Ngimbo
Gudi mutuameji wa miziki. Lungimbo lua Davidi.
65 Oo Nzambi, lutumbu ludi gugunengenena gu Siona;
mbatutagenesa ndaga tuadilogele gudi aye.
2 Oo aye wana vua isambu, athu a maluholo agasue mbaaza gudi aye.
3 Gubola guami guangulebesele muila,
uvi aye wana tshuiga gubola guetu.
4 Gusuanguluga gudi nu muthu munu aye watombi nu watamega ha gusuena hehi nu aye,
ha gukhala mu ibanzala yaye.
Mbatukuta ima yabonga ya mu inzo yaye,
tempelo yaye ya gijila.*
5 Mbawukalagala ndaga jiabonga, ndaga jia gushimana, ha gutuhana mvutu.
Oo Nzambi, aye muhuluishi wetu;
athu a mu mafundo agasue a ha mavu ana gugushila mutshima,
nu ene athu ana khala gualeha ha sambua dia kianga.
7 Aye* wana henesa matshipha-tshipha a kianga,
matululu a matshipha-tshipha enji nu matululu a ifutshi.
8 Athu a mu mafundo a gualeha mbaavua woma mukunda nu ijiyishilo yaye;
mbawutshita egi athu agasue,
sendese gu mazogelo a kumbi uu nu gu mayilo a kumbi, ambe miyelele ya gusuanguluga.
9 Aye wana tala mavu,
wana tshita egi azole mbuto jiavula nu akhale abonga diago.
Gamuta gadi mukatuga gudi Nzambi gadi gazala pha nu meya;
aye wana zola mbuto mukunda nu athu,
handaga luene luholo walondele mavu.
10 Aye wana mba meya mu mihanga yenji, wana shishigisa njila jia mihanga yene.
Wana guyitebesa nu meya a mvula; wana shimbiga ima yana zoga.
11 Wana hana ima yabonga givo nu givo;
njila jiaye jidi jiazala nu gubonga guaye.
12 Muangu wa mu mavu a luselenga udi mulandula gusaphutshila,*
tumilundu tudi tua guzala nu gusuanguluga.
13 Muangu udi wa guzala pha nu khombo nu imeme,
mababa adi a guzala pha nu mbuto.
Ima yene yagasue idi mumba milolo ya gusuanguluga, ayi, idi muyimba.