Continue to Dey Allow God Spirit Direct You!

1, 2. Wetin one brother see sey dey miss for im life, and wetin e come do about am?

E GET one brother wey baptize when e dey 15 years. Im name na Robert. E no take the truth wey e learn from Bible serious. The brother sey: “I no dey do any bad thing. I dey serve Jehovah but my mind no really dey. If person see me, e go think sey I near Jehovah well well, because I dey always go meeting, and I dey auxiliary pioneer sometimes. But I know sey something dey miss for my life.”

² Robert no know wetin be the problem until e marry. This brother and im wife come dey use their free time ask each other question from Bible. Robert come see sey e no dey hard im wife to answer the question. But shame dey always catch Robert because e no dey fit answer the question. E sey: “E just be like sey I no know anything. I come tell myself sey, ‘If I want be better husband wey go help my family serve Jehovah, I need to do something.’” Wetin Robert come do? E talk sey: “I come dey study Bible well well, and I no stop. I learn many things from Bible, and I understand wetin I dey learn. But the one wey better pass be sey, I come near Jehovah more more.”

3. (a) Wetin we fit learn from Robert story? (b) Wetin be the three main question wey we go talk about for this topic?

³ We fit learn better things from Robert story. We fit know some things for Bible and dey always go meeting, but no be only this things go make us near Jehovah more more. Or e fit be sey we don dey do things wey show sey we dey serve Jehovah well. But if we look ourself well, we go see sey e get wetin we fit still do to near Jehovah more more. (Phil. 3:16) For this topic, we go answer three main question wey go help us continue to near Jehovah. (1) Wetin go help us check how our friendship with Jehovah be? (2) Wetin go help us get strong faith and continue to dey near Jehovah? (3) If our friendship with Jehovah strong, how e go take help us for our life?

MAKE WE CHECK OURSELF

4. Who the advice for Ephesians 4:23, 24 concern?

⁴ When we start to learn about Jehovah, we change many things for our life. And even after we baptize, we still continue to dey change our life. Bible tell us sey make we “continue to dey change” how we dey think. (Eph. 4:23, 24) Since all of us dey make mistake, e good make we continue to check ourself to know where we need to do well. Even if e don tey wey we start to serve Jehovah, we still need to do things wey go make our friendship with am tight.​—Phil. 3:12, 13.

5. Which question go help us check ourself?

⁵ If we want near Jehovah more more, and if we want make im spirit continue to dey direct us, we need to check ourself well. Whether we be young person or old person, e good make all of us ask ourself sey: ‘E get things wey I don dey change for my life to show sey I dey do wetin I fit do to near Jehovah more more? My character don dey resemble Jesus own? The way my mind be and the way I dey behave for meeting dey show sey my friendship with God tight? Wetin the things wey I dey talk with people dey show about wetin dey my mind? Which kind person my dress and my style of hair dey show sey I be? I dey study Bible well? How I dey behave if person advice me? Wetin I dey do when temptation come? My faith for Jehovah don strong pass as e be before?’ (Eph. 4:13) Our answer to this question go help us know how our friendship with Jehovah strong reach.

6. Wetin fit still help us know how our friendship with Jehovah strong reach?

⁶ Sometimes, other people fit still help us know how our friendship with Jehovah strong reach. Apostle Paul talk sey person wey dey allow im body control am no dey know sey Jehovah no like wetin e dey do. But person wey allow God spirit dey direct am know how Jehovah dey feel. E know sey Jehovah no like am if person dey do wetin im body want. (1 Cor. 2:14-16; 3:1-3) Because elders dey try to think like Jesus, e no dey hard dem to know person wey don dey allow im body control am. If dem tell us sey we don dey behave like that, we go take their advice, and do wetin dem talk? If we do like that, e go show sey we ready to near Jehovah more more.​—Eccl. 7:5, 9.

NEAR JEHOVAH MORE MORE

7. Why e be sey to just know Bible no fit help us be Jehovah friend?

⁷ No be just to know Bible go help us be Jehovah friend. For example, King Solomon know many things about Jehovah. And some things wey e talk na part of wetin dey Bible. But Solomon later stop to dey serve Jehovah well. (1 Ki. 4:29, 30; 11:4-6) So apart from the things wey we know for Bible, which other thing go help us near Jehovah? We need to dey do wetin go make our faith strong. (Col. 2:6, 7) But how we go take do am?

