QUESTION 7
Wetin I Go Do if Person Dey Worry Me Make I Sleep With Am?
WETIN YOU FOR DO?
Just think am sey: Heather and Mike don sabi theirself for only two months, but Heather dey feel like sey e don tey well well wey e know Mike. Dem dey always send text message to theirself, dem dey talk tey for phone, and before this one talk finish the other one go help am finish am! But Mike want make e pass like that.
For that two months, na only to hold hand and kiss small dem dey do. Heather no want make e pass like that. But e no want make Mike vex leave am, because na only Mike dey tell am sey e fine well well, and this one dey make im head big. No be only that one o, e don already tell imself sey, ‘Me and Mike don fall in love . . .’
If to sey you be Heather and you don old reach to marry, wetin you go come do?
WAIT! THINK AM WELL
God want make only people wey don marry dey sleep together. If you sleep with person before you marry, you go be like person wey use the fine cloth wey person dash am take do rag
If person climb big tree, come dey think sey e go fly like bird come down, e go wound. Na so e be for person wey no follow wetin Bible talk, like the one wey dey 1 Thessalonians 4:3—wey talk sey: ‘Comot hand for all sex matter wey no clean for God eye.’
Wetin go happen if we no follow wetin that place talk? Bible talk sey: ‘Run from all sex matter wey no clean for God eye! All other sin wey person dey do na outside im body, but anybody wey dey put hand for sex wey no clean for God eye dey sin against e own body.’ (1 Corinthians 6:18) How that one take be true?
People wey dey do research don see sey many young people wey sleep with person before dem marry dey suffer am. Some of the things wey dem dey suffer na:
PAIN FOR MIND. Many young people wey don sleep with person before dem marry later sey dem for no do am.
NO TRUST. When dem don sleep with thierself finish, two of dem go come dey suspect theirself. And this one go come make dem dey think for their mind sey, ‘which other person e don even sleep with?’
WETIN DEM FOR LIKE. Girls really want person wey go protect dem, no be person wey go use dem. And wetin many boys dey like pass na girls wey no gree for dem quick.
Na the truth be this: If you sleep with person before you marry, you don throwey something wey dey important well well (Romans 1:24) Your body too dey important for you to just throwey am like that!
Show sey you get better character if you ‘comot hand from all sex matter wey no clean for God eye.’ (1 Thessalonians 4:3) If you marry, you go fit sleep with the person wey you marry. You go fit enjoy am well well, that time you no go dey worry, fear or dey regret as e for be if you sleep with person before you marry.—Proverbs 7:22, 23; 1 Corinthians 7:3.
WETIN I PLAN TO DO?
Any person wey really love you go like to scatter your life?
Any person wey really love you go want make you do wetin God no like?—Hebrews 13:4.