Jehovah Dey Help Us No Matter Our Problem

1, 2. How Jehovah take dey help us anytime wey we get problem, and wetin Bible talk sey Jehovah get for mind for us?

E DON tey wey one young brother, wey never marry, dey think about wetin dey 1 Corinthians 7:28. That place talk sey, ‘People wey marry go get problem’ for this life. E come go meet one elder wey im name na Stephen. The elder don marry and e senior am. E ask am sey, ‘Wetin be this “problem,” and how I go take manage am if I marry?’ Before Stephen answer the brother question, e first tell am make e think about another thing wey apostle Paul talk for Bible. E talk sey, Jehovah ‘the God wey dey make our mind come down, dey help us anytime wey we dey wahala [‘problem,’ ftn.].’​—2 Cor. 1:3, 4.

² True true, Jehovah na our Father, and e love us. E dey help us when we dey face problem. You remember how Jehovah don use Bible help you before? Before our time, Jehovah show sey na better thing e get for mind for im servant. So, we dey sure sey e still get that kind mind for us today.​—Read Jeremiah 29:11, 12.

3. Which question we go answer for this topic?

³ When we know wetin dey cause our problem, e no go hard us to bear. Na so e still be for people wey don marry or wey don start to get children. When dem know wetin dey cause their problem, e no go hard dem to bear. So, wetin be some things wey fit cause ‘problem’ for marriage? Which example for Bible time and our time fit help us? The answer go help us know how to bear problem for marriage.

PROBLEM FOR MARRIAGE

4, 5. Wetin be some things wey fit cause problem for marriage?

⁴ After God make the first woman for garden of Eden, e carry am give Adam as wife. God come talk sey: ‘Man go leave im papa and mama and e go dey with im wife, and two of dem go be one flesh.’ (Gen. 2:24) But, because all of us get sin for body, we fit get problem when we marry. (Rom. 3:23) For example, before many women marry, na wetin their papa and mama talk dem dey follow. But after dem marry, na wetin their husband talk dem go do. Na so because God talk sey na man be head of the woman. (1 Cor. 11:3) This one fit no easy for people wey just marry. Their in-law fit come get quarrel with dem. And this kind thing fit cause problem for people wey just marry.

⁵ Sometimes, even if husband and wife dey happy sey the wife don get belle, small fear fit still dey. For example, dem fit dey fear because of the problem wey fit come when woman get belle, when e dey born, or after e don born. And now, dem go spend money pass before. Some things go still change when the pikin don land. Wetin go dey the woman mind pass, na to take care of the pikin. E fit no too get time for im husband like before. The husband fit dey feel sey the wife no get im time again. And because the man don be papa, more work don come for am. E go need to take care of wife and pikin.

6-8. If pikin no come, how husband and wife wey want get pikin dey feel?

⁶ E get another problem wey some people dey face for marriage. Dem really want pikin, but pikin no come. E fit pain the woman reach bone when e no fit get belle. Na true sey, when person marry and start to get children, problem go dey. But, the kind problem wey woman dey face when e no fit get belle, no be here! (Prov. 13:12) For example, for Bible time, na shame if woman no fit get belle. No wonder, when Rachel no fit born pikin like im sister, body come dey pepper am. (Gen. 30:1, 2) Today, for country wey people like to born plenty pikin, e no easy for missionary wey dey there. People go dey ask dem why dem no get pikin. No matter how the missionary try explain reach, some people go still sey, ‘Na wa oh! We go pray for una!’

⁷ Make we still talk about one sister for England. The sister really want pikin, but pikin no gree come. E come reach the age wey e no fit born pikin again for this life. This one pain am well well. Im and im husband come agree to go carry pikin. But, the sister sey: ‘E still pain me for some time. I know sey to born my own pikin and to carry another person pikin as my own, no be the same thing.’

⁸ Bible talk sey, ‘God go save woman when e don born pikin.’ (1 Tim. 2:15) But this one no mean sey na when person get pikin, e go enter paradise. Instead, e mean sey, if the woman get pikin to take care of, plus other house work, e fit no get time do amebo. E fit no still get time to put mouth for matter wey no concern am. (1 Tim. 5:13) But e fit still get problem for marriage, and when e start to get pikin.

9. Which other problem people wey don marry fit get?

⁹ When we dey talk about problem for marriage, e get the one wey no dey quick come person mind. Na when the husband or the wife die. The man or the woman fit no get am for mind sey that kind thing go happen. The truth be sey, e don happen to many people today. But we believe wetin Jesus promise about resurrection. (John 5:28, 29) If our husband or wife die, that promise go really make our mind come down. This one na one way wey Jehovah take dey use Bible help us when we dey problem. Make we come talk about how Jehovah help some of im servant for Bible. We go see how this one take make their mind come down.

JEHOVAH DEY HELP US WHEN PROBLEM DEY

10. Wetin make Hannah mind come down? (Go check the first picture.)

¹⁰ Hannah na Elkanah wife, and Elkanah love am well well. But Hannah dey face one problem. E no get pikin. But Elkanah other wife, wey im name na Peninnah, get many children. (Read 1 Samuel 1:4-7.) Na ‘every year’ Hannah dey suffer for Peninnah hand. This one really pain Hannah reach bone. Wetin come make im mind come down? E put the matter for Jehovah hand. Bible sey, ‘Hannah pray to Jehovah, and the prayer tey.’ E believe sey Jehovah go help am. Na im make ‘e no come dey worry again.’ (1 Sam. 1:12, 17, 18) E believe sey if Jehovah no give am pikin, Jehovah go do another thing wey go make im mind come down.