8, 9. (a) Wetin we go do so that our faith go strong more more? (b) Wetin suppose dey our mind when we dey study and when we dey think about wetin we don learn? (Go check the first picture.)

⁸ Paul tell brothers and sisters for im time sey make dem become “mature” Christian. (Heb. 6:1) How we fit follow wetin Paul talk today? One better way na to study “Keep Yourselves in God’s Love” book. If you study this book finish, e go help you see how you go fit follow wetin Bible talk for your life. If you don already study this book finish, e get other books wey go make your faith strong. E good make you study dem. (Col. 1:23) E still good make you pray to Jehovah make e help you do the things wey you dey learn.

⁹ We want do wetin Jehovah like and we want obey im law. Na this one suppose dey our mind when we dey study, and when we dey think about wetin we don learn. (Ps. 40:8; 119:97) But we still need to comot hand from anything wey no go make us continue to be Jehovah tight friend.​—Titus 2:11, 12.

10. Wetin young people fit do to near Jehovah more more?

¹⁰ If you be young person, you don plan wetin you want use your life do for Jehovah? Before assembly start, one brother wey be Bethelite dey always talk with young people wey want baptize. The brother dey ask dem about wetin dem plan to do for Jehovah. Many of dem plan to do more for Jehovah. Some of dem want enter full-time service, or dem want pack go do Jehovah work for area wey need more publishers. But sometimes, some of dem no even know wetin dem want use their life do for Jehovah. Why e be like that? E fit be sey dem never get any plan for mind. If you be young person, e good make you ask yourself sey: ‘I dey go meeting and preaching just because my papa and mama want make I go? I dey near Jehovah more more, and I dey make my friendship with am tight?’ The truth be sey, all of us need to get things wey we plan to do for Jehovah, no be only young people. This one go help us near Jehovah more more.​—Eccl. 12:1, 13.

11. (a) If we want be Jehovah tight friend, wetin we need to do? (b) Which person example for Bible we fit copy?

¹¹ If we see sey e get some things wey we no dey do well, e good make we do something about am. Na better thing for person to allow God spirit direct am. Why e be like that be sey, na life and death matter. (Rom. 8:6-8) If person be Jehovah friend, e no mean sey e no go fit make mistake. Jehovah holy spirit go fit help us continue to do well. But we still need to do everything wey we fit do to help ourself. Brother John Barr wey be Governing Body member before e die, talk something about wetin dey Luke 13:24. E sey, ‘For person faith to strong, e need to dey study well and do wetin e learn. Because many people no dey do this one, dem don fall.’ All of us need to be like Jacob wey struggle with angel until the angel bless am. (Gen. 32:26-28) To study Bible dey sweet well well. If we want enjoy am, make we no dey read am like person wey dey read novel, just because e want read am. Instead, we need to study am well so that we fit see better things for inside wey go help us.

12, 13. (a) Wetin go help us do wetin dey Romans 15:5? (b) Wetin we fit learn from apostle Peter example, and from the things wey e talk? (c) Wetin you fit do to near Jehovah more more? (Check the box “Things Wey You Fit Do to Near Jehovah More More.”)

¹² As we dey try to near Jehovah more, holy spirit go dey help us change the way we dey think. Small small, we go come start to dey think like Jesus. (Rom. 15:5) Holy spirit go still help us trowey any bad thing wey dey our mind, and e go help us get better character wey God like. (Gal. 5:16, 22, 23) If we check ourself, we fit see sey we too dey think of money and property, or we dey always want do wetin our body want. Even if e dey do you like that, make you no tire. Continue to beg Jehovah make e give you holy spirit, and Jehovah go help you put mind for better things. (Luke 11:13) Remember sey, sometimes, apostle Peter no behave like person wey God spirit dey direct. (Matt. 16:22, 23; Luke 22:34, 54-62; Gal. 2:11-14) But e no tire for imself, and Jehovah help am. Small small, Peter come start to dey think like Jesus. Like Peter, Jehovah fit still help us to think like Jesus.

