1 Korintios

Peekx njĩꞌj npaasa yakh íiçxáa nyu naꞌwẽ fxiꞌzesa

5 Teeçx iꞌkweꞌsx yakh pkhaakhesaꞌ peekx njĩꞌj npaasa yakhíiçxáa nyu naꞌwẽ fxiꞌzena ũsaꞌ jĩnik yaꞌjiyuꞌ. Txãꞌwẽ fxiꞌzeniꞌ pkal iiméh wala kazxsaꞌ. Dxusaꞌs jiimeesa yuhwa txãꞌwẽ yuꞌ fxiꞌzeꞌçmeetaꞌ. 2 Txãꞌwẽ kazx pkal yuusaꞌs iꞌkweꞌsx ksxavxyu kutxiꞌjipkaçxte, ewsathaꞌw sũhna iiweeçxwaꞌjçxáꞌs iꞌkwe yaakiꞌ. 3 Adxaꞌ iꞌkweꞌsx yakh ih yuꞌ ũsmeeth, nawa adx ũus yaakxni yakh yuꞌ iꞌkweꞌsx yakh ih ũsthu. Txãasath txãa piçthẽꞌj maꞌwẽsatewa jiyuçxaꞌ, kastigãywaꞌtheyãꞌj nvxiht, adx ũus yaakxni yakhçxáawa. 4 Iꞌkweꞌsxaꞌ Jesukristoꞌs neeweꞌweçxa txajx dxiꞌpte mpuutxweꞌwewe pkhaakheçxa. Açaꞌ adxwa iꞌkweꞌsx yakh ih ũs naꞌwẽyçxáa puꞌçxhiꞌnja, açaꞌ Jesukristowa iꞌkweꞌsx yakh ih ũsuna. 5 Txãꞌwẽ yũuçxa txãa piçthẽꞌjaꞌs eçxthẽꞌj kusete manvxihtwe, txajx kakweꞌ vxitukahn. Nawa txajx ũus yuꞌ vxitumeena Jesukristo kĩi enteꞌ.

6 Iꞌkweꞌsxaꞌ txãꞌwẽ kazx pkal yuusaꞌs kutxiꞌjmée ũsçxaꞌ, iiwejçx yajkxna ũswaꞌj jiꞌphmeeiꞌkwe. Jiimeewáꞌkwe naꞌwẽ weꞌweniꞌs: Lewaduraꞌ leꞌçxkuẽeçxawa skuutxh ũꞌwete jxuka pẽethejeꞌk jĩniꞌs. 7 Lewadura ewmeesaꞌs mkuutxiꞌjwe pẽethekahmen, kxah iꞌkweꞌsxaꞌ Paskua fxiestate ũꞌnisa pan lewadura jiꞌphmée naꞌwẽ yuuneꞌkwe. Txãꞌwẽ pkal jiꞌphmée fxiꞌzekahnku Kristoꞌ kweꞌsx paꞌgate uu, txãꞌ kweꞌsx Paskuateweꞌsx piisxakuẽk yuꞌ. 8 Txãꞌwẽyãꞌtheꞌ, kweꞌsx ũuste kĩh yuhwa ewmeesa jiꞌphmée Dxusaꞌsçxáa ũusuh jxuka yajkxna kweꞌsx Paskua fxiestaꞌs vxitwaꞌj jiꞌpthaꞌw. Txãꞌwẽ ew yajkxna vxitniꞌ, pan lewadura jiꞌphmeesa yakh fxiestaꞌs vxitni naꞌwẽsaꞌ. Nawa ewmée yajkxna Paskua fxiestaꞌs vxitwaꞌj jiꞌphmeethaꞌw. Txãꞌwẽ ewmée yajkxna vxitniꞌ, lewadura ewmeesa yakh fxiestaꞌs vxitni naꞌwẽꞌ.

9 Nyafxíi vxite karta fxiꞌth txãateꞌ naꞌwẽth yũukaah: Kazx pkal yũuna fxiꞌzesa yakh pkhaakhenuwe jĩnath fxiꞌj. 10 Txãꞌwẽ kazx pkal yũuna fxiꞌzesa yakh, vxitee jĩitx kusaꞌj wẽesa, pesweesa, dxus ĩtximeesatx neeweꞌwesa txãaweꞌsx yakhaꞌ jxukate mtxuteewe peena yuꞌ puutx uymée fxiꞌzeyaꞌ jĩçxa txãꞌwẽ weꞌwemeeth. Txãaweꞌsx yakh puutx uyyaꞌmée txutee wẽeçxaꞌ, naa kiwejũ kasehçxa yuuçxáa txãꞌwẽ peena yuꞌ puutx uymeeneꞌkwe. 11 Naꞌwẽth yũukaah txãꞌsna neꞌkwe jiyumée: Maawa yakhthẽꞌthaꞌw jĩççxawa, kazx pkal yũuna, vxitee jĩitx kusaꞌj wẽesa maꞌk yuu, dxus ĩtximeesatx neeweꞌwesa maꞌk yuu, açeweꞌwena wẽesxuusáa maꞌk yuu, tũusáa maꞌk yuu, meeçxaꞌ pesweesa maꞌk yuu, txãꞌwẽ yũuna fxiꞌzesaꞌs iꞌkweꞌsx ksxavxyte jxpeꞌjnuwe jĩnaçxáath weꞌwena fxiꞌj. Nasa txãꞌwẽsaꞌs iꞌkweꞌsx yat-su piꞌkxwaꞌjmeꞌ, açaꞌ kaꞌtuwa piꞌkxmeena. 12 5:12-13 Dxusna jiimeesatxiꞌ txãaweꞌsx maꞌwẽ yũusaatewa adxaꞌ txãatxiꞌ paapẽjxna kastigãywaꞌj jiꞌphmeeth. Dxusçxáa kastigãywaꞌjsaꞌ txãaweꞌsx ãhmée yũusaatxiꞌ. Nawa iꞌkweꞌsx ksxavxyte ũssa yakhthẽꞌjweꞌsx ãhmée yũuni yuꞌs iꞌkweꞌsx paapẽywaꞌjsaiꞌkwe. Txãasa txãa kazx pkal yũusaꞌs iꞌkweꞌsx ksxavxyu mkuutxiꞌjwe. 13 —