Young People No Fear, Fight Satan and Win!

1, 2. (a) Why young people de fight and win Satan and the demons? (Check the first picture.) (b) Wetin we go learn for this topic?

APOSTLE PAUL talk say Christians de fight war like soldier. But no be people we de fight, na Satan and the demons. Satan and the demons really sabi fight and no be today they start to fight. When we hear this one, e just be like say we no fit win them, especially young people. How young people fit win this demons? The truth be say, young people fit win, and them de win already! How manage? Because Jehovah de give them power. Which other thing de help them? Them dress and ready to fight like soldier. Bible talk say they “wear the complete soldier uniform wey God de give.”​—Read Ephesians 6:10-12.

² When Paul use that example, e fit be say e de think about the way Roman soldier de dress. (Acts 28:16) Make we see why that example really correct. We go still learn wetin some young people talk about this two things: (1) Why e no easy to wear any part of the dress wey Paul talk about, and (2) how person go gain if e wear-am.

THE BELT WEY BE TRUTH

3, 4. How truth for Bible be like the belt wey Roman soldiers de wear that time?

³ Read Ephesians 6:14. The belt wey Roman soldiers de wear that time get iron. This iron de protect their waist. And e de help to support the weight of the iron wey the soldier wear for chest. Some other belt still get one strong thing to hold sword and knife. Because the belt tight for waist, the soldier fit get strong heart when e go fight.

⁴ Na the same thing with the truth wey we de learn from Bible. This truth de protect us from the lie wey Satan de teach. (John 8:31, 32; 1 John 4:1) And as our love for the truth de grow, e go easy to wear the iron for chest wey Paul talk about. This one mean say e go easy to live our life the way God want because of our love for the truth. (Ps. 111:7, 8; 1 John 5:3) Another thing be say, when we really understand the truth for Bible, we go fit give correct answer to people wey they no like the truth.—1 Pet. 3:15.

5. Why e good make we de always talk true?

⁵ When the truth for Bible dey tight for our waist like belt, we go fit follow wetin Bible talk. And e go still help us de talk true everytime. Why e no good make we lie? Because lie na one of the things wey Satan don de use fight, and e de work for Satan. Lie de cause problem for who talk the lie and who believe-am. (John 8:44) So even as we get sin for body, we de try our best make we no de lie. (Eph. 4:25) But e no easy. Abigail na one young girl, e dey eighteen years and e talk say: “Sometimes, e be like say to talk true no make sense, especially if lie fit free person from trouble.” But why Abigail de always try to talk true? E talk say: “Anytime wey I talk true, my conscience no de judge me because I know say Jehovah de happy. My papa, my mama, and my friends fit trust me.” Another sister na Victoria. E dey 23 years and e talk say: “When you tell people the truth and you no shake for wetin you believe, people fit give you trouble. But plenty gain dey: Your heart go strong pass before, you go near Jehovah more, and people go respect you.” True-true, e good to “tie truth for waist like belt” everytime.

RIGHTEOUSNESS—THE IRON FOR CHEST

6, 7. Why the advice wey Jehovah de give dey like the iron wey soldier de wear for chest?

⁶ One type of iron wey Roman soldiers de wear for chest that time, get plenty iron wey they join ontop each other. They bend the iron so that e go cover their chest. And the iron get leather with plenty iron hook and buckle. Na this hook and buckle de tie the iron together. They still add iron to cover the shoulder and tie them together with leather. This iron wey the soldiers de wear for chest de make their body no too dey free. And they go still de check the iron whether e still dey as they arrange-am for their body. This iron de protect the heart, or other important part for body, make sword or arrow no touch-am.

⁷ This iron for chest na correct example. E really show how the advice wey Jehovah de give us de protect our heart, or who we really be inside. (Prov. 4:23) Soldier no de remove the strong iron for e chest, and wear another iron wey no strong. So we no go leave wetin Bible talk and de do things our way. Na so because the way we de think no fit protect us reach the advice wey Jehovah de give us. (Prov. 3:5, 6) Na e make we suppose de check everytime whether we still de follow wetin Bible de teach us.

8. Why e good make we de follow the laws wey Jehovah de give us?

⁸ You de feel sometimes say the laws wey Jehovah de give too heavy for you, or they no de allow you do things wey you like? Daniel na one young brother and e dey 21 years. E talk say: “My teachers and schoolmates de laugh me because I de do wetin Bible talk. E really make-am hard me to do wetin Jehovah want, and this one no make me happy.” Wetin help Daniel? E talk say: “I come see say e good to follow the advice wey Jehovah de give. Some of my friends begin take bad drugs, some even stop school. See how their life come be! Jehovah de really protect us.” Madison na one young sister and e dey 15 years. E talk say: “I de struggle to follow the advice for Bible. And e no easy for me make I no do things wey other young people like to do.” Wetin de help Madison? E talk say: “I de remind myself say I be Jehovah Witness and say temptation na one of the way Satan de use attack me. I de happy when I win any fight.”

‘READY YOUR LEG TO TELL PEOPLE THE GOOD NEWS OF PEACE’

9-11. (a) Which shoe Bible say make we wear? (b) Wetin we fit do so that preaching no go de hard us?

⁹ Read Ephesians 6:15. Roman soldier no de go war when e no wear e shoe. That time, their shoe be like sandal and e get three part. They make this three part with leather. This one make the shoe strong, and e de help the soldier make e no fall when e de waka.

