Ngimbo
Gudi mutuameji wa miziki; yimbilo dia “Gabaji ga Mukaji ga mu Gimenegena.”* Lungimbo lua Davidi.
22 Nzambi wami, Nzambi wami, mukunda natshi wangubemba?
Mukunda natshi wamagana gualeha nu gunguhuluisa ndo,
nu guvua ndo luholo ngudi mudila mukunda nu lamba?
2 Nzambi wami, mu muanya ngudi gugutamega, uvi ushigo gunguhana mvutu;
mu phipha nji ngushigo muhena tedie.
3 Uvi aye udi Nzambi wa gijila,
udi mukatshi dia enya Isalele, ene adi gugutumbuisa.
4 Ashi’etu ashile mutshima gudi aye;
aguhagele mutshima, hene walanduile guahuluisa.
5 Akhalele gugudidila, aye wakhalele guahuluisa;
akhalele gugushila mutshima, aye waabembelego.*
6 Uvi ame ngushigo muthu, ngudi gitshiololo,
athu adi gungusegulula nu adi gungushinga.
7 Athu agasue adi gungumona, adi gungulela;
adi gungusegulula, adi mukundula mito yawo, adi muzuela egi:
8 “Muene washile mutshima wenji gudi Yehowa. Amuhuluise giwa tutale!
Aze amuhuluise gula wana gumuzumba muavula!”
9 Aye wanguzolele mu vumo dia mama,
aye wangubambele tangua ngakhalele muwamua mele a mama.
10 Wana gungubamba sendese tangua ngavualewe;
wana khala Nzambi wami, sendese tangua ngakhalele mu vumo dia mama.
11 Ukhadigo gualeha nu ame, handaga lamba diasuena hehi,
ngushigo nu muthu muko ya gungukuatesa.
12 Mitumba yavula ya ngombe jia milume yangujieta;
ngombe jia milume jiabala jia gu Bashana jiangujieta.
13 Jiakangula makano ha gungukita gubola,
jidi gifua khoshi idi mubala, idi mukalula shitu itshinyi-itshinyi.
14 Ngabundudiwa hashi gifua meya;
mifiya yami yagasue yasooga.
Mutshima wami wamuangana;
washiginyina mu thulo gifua maji.
15 Ngolo jianguhua, ngabua gifua gibala gia nzungu ya wuma,
ludimi luangukuatagana nu kano;
udi gungubata mu wina dia gufua.
16 Handaga jimbua jiangujieta;
jiasuena hehi nu ame gifua thundu ya athu abola,
jiangukuata gu mago nu gu malu gifua khoshi.
17 Ngajiya gutanga mifiya yami yagasue.
Mbalagaji jidi gungutala nonoo.
18 Adikhaphela milele yami,
atela mulele wami mubela.
19 Uvi aye, ukhadigo gualeha nu ame, Oo Yehowa.
Aye ngolo jiami, iza muphushi ungukuatese.
20 Nguhuluise gu phogo ya khusa,
huluisa monyo wami gu mbonde jia jimbua.
21 Nguhuluise gu kano dia khoshi nu gu mbinga jia ngombe jia mu foto;
nguhane mvutu, nguhuluise.
22 Mbangulongesa jina diaye gudi aphangi’ami;
mbangugutumbuisa mukatshi dia hungu.
23 Enue athu agasue muana vila Yehowa woma, mutumbuisenu!
Enue ajigulu agasue a Yakoba, munemesenu!
Enue ajigulu agasue a Isalele, muvilenu woma.
24 Handaga muene gana kanga ndo meso gu malamba a muthu udi nu gikenene;
gana gumusuegelago phala yenji.
Tangua muthu muene wana gumudidila ha gumutoga ukuateshi, muene wana gumutegelela.
25 Mbangugutumbuisa mukatshi dia athu avula;
mbangutagenesa ndaga ngadilogele gutuama dia athu ana guguvila woma.
26 Athu a gudibulumuisa mbaadia, mbaakuta;
athu ana kamba Yehowa mbaamutumbuisa.
Hetenu monyo wa ivo nu ivo.
27 Athu a gu songi jiagasue jia ha mavu mbaawunguluga* Yehowa, mbaavutuga gudi muene.
Fami jiagasue jia ha mavu mbajifugama gutuama dienji.
28 Handaga ufumu udi wangane wa Yehowa;
muene wana hinyina ifutshi yagasue.
29 Enya umonyi* agasue a ha mavu mbaadia, mbaafugama;
athu agasue adi muvutuga mu fuluguta dia mavu, mbaafugama gutuama dienji;
gushigo nga nu muthu mumoshi mukatshi diawo wajiya guhuluisa monyo wenji.
30 Ajigulu awo mbaamukombelela;
gindongo gidi muza mbagivua ndaga jiatadila Yehowa.
31 Mbaaza, mbaazuelela ndaga jiabonga jiatshitshile muene.
Mbaawambela athu anyi khenji avualewa galego ndaga jiatshitshile muene.