¹³ Peter later talk some things wey go help us. (Read 2 Peter 1:5-8.) Make we dey try do everything wey we fit do to dey get better character like, to dey control ourself, to dey endure, and to love our brothers and sisters. This one go help us continue to be Jehovah friend. Everyday, e good make we dey ask ourself sey: ‘Wetin I fit do today, wey go make me near Jehovah more more?’

DEY FOLLOW WETIN BIBLE TALK FOR YOUR LIFE

14. If we dey think like Jesus, how e go take show for our life?

¹⁴ If we dey think like Jesus, e go show for how we dey talk, and how we dey behave for work or for school. E go still show for the things wey we dey choose everyday. If we dey choose better things, e go show sey we dey copy Jesus. Because we dey think like Jesus, we no want make anything scatter our friendship with God. If we dey think like Jesus, when temptation come, we no go want fall put. And before we choose wetin we want do, e good make we wait and think about question like: ‘Wetin Bible talk wey go help me choose well? If na Jesus, wetin e go do for this matter? Wetin I want choose go make Jehovah happy?’ Make we try to dey ask ourself this kind question everytime before we choose wetin we want do. We go talk some example of how we fit do this one for our life. For all the example, we go see advice for Bible wey fit help us choose well.

15, 16. If we dey think like Jesus, how e go take help us choose (a) who we go marry? (b) who go be our friend?

¹⁵ When we want choose who we go marry. Wetin Bible talk for this matter dey for 2 Corinthians 6:14, 15. (Read am.) Paul talk sey person wey get God spirit dey different from person wey no get am. And the way dem dey see things dey different. How we fit follow this advice when we want choose who we go marry?

¹⁶ When we want choose friend. The advice for Bible wey fit help us dey 1 Corinthians 15:33. (Read am.) Person wey value im friendship with God no go follow people wey fit make am stop to be Jehovah friend. Think about how you fit follow wetin this Bible verse talk. For example, how this advice fit help you if you dey make friend for internet? Or if person wey you no know tell you sey make you follow am play game for internet, wetin you suppose do?

17-19. If you dey think like Jesus, how that one go take help you (a) no put hand for things wey no go make you near Jehovah? (b) plan wetin you go use your life do for Jehovah? (c) to settle problem?

¹⁷ Things wey fit scatter our friendship with Jehovah. One serious warning dey for the letter wey Paul write give some Christians for im time. (Read Hebrews 6:1.) Wetin be the “useless things” wey we no go put hand? Na anything wey person dey do wey no fit make am near Jehovah. Wetin this Bible verse talk fit help us answer question like: ‘This thing wey I want do so, I go gain from am or na waste of time? If I see work or business wey go bring plenty money, I go quick collect am? Why e no good make I join people wey believe sey dem go fit change things wey dey happen for the world?’

¹⁸ Things wey you want use your life do for Jehovah. Wetin Jesus talk for the Sermon on the Mount show sey we suppose get things wey we plan to do for Jehovah. (Matt. 6:33) Person wey dey think like Jesus dey put God Kingdom as the number one thing for im life. Wetin Jesus talk fit help us answer question like: ‘Make I go university? Make I collect this work wey I see?’

¹⁹ When we get problem with our brothers. The advice wey Paul give the brothers for Rome fit help us when we get problem with our brothers. (Rom. 12:18) As people wey dey follow Jesus example, e good make we dey try to “make peace with everybody.” So when you get problem with your brothers and sisters, wetin you dey do? You ready to take wetin other people dey talk? Dem know you as person wey dey do everything to make sure sey peace dey?​—Jas. 3:18.

20. Why you want make God spirit continue to direct you?

²⁰ This one na just some example of how Bible fit help us choose better thing, like person wey God spirit dey direct. If we dey think like Jesus, we go happy and our life go make sense. Robert, wey we talk about before, talk sey: “After I don dey near Jehovah well well, I come be better husband and better papa. I come happy and belle really sweet me.” If we do everything wey we fit do to allow God spirit direct us, we go gain like this brother. People wey be Jehovah friend dey live better life now, and for front, dem go get “the real life.”​—1 Tim. 6:19.