¹⁰ The shoe wey Roman soldiers de wear de help them for war. Na so the shoe wey apostle Paul say make we wear de help us tell people the good news of peace. (Isa. 52:7; Rom. 10:15) But we need to get strong heart to preach when the chance come. Bo na one brother and e dey 20 years. E talk say: “Before, I de fear to preach to my classmates. I de shame that time. But now, when I think about-am, I no know why l even de shame. Now l de enjoy to tell other young people the good news.”

¹¹ Plenty young people don see say e de easy to preach when they prepare wetin they go talk. How you fit prepare yourself? Julia na one young sister and e dey 16 years. E talk say: “I de put our books inside my schoolbag. And when my classmates de talk about their own belief and wetin they think, I go listen. Then I go fit think which thing go help them. When I prepare, I fit tell them wetin go really benefit them.” Makenzie na another sister, e dey 23 years. E talk say: “If you like people and you sabi listen to wetin them de talk, you fit understand wetin other young people de face. I de try make I read all our books wey they write for young people. When I do like that, I fit help other young people with something for Bible or jw.org.” As we don hear, e show say the more you prepare well to preach, the more the “shoe” go balance for your leg.

FAITH NA THE BIG SHIELD

12, 13. Wetin be some arrows wey Satan de use shoot us?

¹² Read Ephesians 6:16. “The big shield” wey Roman soldier de use, de cover e body from shoulder go reach knee. The shield na four corner. E de protect soldier make sword, spear or arrow no touch e body.

¹³ Satan de shoot us with some ‘arrows wey e get fire.’ E fit lie say Jehovah no love you and e no fit love you. One young sister feel like that, e name na Ida and e dey 19 years. E talk say: “Before, I de feel say Jehovah no near me and e no want be my Friend.” Wetin de help this sister? E talk say: “Our meeting de make my faith strong more-more. Before, I no de ever give any answer for meeting because I think say nobody go want hear wetin I talk. But now, I de prepare before I go meeting, and I de try answer two or three question. E no easy, but I de happy when I do-am. And brothers and sisters don really help me. Anytime wey I come from meeting, I no de doubt say Jehovah love me.”

14. The example about Ida show wetin about our faith?

¹⁴ The shield wey Roman soldier de use no de big pass as they make-am. But the example about Ida show say, our faith fit weak or e fit strong pass as e dey. Na we go choose which one we want. (Matt. 14:31; 2 Thess. 1:3) So, e really good make we de make our faith strong.

“THE HELMET WEY GO SAVE” US

15, 16. Wetin make our hope be like helmet?

¹⁵ Read Ephesians 6:17. The helmet wey Roman soldier de wear de protect their head, neck and face. Some of the helmet get handle so that the soldier fit hold-am for hand.

¹⁶ Our hope as Christian de protect our mind, just as helmet de protect soldier for head make something no nack-am. (1 Thess. 5:8; Prov. 3:21) Our hope de help us make we put mind for all the promise for Bible. This one go make our problem no make us tire. (Ps. 27:1, 14; Acts 24:15) Make we de put mind for the hope wey we get, if we want make e protect us. We must wear this “helmet” for head, no be for hand we go hold-am.

17, 18. (a) How Satan fit fool us make we remove our helmet? (b) How we fit show say Satan never fool us?

¹⁷ How Satan fit make us remove our helmet? See wetin e try make Jesus do. Satan sabi say one day Jesus go rule this earth. But Jesus go wait until the time wey Jehovah want. And before that time come, e go suffer and die. So Satan give Jesus chance make e rule before the time wey Jehovah want. E tell Jesus say: “If you bow down and worship me just one time, everything go be your own.” (Luke 4:5-7) Satan de use the same style tempt us today. E know say Jehovah don promise us many good things for paradise. But we need to wait, and e fit be say we go suffer for some time. So Satan de give chance make we enjoy that kind life now. E want make we put money first for our life, and the Kingdom of God second.​—Matt. 6:31-33.

¹⁸ Satan never fit fool plenty young people. Kiana na one of them and e dey 20 years. E talk say: “I know say na only the Kingdom of God go remove all our problem.” How this kind better hope affect the way e de think and do things now? E help Kiana remember say the things wey this world de give no go last. So e no de use all the time wey e get to get more things for this world. Instead, e de use e time serve Jehovah.

“THE SWORD OF THE SPIRIT NA THE WORD OF GOD”

19, 20. Wetin we go do make the way we de use Bible better pass before?

¹⁹ That time, the sword wey Roman soldier de use long reach about 50 cm (20 inches). One thing wey make them sabi use this sword fight, na because them de train with-am everyday.

²⁰ Paul talk say Bible dey like sword wey God give us. People fit no agree with wetin we believe. So we must learn how to use Bible well when we de talk with them. We still de use Bible correct the way we de think. (2 Cor. 10:4, 5; 2 Tim. 2:15) Wetin you go do make the way you de use Bible better pass before? Sebastian na one young brother and e dey 21 years. E talk say: “I don de write one verse from every chapter for my Bible reading. I de keep all the verse wey I like. This one de help me understand how Jehovah de think.” Daniel wey we talk about for paragraph eight talk say: “When l de do my Bible reading, l de find different-different verse wey l think say I fit use help people for preaching. I don see say people de listen when they notice say you really like wetin dey Bible, and you de do everything wey you fit do to help them.”

21. Why we no need to fear Satan and the demons?

²¹ As we don hear from all the young people for this topic, we no need to fear Satan or the demons. They get power, but they no get power pass Jehovah. They no go live forever. Small time, when Jesus don start to rule for one thousand years, they go put them for prison and they no go fit do us anything. After, they go destroy them. (Rev. 20:1-3, 7-10) We know our enemy, we know the style wey e de use, and wetin e get for mind. We fit fight and win Satan because Jehovah de help us!