Ezela

8 Wawa majina a mafumu a fami jia mu iphuta ya enya Isalele nu senga* ya fami jia athu ngakatugile n’awo gu Babilona mu uhinyinyi wa Fumu Aletakelesese: 2 Mukatshi dia ana a Fineyase a mala guakhalele Gershome; mukatshi dia ana a Itamale a mala, Danyele; mukatshi dia ana a Davidi a mala, Hatusha; 3 Mukatshi dia ana a Shekania a mala anyi akhalele mukatshi dia ana a Palosha a mala, guakhalele Zakaliya. Zakaliya wakhalele nji nu mala 150 anyi asonegewe majina; 4 mukatshi dia ana a Phahata-Moaba, guakhalele Eliyohenayi mun’a Zelaya nu mala 200 akhalele n’enji; 5 mukatshi dia ana a Zatu, guakhalele nu Shekania mun’a Yahaziele nu mala 300 akhalele n’enji; 6 mukatshi dia ana a Adine, guakhalele nu Ebede mun’a Yonatana nu mala 50 akhalele n’enji; 7 mukatshi dia ana a Elama, guakhalele nu Yeshaya mun’a Ataliya nu mala 70 akhalele n’enji; 8 mukatshi dia ana a Shefatia, guakhalele nu Zebadia mun’a Mikaele nu mala 80 akhalele n’enji; 9 mukatshi dia ana a Yoabe, guakhalele nu Obadia mun’a Yehiele nu mala 218 akhalele n’enji; 10 mukatshi dia ana a Bani, guakhalele nu Shelomita mun’a Yosifia nu mala 160 akhalele n’enji; 11 mukatshi dia ana a Bebayi, guakhalele nu Zakaliya mun’a Bebayi nu mala 28 akhalele n’enji; 12 mukatshi dia ana a Azegade, guakhalele nu Yohanana mun’a Hakatana nu mala 110 akhalele n’enji; 13 mukatshi dia ana a Adonikame anyi akhalele athu a gisugishilo guakhalele nu: Elifelete nu Yeyele nu Shemaya nu mala 60 akhalele nawo. 14 mukatshi dia ana a Bigevayi, guakhalele nu Utayi nu Zabuda nu mala 70 akhalele nawo.

15 Ngabungishile athu hehi nu muta udi muya gu Ahava, tuahagele phundo guene masugu thathu. Uvi tangua ngatalele athu nu nganga-nzambi muabonga, ngamonele egi guakhalelego nga muenya Levi mumoshi. 16 Hene ngatumile athu ha guya mutamega Eliezele nu Ariele nu Shemaya nu Elenatana nu Yalibe nu Elenatana nu Natana nu Zakaliya nu Meshulame, akhalele atuameji nu Yoyaliba nu Elenatana anyi akhalele alongeshi. 17 Ngaawambelele ha guya gudi Ido wakhalele mutuameji wa fundo diana tamegewa egi Kasifia. Ngaalezele ha guwambela Ido nu aphangi’enji a mala ana tshita mudimo gu tempelo* anyi akhalele gu Kasifia ha guza nu enya mudimo mukunda nu inzo ya Nzambi wetu. 18 Luholo Nzambi wetu wakhalele nu esue, ajile nu Shelebiya yala mumoshi watema mun’a Mali mujigulu wa Levi mun’a Isalele, wakhalele nu an’enji a mala nu aphangi’enji a mala, mukut’awo agasue akhalele 18. 19 Ajile nji nu Hashabiya nu Yeshaya muenya fami ya Melali nu aphangi’enji a mala nu an’awo, akhalele mala 20. 20 Mukatshi dia athu ana tshita mudimo gu tempelo* anyi Davidi nu manene atombele ha gukuatesa enya Levi, akhalele mala 220, mukut’awo agasue atombewe mu majina awo.

