Ngimbo
104 Ngudi mutumbuisa Yehowa.
Oo Yehowa Nzambi wami, udi wakoma diago.
Udi ya gusudiga gukoma nu lutumbu.
2 Aye udi ya guditshuiga muanya gifua mulele;
wasununa dilu gifua mulele wa tenta.
3 Muene watungile fundo dienji dia gukhala gosa mukatshi dia meya,
wabuishile matuta phusu-phusu yenji,
wana wenda holu dia mahambu a funji.
4 Wabuishile anjelo enji nyuma,
wabuishile enya mudimo wenji tshuya tudi mushididisa.
5 Muene wajigamesele mavu holu dia fondasio jienji;
ene mbaashigo mukatudiwa* ha fundo dienji nga hazonda.
6 Waatshuigile mita yakoma gifua mulele.
Meya amaganele holu dia milundu.
7 Tangua wabalediele* meya, ene alengele;
tangua avuile matululu a muandu waye, alengele nu gudigita
8 ayile ha fundo walondele mukunda nu ene,
milundu yathuphugile uvi mababa ashiwugile.
9 Wahagele mudidilo unu ene ajiyilego gubalega,
hagula atshuigigo luko mavu nga hazonda.
10 Muene watuma ito ya mita mu mababa;
meya a ito yene adi mubulumuga ha katshi dia milundu.
11 Shitu jiagasue jia mu foto jiana nua meya ene;
tubalu tua mu foto tudi nji munua meya ene ha gumanesela luhungu.
12 Tunjila tua gosa tuahaga mafundo a gubanda holu dia meya ene;
tudi muyimba mukatshi dia thango jia mitshi idi nu mayiji avula.
13 Muene udi mutebesa milundu nu meya a mvula adi mukatuga gosa fundo diana khala muene.
Mavu akuta mbuto jia midimo yenji.
14 Muene udi mukudisa muangu mukunda nu ngombe
nu mayiji mukunda nu athu,
ha guzola ima ya gudia ha mavu
15 nu vinyo yana suanguluisa mutshima wa muthu,
nu maji ana buisa phala henyi-henyi,
nu dipha diana hana muthu ngolo.*
16 Mitshi ya Yehowa yakuta,
mitshi ya sedre ya gu Libane yakunyile muene,
17 fundo tunjila tuana haga yanzu.
Inzo ya njila ya sigonyi idi mu mitshi ya jenevriye.
18 Milundu yaleha idi mukunda nu khombo jia mu milundu;
maseso adi fundo dia gudisuega mukunda nu mbuji jiana khala mu maseso.
19 Muene wafugile mbeji ha gudijiga sungi jiatombewe;
kumbi diana jiya muabonga tangua dia gushiwuga.
20 Aye watuma ufugu, phipha yabua,
idi tangua shitu jiagasue jia mu foto jiana wenda.
21 Mitumba ya khoshi idi mubala hadi yene mukamba ima ya gudia,
idi mukamba ima ya gudia gudi Nzambi.
22 Tangua kumbi diana zoga,
jiene jiana vutuga, jiana banda mu mafundo ajio.
23 Muthu wanaya mutshita mudimo wenji,
wana tshita mudimo wakola uu nu mu ngueze.
24 Oo Yehowa, midimo yaye idi yavula sha!
Wayikalegele nu gutema guagasue.
Mavu adi aguzala pha nu ima wafugile.
25 Kianga gidi giakoma nu gialeha,
gidi gia guzala nu ima idi nu monyo, yakoma nu yazonda; ima yene yajiyilego gutangewa.
26 Masuwa ana wenda mu kianga giene,
nu Leviatana,* yinyi wafugile ha gukena muene.
27 Ima yene yagasue yana gugunengenena
hagula uyihane ima ya gudia mu tangua diatagana.
28 Yene yana nona ima wana guyihana.
Tangua wana kangula koko guaye, yana kuta ima yabonga wana guyihana.
29 Gula wasuega phala yaye, yene yana bua tunga-tunga.
Gula wayikatula muhehe,* yana gufua, yana vutuga mu fuluguta dia mavu.
30 Tangua wana guyihana muhehe waye, yana heta monyo,
wana buisa ima yagasue ya ha mavu ihe-ihe.
31 Lutumbu lua Yehowa mbalukhala mayilago.
Yehowa mbawusuanguluga mukunda nu midimo yenji.
32 Muene watala mavu, mavu adigita;
wakuata milundu, milundu yazola mishi.
33 Mbanguyimbila Yehowa monyo wami wagasue;
mbanguyimba* ha gutumbuisa Nzambi wami masugu agasue a monyo wami.
34 Matangi ami amusuanguluise.*
Mbangusuanguluga mukunda nu Yehowa.
35 Athu adi mutshita ndaga jiabola mbaatota ha mavu,
athu abola mbaakhadigo luko.
Mbangutumbuisa Yehowa. Tumbuisenu Yah!*