Ezela
6 Mu tangua diene, Fumu Daliyuse wahanele njila hagula akambe muabonga mu mikanda ikulu,* ha fundo akhalele mubamba umonyi gu Babilona. 2 Amonele rulo imoshi ha fundo diakhalele nu ibayi yakola gu dimbo dia Ekebatane mu provense ya Mede, rulo yene yakhalele yagusonega egi:
3 “Fumu Siluse wambile mukhuala mukunda nu inzo ya Nzambi ya gu Yelusalema mu givo gia thomo gia uhinyinyi wenji. Wazuelele egi: ‘Enya Yuda atunge inzo ya Nzambi hagula ikhale fundo adi naye guhana milambu, fondasio jienji jimbiwe, jidi naye gukhala guleha bakude 60 nu gukoma bakude 60.* 4 Ayitunge nu ndonga thathu jia maseso akoma nu ndonga imoshi ya mabaya; mbongo adi naye gufuta mukunda nu mudimo wene jidi naye gukatuga gu inzo ya fumu. 5 Wolo nu ikadigilo ya utadi wa siliva ya mu inzo ya Nzambi, inyi Nebukadenezale wazanguile mu tempelo yakhalele gu Yelusalema nu wayile nayo gu Babilona idi naye guvutudiwa, hagula ayihage ha fundo yakhalele mu inzo ya Nzambi gu Yelusalema’.
6 “Henyaha aye guvernere Tatenayi wa mu mavu a ha Sambua dia Muta* nu Shetale-Bozanai nu mafuta enu a mudimo anyi adi atuameji a mu mavu a ha Sambua dia Muta, mudinginyisago luko mu ndaga yene. 7 Mukangigo njila hagula mudimo wa gutunga inzo ya Nzambi uye gutuama. Guvernere wa gu Yuda nu akulu a enya Yuda adi naye gutunga luko inzo ya Nzambi ha fundo yakhalele thomo. 8 Ngudi mumba nji mukhuala ha gumonesa ndaga mudi naye gutshita mukunda nu akulu a enya Yuda hagula atunge luko inzo eyi ya Nzambi. Mbamuhana athu awa mbongo muphushi hagula alandule gutshita mudimo wene. Mudi naye guzula mbongo jiene ha fundo ana bamba umonyi wa fumu nu mu itadi inyi mbamuzula mu mavu a ha Sambua dia Muta. 9 Alandule guahana ima yagasue adi nayo funu lusugu nu lusugu, ikhale mitumba ya ngombe ya milume nu imeme ya milume nu mitumba ya imeme mukunda nu milambu ya guwotshia ya Nzambi wa mu dilu, nu mbuto jia ble nu mungua nu matombe nu maji, gifua luholo nganga-nzambi jidi gu Yelusalema mbajitoga, 10 hagula alandule guhana milambu idi musuanguluisa Nzambi wa mu dilu, nu akombelele mukunda nu fumu nu an’enji a mala. 11 Ngazuedi nji egi gula muthu washiya mukhuala owu, adi naye gubogola lushimi* lua inzo yenji amujitshiga guene,* inzo yenji mbayibua nji gabine* ga athu agasue, mbawuhanewa ndola mukunda nu gubola guenji. 12 Nzambi yago wahagele jina dienji gu Yelusalema,* ashiye fumu wagasue nu athu agasue mbaalola gushiya mukhuala owu nu mbaamuanga inzo ya Nzambi idi gu Yelusalema. Ame Daliyuse ngudi muhana mukhuala owu. Ikalegewe mu phushi.”
13 Gungima guvernere Tatenayi wa mu mavu a ha Sambua dia Muta nu Shetale-Bozanai nu mafuta awo a mudimo, atshitshile muphushi ndaga jiagasue jiaawambelele Fumu Daliyuse. 14 Akulu a enya Yuda alanduile gutunga, mudimo nji wakhalele muya gutuama, handaga ahetele gikhesa mu profesi jiazuelele Hagai nu profete Zakaliya mujigulu wa Ido. Amanesele gutunga inzo yene gifua muawambelele Nzambi wa Isalele nu Fumu Siluse nu Fumu Daliyuse nu Fumu Aletakelesese wa gu Phelese. 15 Amanesele gutunga tempelo mu lusugu lua thathu lua mbeji ya Adale* mu givo gia 6 gia uhinyinyi wa Fumu Daliyuse.
16 Gungima enya Isalele nu nganga-nzambi nu enya Levi nu athu ako adiangele gukatuga mu uhiga, atshitshile wano ha gusendesa gukalegela* inzo ya Nzambi nu gusuanguluga guagasue. 17 Tangua atshitshile wano wene, ahanele ngombe jia milume 100 nu imeme ya milume 200 nu mitumba ya imeme 400. Ahanele nji khombo jia milume 12 gifua mulambu mukunda nu gubola gua enya Isalele agasue, gifua muakhalele guvula gua iphuta ya Isalele. 18 Ahagele nganga-nzambi mu mahunji awo nu enya Levi mu mahunji awo ha gutagenesa mudimo wa Nzambi gu Yelusalema, gifua luholo yasonegewe mu mukanda wa Moize.
19 Athu adiangele gukatuga mu uhiga akalegele Wano wa Pake mu lusugu lua 14 lua mbeji ya thomo. 20 Nganga-nzambi nu enya Levi adiphelegetesele, hene mukut’awo agasue abuile aphelegeta; gungima ashiyile shitu mukunda nu mulambu wa Pake, mukunda nu athu agasue adiangele gukatuga mu uhiga, mukunda nu nganga-nzambi jiko nu mukunda nu ene hakhawo. 21 Gungima enya Isalele anyi akatugile mu uhiga adile ima yene nu athu agasue adibungishile nawo. Athu ene abembele ndaga jia usala jia enya ifutshi iko ha gukombelela* Yehowa Nzambi wa Isalele. 22 Atshitshile nji Wano wa Mapha Ashigo nu Levire nu gusuanguluga guagasue masugu 7, handaga Yehowa waasuanguluishile. Watshitshile nji egi fumu wa gu Asiliya a akalegele ndaga mu luholo luabonga hagula a akuatese* ha gutshita mudimo wa inzo ya Nzambi wa giamatshidia, Nzambi wa Isalele.