E Make Im Papa and Jehovah Happy

You see this girl wey dey this picture?— Na one man wey dem dey call Jephthah born am. Bible no tell us im name, but we know sey the girl make im papa and Jehovah happy. Make we learn about the girl and im papa.

Jephthah na better person. E dey teach im pikin about Jehovah everytime. Jephthah self na strong man and na better leader. Israel people come beg am sey make e carry dem go fight their enemy.

Jephthah come pray sey make Jehovah help am win. E promise Jehovah sey if e win, e go give Jehovah the first person wey come out from im house when e come back. The person go dey work for the tabernacle, and e go dey stay near there. Tabernacle na place where people dey go worship God that time. As e come be, Jephthah win the fight! You know who be the first person wey come out from im house when e come back?—

Na Jephthah pikin! Na only this pikin Jephthah born. And now Jephthah go come allow am comot for house. This one really pain Jephthah. But remember sey e don promise God something. Quick quick, im pikin talk sey: ‘Papa, you don already promise Jehovah, do wetin you promise.’

Jephthah pikin self no happy. For the tabernacle, e no go marry, and e no go born pikin. But e really want make im papa do the thing wey e promise. And e still want make Jehovah happy. Jephthah pikin know sey, that one better pass to marry and get pikin. Na im make am comot for house go work for the tabernacle.

You think sey wetin e do make im papa and Jehovah happy?— Yes, e make dem happy! If you dey do wetin dem tell you and you love Jehovah, you go be like Jephthah pikin. You self go make your mama and papa, and Jehovah happy well well.