21 Gungima ngawambelele athu ha gutuna gudia ha fundo tuakhalele hehi nu muta wa Ahava, hagula tudibulumuise gutuama dia Nzambi wetu nu ha gukamba ukuateshi wenji hagula tuwende muabonga mu njila nu an’etu nu ima yetu yagasue. 22 Ngakhalele naye guvua musonyi ha gutoga masuta nu awendeshi a tubalu ha gutubamba gudi mbalagaji jietu mu njila, handaga tuadiangele guwambela fumu egi: “Nzambi wetu wana kuatesa athu agasue ana gumukamba,* uvi wana monesa khabu jienji jiakola gudi athu agasue ana gumubemba.” 23 Tuatunyile gudia, tuakambele nji utuameji gudi Nzambi wetu mukunda nu ndaga yene, muene wavuile gububa guetu.

24 Gungima ngatombele mafumu 12 mukatshi dia mafumu a nganga-nzambi, Shelebiya nu Hashabiya nu aphangi’awo ako a mala 10. 25 Ngathesele utadi wa siliva nu wolo nu ikadigilo iko nu misomo yahanele fumu nu ahanyi enji a malongo nu atuameji enji nu enya Isalele agasue mukunda nu inzo ya Nzambi wetu, gungima ngaahanele nayo. 26 Ima ngathesele yakhalele batalanta* 650 a utadi wa siliva, nu ikadigilo 100 ya utadi wa siliva, ikadigilo yene yakhalele nu gunema gua batalanta 2, nu batalanta 100 a wolo, 27 nu malonga azonda-zonda 20 a wolo akhalele gunema badariki* 1 000, nu ikadigilo mbadi ya kuivre yabenga, yakhalele yabonga gifua wolo.

28 Gungima ngaawambelele egi: “Mudi athu a gijila mukunda nu Yehowa, ikadigilo eyi nji idi ya gijila; utadi wa siliva nu wolo udi mulambu wahanewa mu gutshigina gua athu mukunda nu Yehowa Nzambi wa akhakh’enu. 29 Ibambenu muabonga uu nu tangua mbamuyithesa gutuama dia enya Levi nu mafumu a nganga-nzambi nu mafumu a fami jia mu iphuta ya enya Isalele gu Yelusalema, mu sugu* jia inzo ya Yehowa. 30 Nganga-nzambi nu enya Levi azudile utadi wa siliva nu wolo nu ikadigilo athesele gutuama diawo, ha guyibata gu Yelusalema mu inzo ya Nzambi wetu.

31 Gungima tuakatugile gu muta wa Ahava mu lusugu lua 12 mu mbeji ya thomo ha guya gu Yelusalema. Nzambi wetu watukuatesele, watuhuluishile nji ha mago a mbalagaji nu nzangi jiakhalele mu njila. 32 Gungima tuahetele gu Yelusalema, tuatshitshile guene masugu thathu. 33 Mu lusugu lua nguana tuathesele utadi wa siliva nu wolo nu ikadigilo mu inzo ya Nzambi wetu. Gungima tuayihanele gudi Melemota mun’a nganga-nzambi Uriya, Eleazale mun’a Fineyase wakhalele n’enji. Enya Levi awa akhalele nji nawo: Yozabada mun’a Yeshua nu Naodia mun’a Binuyi. 34 Atangele ima yagasue, ayithesele nji, gungima asonegele gunema gua ima yene yagasue. 35 Athu akatugile mu uhiga ahanele milambu ya guwotshia gudi Nzambi wa Isalele, ahanele ngombe jia milume 12 mukunda nu enya Isalele agasue nu imeme ya milume 96 nu mitumba ya imeme ya milume 77 nu khombo jia milume 12 gifua mulambu mukunda nu gubola; ima eyi yagasue yakhalele mulambu wa guwotshia ahanele Yehowa.

36 Gungima ahanele mikhuala ya fumu gudi mafumu a baguvernere a baprovense nu baguvernere a mu mavu a ha Sambua dia Muta,* akuatesele nji athu, a ahanele ima akhalele nayo funu mukunda nu inzo ya Nzambi wa giamatshidia.