Ngimbo
Lungimbo lua Gukanduga.*
120 Ngatamegele Yehowa mu tangua dia lamba,
muene wanguhanele mvutu.
2 Oo Yehowa nguhuluise ha mago a enya mambo
nu ha mago a enya mulebo.
3 Aye muenya mulebo, itshi Nzambi mbawugukalagala?*
Luholo lutshi mbaluguhana muene ndola?
4 Mbawuguhana ndola nu mifula ya ita ya guviga
nu makala a tshuya a mutshi wa jene.
5 Lamba diami, handaga ngajingile gifua ngenji gu Mesheke!
Ngakhalele mujinga mukatshi dia tenta jia Kedale.
6 Ngajingile masugu avula mukatshi dia athu
anyi ana tuna gukhala mu guhuima.
7 Ame ngana tshigina guhuima, uvi ha ngudi muzuelela ndaga jia guhuima,
ene adi gawo muzumba ita.