristo Jesus yakh fxiꞌzewaꞌjaꞌs kaapiyaꞌphaꞌga iꞌkweꞌsx ney naꞌwẽsaꞌ adxthu. 16 Txãꞌwẽth iꞌkweꞌsxtxi neeweꞌweꞌ, adx naꞌwẽy fxiꞌzekahn.

17 Txãasa kajaçthu Timoteo adx nçxiꞌk wedxni naꞌwẽsa Kristo yakh txutemée fxiꞌzesaꞌs. Txãꞌ iꞌkweꞌsxtxi kaayakiꞌjina adx maꞌwẽ neꞌtka Kristo yakh fxiꞌze txãꞌsna. Saꞌ txãꞌwẽy mteeçxah Dxusaꞌs jiisa pkhaakhena ũstxna kxsũ pekũhçxaꞌ, maꞌwẽ neꞌtka kaapiyaꞌjaꞌ txãꞌsnaíiçxáa kaayakiꞌjina. 18 Iꞌkweꞌsx maaíi yuꞌ wala çxhãçxha iiwejçx yajkxna ũsiꞌkwe, Pabloꞌ bagaçx yuhwa paꞌjmeena jĩna. 19 Nawa Dxus maꞌwẽ jxthãasteꞌ, dud yuweꞌnja puutx uyyaꞌ, txãꞌwẽ iiwejçx weꞌwena ũssa kĩh maꞌtx yuu aan çxhãçxha weꞌwena ũsçxaꞌ, txãꞌwẽy Dxus yakhwa çxhãçxha fxiꞌzena ũstxna. 20 Dxus yakh fxiꞌzenisaꞌ yuwejuçxáa iiwejçx weꞌwena fxiꞌzenimeesaꞌ, wejxwa Dxus maꞌwẽ jxkaatheꞌ, kxtey yuuna fxiꞌzewaꞌjaꞌ. 21 Iꞌkweꞌsxtxi adx thegyaꞌ paꞌjçxaꞌ ¿maꞌwẽkwe yuu jxthãasuꞌ? ¿Peçxuukwe jxthãasukweꞌ, meeçxaꞌ peeygãhnakwe paꞌj jxthãasuꞌáꞌ?