First Go Settle With Your Brother​—How?

Imagine sey you dey live for Galilee for Jesus time. You travel go Jerusalem for Festival of Booths. Other servant of Jehovah just full the city. Dem come from different different place. You want go make sacrifice to Jehovah. So, you come carry your goat dey pass where the plenty people dey, as you dey go the temple. As you reach, you come see many people wey come do sacrifice. At last, e come reach your turn to give the priest your goat. But, you come remember sey your brother, wey fit be one of the people wey dey there or wey dey the city, dey vex for you. Jesus talk wetin you suppose do. (Read Matthew 5:24.) How you and your brother go take settle this matter as Jesus talk? For the points wey dey this box for down, abeg mark the correct answer.

YOU SUPPOSE . . .

• talk with your brother only when you think sey e get better reason to vex

• try correct how your brother take see the matter because you feel sey e dey quick vex or sey e still cause part of the problem

• listen well as your brother dey talk. Even if you no understand everything wey e talk, still beg am make e no vex because e no dey your mind to do wetin go pain am

YOUR BROTHER SUPPOSE . . .

• tell other people for congregation wetin you do because e want make dem support am

• insult you, talk everything wey you do, and want make you gree sey na your fault

• know sey e no easy for you to come meet am make una settle the matter. So, e suppose use all im mind forgive you

Even if we no dey do animal sacrifice again, wetin Jesus dey teach us about our worship and to make peace with our brothers?