Ngimbo
Gudi mutuameji wa miziki. Maskile* a Davidi tangua Doege muenya Edome wayile muwambela Saula egi Davidi udi gumbo dia Ahimeleke.
52 Aye muenya ngolo, mukunda natshi udi gudihala mukunda nu midimo yaye yabola?
Guzumba gua giamatshidia gua Nzambi guana khala lusugu lua mudidi.
2 Ludimi luaye ludi nu mazo abala gifua luzualu,*
wanaya giphungi* ha gutshita gubola nu wana zuela ndaga jia mambo.
3 Wana zumba ndaga jiabola uvi jiabonga ndo,
wana zumba mambo uvi giamatshidia ndo. (Sela)
4 Wana zumba mbimbi jiagasue jiabola,
ludimi luaye luana zuela ndaga jia mambo.
5 Gishina giene Nzambi mbawugubuisa hashi mayilago;
mbawugukuata, mbawuguzola gu ngolo mu tenta yaye;
mbawuguvumbula mu gifutshi gia athu a monyo. (Sela)
6 Athu abonga mbaamona ndaga yene, woma mbawaakuata,
ene mbaagulela.
7 “Talenu muthu wana tuna gulengela gudi Nzambi wenji,*
muene wana sha mutshima gu umonyi wenji wavula
nu gu iphungi yenji yabola.”*
8 Ame mbangukhala gifua mutshi wa olive udi nu mayiji avula mu inzo ya Nzambi;
mbangulandula gusha mutshima mu guzumba gua giamatshidia gua Nzambi, mayilago.
9 Mbangugutumbuisa mayilago mukunda nu ndaga wakalegele;
mbangumonesa egi ngana sha mutshima gu jina diaye,
gutuama dia athu aye a gujinginyina, handaga jina diaye didi diabonga.*