11. How prayer fit make our mind come down?

¹¹ Satan still dey control this world and sin dey our body. Because of this one, we go continue to get problem. (1 John 5:19) But e sweet us sey, Jehovah ‘dey make our mind come down’! How e take dey do am? One way, na when we pray to am if we get problem. Na wetin Hannah do be that. E tell Jehovah how e dey feel for inside and e beg am. So, when we dey problem, make we no only tell Jehovah the problem. We need to still tell am how we dey feel, and beg am to help us.​—Phil. 4:6, 7.

12. Wetin make Anna mind sweet am, even with im problem?

¹² If person no fit born pikin or im person die, life fit no sweet am. But im mind fit still come down. For example, e get one woman for Jesus time wey im name na Anna. Na prophet e be. Im husband die after two of dem don stay together as husband and wife for seven years. Bible no tell us whether Anna get any pikin. So wetin help am? Luke 2:37 talk sey: ‘E dey always go temple. E dey fast and e dey pray well well. Na so e take dey worship God for there day and night.’ Yes, na wetin Anna do be that even when e dey 84 years. This one make im mind come down. Im mind come dey sweet am as e dey serve Jehovah.

13. Which example show sey brothers and sisters fit help us, even when our family person no dey to help us?

¹³ Another thing wey fit make our mind come down, na when we dey draw body near brothers and sisters. If we do like that, we go see sey dem love us and dem be our friend. (Prov. 18:24) For example, one sister wey im name na Paula, dey five years when im mama leave Jehovah. E pain Paula well well. E no easy for am to bear this kind problem. But after some time, im mind really come down when one sister draw am near body. The sister name na Ann and na pioneer for Paula congregation. Na Ann come dey help Paula so that e fit continue to serve Jehovah. Paula talk sey: ‘Even though Ann no be my family person, e do wetin show sey im love me. Na wetin help me continue to serve Jehovah be that.’ Now, Paula still dey serve Jehovah well. And e happy well well sey, im mama don start to serve Jehovah again. Belle still sweet Ann because e help Paula hold Jehovah tight.

14. When we dey help people, which better thing we fit get?

¹⁴ When we dey do better things for people, we no go too put mind for our problem. For example, our sisters know sey when dem dey go preaching, dem dey follow Jehovah work. This one dey make dem happy well well, whether dem don marry or dem never marry. Their own na to do wetin Jehovah want, to show sey dem respect am. Some of dem dey even like to go preach when dem get problem. Na so because e dey make their mind come down. The truth be sey, love go dey congregation when we dey help our brothers, and when we dey go preaching with dem. (Phil. 2:4) Make we do like apostle Paul. E love the brothers and sisters for the congregation wey dey Thessalonica. Paul come be ‘like mama wey dey take care of im children.’ And because of how e take dey help dem serve God, e still be like their papa.​—Read 1 Thessalonians 2:7, 11, 12.

THINGS WEY FIT HELP FAMILY

15. Who suppose dey teach children Bible?

¹⁵ E good to think about how we fit help different family for congregation. Sometimes, new person for congregation fit tell us make we help their children sabi Bible. Dem fit even sey make we dey study the children. Bible talk sey na papa and mama suppose dey teach their children about Jehovah. (Prov. 23:22; Eph. 6:1-4) If we help dem sometimes, e go make dem happy. But, e no mean sey make dem leave their work for other people. Na their work to train their pikin. So, make dem dey follow dem talk everytime.

16. When we dey study children, wetin go dey our mind?

¹⁶ If papa or mama sey make you dey study Bible with their children, abeg, no chance dem for their work. Sometimes, the papa and mama fit no be Jehovah Witness. If na we get that kind study, e good make we do the study when the papa and mama dey house. E fit still be when another brother or sister dey with us, or for open place. E good like that, so that people no go come reason another thing. As time dey go, the papa and mama go fit dey teach their pikin about Jehovah.

17. How children fit help their family?

¹⁷ If young people love Jehovah and dem learn to do wetin e like, dem fit help their family. How? Make dem respect their papa and mama, and make dem dey support dem. And if dem continue to serve Jehovah, dem fit help their family get strong love for Jehovah. For example, Lamech wey come from Seth family, serve Jehovah. Before God destroy the world for Noah time, e talk something about im pikin wey be Noah. E sey: ‘Because Jehovah curse the ground, we dey do hard work sotey our hand dey pepper us. But Noah go make our mind come down.’ Wetin Lamech talk happen after Jehovah destroy the earth with water. Na that time e remove the curse. (Gen. 5:29; 8:21) Today, children wey dey do wetin Jehovah want, fit make their family mind come down. Dem fit help their family bear any problem wey dem dey face now, or the one wey dey come.

18. Wetin fit give us mind to bear any problem?

¹⁸ Today, even when problem dey, many people mind dey come down. Wetin dey help dem? (1) Dem dey pray, (2) dem dey copy other people example for Bible, and (3) dem dey draw body near brothers and sisters for congregation. (Read Psalm 145:18, 19.) Na only Jehovah fit do wetin go make our mind come down. Na im fit end our problem. When we remember this one, we go get mind to fit bear any problem​—whether we dey face am now, or we go face am for front.