Ngimbo
Lungimbo lua Davidi.
101 Mbanguyimba mukunda nu guzumba gua giamatshidia nu gubonga guaye.
Oo Yehowa, mbanguguyimbila ngimbo ha gugutumbuisa.*
2 Mbangutshita ndaga nu gutema nu gujinginyina guagasue.
Tangua ditshi mbawuza gudi ame?
Mbangushigo mutshita nga ndaga imoshi yabola mu inzo yami.
3 Ngajiyilego gutala nga gima gimoshi gia githuhu.
Ngana tuna makalegelo a athu ana tuna ndaga jiabonga;
mbangushigo mukuata nawo ufuta.
4 Muthu udi nu mutshima wabola wana khala gualeha nu ame;
ngana tshigina ndo* ndaga jiabola.
5 Muthu wagasue udi mumbila muthu n’a muko mambo mu gisuegi,
mbangumuhenesa tedie.
Muthu wagasue udi gudisunzula nu udi nu lulendo mu mutshima wenji,
mbangushigo gumutshigina.
6 Mbangusuanguluga nu athu a gujinginyina a ha mavu,
hagula ajiya gujinga nu ame.
Muthu udi ya gujinginyina mbawungutshitshila mudimo.
7 Muthu wana huiga athu gajiyilego gukhala mu inzo yami,
muenya mambo nji gajiyilego gumagana gutuama diami.*
8 Gimenegena giagasue, mbanguhenesa* athu agasue abola a ha mavu,
mbangutotesa athu agasue adi mutshita ndaga jiabola mu dimbo dia Yehowa.