Jesus Do Many Miracle for Capernaum

Jesus don choose four disciples—Peter, Andrew, James and John—to come be fishers of men. For Sabbath day, all of dem go the synagogue wey dey Capernaum. The people still dey surprise for the way Jesus dey teach because e dey do am as person wey get authority, no be like the scribes.

One man wey demon dey im body, come that day. For inside the synagogue, the man come dey shout: “Which business we get with Jesus the Nazarene? Abi you come destroy us? I know exactly who you be, you be God Holy Person!” But Jesus tell the demon sey: “Shut up, and comot from im body!”—Mark 1:24, 25.

At once, the wicked spirit nack the man for ground and make am get convulsion, e come shout with loud voice. The demon comot from the man body, and “e no injure am.” (Luke 4:35) Everybody wey dey around am for the synagogue surprise, dem come dey ask sey: “Wetin be this? . . . E even get the power to talk to demons and dem go obey am.” (Mark 1:27) E no tey, everybody for Galilee hear about this better thing wey happen.

When dem comot from the synagogue, Jesus and im disciples go Simon or Peter house. For there, dem meet Peter mother-in-law wey dey sick. E get high fever, so dem come beg Jesus make e help am. So Jesus waka go meet am, hold im hand, come raise am up. At once, e come well, and e come begin serve Jesus and im disciples, e fit be sey na food e cook for dem.

For evening, people from different different place come dey carry people wey dey sick come Peter house. E no tey, e come be like sey the whole town gather for the door. Why? Because dem dey find cure. In fact, all the people wey their person dey sick carry dem come meet am. And e touch all the people, na so e take cure dem. (Luke 4:40) And no matter the kind sickness wey dem get, Jesus cure all of dem as God Word talk. (Isaiah 53:4) E even free people wey demons dey oppress. As the demons dey come out, dem go dey shout: “You be God Son!” (Luke 4:41) But Jesus stop dem and no let dem talk anything. Dem know sey na Jesus be the Christ and e no want make dem dey do like sey dem be Jehovah servant.