Ngimbo
Gudi mutuameji wa miziki. Idi naye gushigiwa mu “Lis ya Guwunguluisa.” Mikitame* ya Davidi. Ha gulongesa. Tangua Davidi waluishile Alama-Nahalayima nu Alama-Soba; gungima Yoabe wavutugile, washiyile enya Edome 12 000 mu Baba dia Mungua.
60 Oo Nzambi, aye watutunyile; watumuangele.
Watuvidile khabu; uvi henyaha tutshigine luko!
2 Aye wadigitshishile mavu; waatawudile.
Shita mianji yenji, handaga adi mubuzumuga.
3 Wamonesele athu aye malamba akola.
Watunuishile vinyo, yatukuatele.
4 Hana* athu ana guguvila woma gijiyishilo
ha gulenga nu ha gudiweha hagula mifula yaakuatshigo. (Sela)
5 Hagula athu aye wana zumba ahuluge,
tuhuluise nu koko diaye dia madia, tuhane mvutu.
6 Nzambi wa Gijila wazuelele egi:*
“Mbanguditumbuisa, mbanguhana Shekeme gudi athu ami gifua khapho,
mbanguthesa Baba* dia Sukote.
7 Mavu a Gileade nu a Manase adi ami,
Efrayime udi gifulu* giami gia guhaga gu muto;
Yuda udi muhango wami wa ufumu.
8 Moaba udi longa diami dia guzuila meya.
Mbangubishila saphata jiami gu Edome.
Mbangumba milolo ya gubinga gu Filistiya.
9 Nanyi mbawungubata mu dimbo didi dia gujietewa?*
Nanyi mbawungutuameza uu nu gu Edome?
10 Oo Nzambi, ishigo aye watutunyile ba?
Aye Nzambi wetu, wanaya ndo luko nu masuta etu.
11 Tukuatese mu malamba etu,
handaga ishigo nu ndando ha gudifelela egi mun’a muthu atuhuluise.
12 Nzambi wetu mbawutuhana ngolo,
muene mbawudiata mbalagaji jietu.