Ngimbo
Lungimbo lua Gukanduga.
132 Oo Yehowa, wunguluga Davidi
nu malamba enji agasue;
2 luholo luadilogele muene gudi Yehowa,
luholo luadilogele muene gudi Nzambi wa ngolo jiagasue, Nzambi wa Yakoba egi:
3 “Mbangushigo mungina mu tenta yami, mu inzo yami.
Mbangushigo mubanda ha gitanda giami;
4 mbangushigo muya gu tulo,
mbangushigo mubatega izumbu yami ya meso ha gubanda
5 uu nu tangua mbanguheta fundo mukunda nu Yehowa,
fundo diabonga dia gukhala* mukunda nu Nzambi wa ngolo jiagasue, Nzambi wa Yakoba.”
6 Tala! Tuavile lumene luenji* gu Efrata;
tuayimonele mu mahia a mu gishitu.
7 Tuyenu ha fundo diana khala muene;*
tufugamenu ha fundo diana haga muene malu.
8 Oo Yehowa, zuga, uye ha fundo diaye dia guhuluguga,
aye nu Mushete wa ngolo jiaye.
9 Nganga-nzambi jiaye jisudige gubonga gifua mulele,
athu aye a gujinginyina ambe milolo ya gusuanguluga.
10 Mukunda nu muenya mudimo waye Davidi,
utunyigo* muthu waye wambile maji.
11 Yehowa wadilogele gudi Davidi;
mbagashigo musombegesa mbimbi yazuelele muene egi:
“Mbanguhinganesa mujigulu waye mumoshi
ha nguasa yaye ya ufumu.
12 Gula an’aye atumagela gikotelo giami
nu malongo ngaalongesele,
an’awo nji
mbaakhala ha nguasa ya ufumu mayilago.”
13 Handaga Yehowa watombele Siona;
watshiginyile egi ibue fundo dienji dia gukhala, wazuelele egi:
14 “Didi diene fundo diami dia guhulugugila mayilago;
mbangukhala haha, handaga yene ndaga ngudi mutshigina.
15 Mbanguhana dimbo dia Siona ima yavula;
mbanguhana phutu jienji mapha.
16 Mbanguhuluisa nganga-nzambi jienji,
athu enji a gujinginyina mbaamba milolo ya gusuanguluga.
17 Mbanguvudisa ngolo jia Davidi guene.
Ngalondele muenda mukunda nu muthu wami ngambile maji.
18 Mbanguhana mbalagaji jienji musonyi wabala,
uvi ufumu wenji mbawuheta lutumbu luavula.”*