Ngimbo
Gudi mutuameji wa miziki. Idi naye gushigiwa nu ima ya gushigila miziki idi nu shinga. Maskile* a Davidi.
55 Oo Nzambi, tegelela gisambu giami,
utunyigo gungutegelela ha ngudi gugububila ha gunguvila khenda.*
2 Ngutegelele, nguhane mvutu.
Gikenene giangulebesa muila,
ngabua tunga-tunga
3 mukunda nu ndaga jidi muzuela mbalagaji wami
nu mukunda nu usageshi wa muthu wabola.
Handaga ene angubatela malamba avula,
anguhagela umbalagaji nu khuta yagasue.
4 Ngudi nu gikenene giavula mu mutshima wami,
woma wa gufua wangukuata.
5 Woma wangukuata, ngudi mudigita,
ngudi muvua woma wakola diago.
6 Ngudi mulandula guzuela egi: “Aa, nga ngudi nu mahambu gifua yembe!
Nga ngudi gami muzuga ha guya fundo diko, ha gukhala mu ubambi.
7 Nga ngudi mulenga gami ha guya gualeha.
Nga ngudi muya mukhala mu mavu a luselenga. (Sela)
8 Nga ngudi muya muphushi ha fundo dia ubambi
gualeha nu funji yakola, gualeha nu gikudi.
9 Oo Yehowa, abuise tunga-tunga, bolesa ndaga jidi mukota ene,*
handaga ngamonyi ndaga jia khuta nu nguma mu dimbo.
10 Ene adi mujieta mu khulo ya ibayi ya dimbo diene phipha nu muanya;
dimbo diene didi dia guzala nu ndaga jiabola nu jia khuta.
11 Malamba adi hakatshi na katshi dia dimbo diene;
usageshi nu mambo adi avula ha fundo diana gudibungisa athu avula mu dimbo diene.
12 Handaga gula nga mbalagaji wami udi gungushinga,
nga ngudi mukolesela.
Gula nga mbalagaji wami udi muza ha gunguluisa;
nga ngudi muya gudisuega.
13 Uvi idi aye, muthu na muku’etu,
futa diami wakola ngana jiya muabonga.
14 Tuakhalele mafuta akola diago;
tuakhalele muya naye mu inzo ya Nzambi hamoshi nu thundu ya athu.
15 Gufua gukhale holu dia mbalagaji jiami!
Abulumuge nu monyo mu Malumba;*
handaga ndaga jiabola jidi mu jinzo jiawo nu mu mitshima yawo.
16 Uvi ame mbangudidila Yehowa Nzambi,
muene mbawunguhuluisa.
17 Ngudi gudisagesa muavula, ngudi mumba isugu mu ngueze nu mu gimenegena nu mu midi.
Muene wavua dijui diami.
18 Muene mbawunguhuluisa* ha mago a athu adi gunguluisa nu mbawunguhana guhuima,
handaga athu avula adi gunguluisa.
19 Nzambi mbawutegelela nu mbawaahana mvutu,
muene wana hinyina sendese mualeha. (Sela)
Athu anyi anago guvila Nzambi woma,
mbaatuna gusombegesa makalegelo awo.
20 Muene* waluishile athu akhalele n’enji mu guhuima;
ganemeselego gikotelo gienji.
21 Mbimbi jienji jidi jilatulu,*
uvi udi nu umbalagaji mu mutshima wenji.
Mbimbi jienji jidi jilatulu gubalega maji,
uvi jidi gifua phogo ya khusa ya guviga.
22 Bishila* ginemo giaye gudi Yehowa,
muene mbawugukuatesa.
Mbagashigo mubemba nga hazonda egi muthu wabonga abue.*
23 Uvi aye Nzambi, mbawubulumuna athu abola mu wina dialeha.
Athu adi mushiya ako nu enya mambo,
mbaashigo muheta nga hakatshi na katshi dia masugu a monyo wawo.
Uvi ame, mbangugushila mutshima.