Ezela

1 Mu givo gia thomo gia uhinyinyi wa Fumu Siluse wa gu Phelese, Yehowa wamutumile ha guwambela athu agasue a mu ufumu wenji ndaga imoshi ha gutagenesa ndaga yazuelele Yehowa mu njila ya Yelemiya. Fumu Siluse wasonegele nji ndaga yene, wazuelele egi:

2 “Siluse Fumu wa gu Phelese udi muzuela egi: ‘Yehowa Nzambi wa mu dilu wanguhanele ma ufumu agasue a ha mavu, wanguhanele nji ginemo gia gumutungila inzo gu Yelusalema idi gu Yuda. 3 Nzambi akhale nu muthu wenji wagasue udi mukatshi dienu, muthu muene akanduge gu Yelusalema idi gu Yuda ha gutunga luko inzo ya Yehowa Nzambi wa Isalele, (muene udi Nzambi wa giamatshidia) inzo yenji yakhalele gu Yelusalema.* 4 Muthu wagasue udi ngenji mukatshi dienu ikhale fundo ditshi didi muene, athu adi n’enji hehi* amukuatese nu utadi wa siliva, nu wolo, nu ima iko nu shitu, nu milambu yana hanewa mu gutshigina gua muthu mukunda nu inzo ya Nzambi wa giamatshidia, inyi yakhalele gu Yelusalema.

5 Gungima, mafumu a fami jia mu giphuta gia Yuda nu gia Benjame nu nganga-nzambi nu enya Levi,—athu agasue anyi nyuma ya Nzambi wa giamatshidia yaatumile—adilondele ha guya mutunga luko inzo ya Yehowa inyi yakhalele gu Yelusalema. 6 Athu agasue akhalele nawo hehi a akuatesele nu* ikadigilo ya utadi wa siliva nu ya wolo nu ima nu shitu nu ima iko ya ndando nu milambu yagasue yana hanewa mu gutshigina gua muthu.

7 Fumu Siluse wavutudile nji ikadigilo ya mu inzo ya Yehowa inyi Nebukadenezale wazudile gu Yelusalema nu wayihagele mu inzo ya nzambi wenji. 8 Fumu Siluse wa gu Phelese wahagele ima yene mu utuameji wa Miteledata mubambi wa makuta. Miteledata wayitangele, wayihanele gudi Sheshabasale* fumu wa gu Yuda.

9 Ima yene yatangewe yakhalele: Malonga a wolo 30 akhalele gifua gitunga nu malonga a utadi wa siliva 1 000 akhalele gifua gitunga nu malonga ako 29, 10 malonga 30 azonda-zonda a wolo, nu malonga 410 azonda-zonda a utadi wa siliva, nu ikadigilo iko 1 000. 11 Ikadigilo yene yagasue ya wolo nu ya utadi wa siliva yakhalele 5 400. Sheshabasale wabatele ima yene yagasue gu Yelusalema tangua athu akhalele mu uhiga akatugile gu Babilona ha guvutuga gu Yelusalema.