Ngimbo
Gudi mutuameji wa miziki. Ludi naye guyimbiwa nu ima ya gushigila miziki idi nu shinga. Lungimbo.
67 Nzambi mbawutuvila khenda, mbawutushimbiga;
muene mbawutumonesela gisemo (Sela)
2 hagula njila yenji ijiyiwe ha mavu a mudidi;
hagula athu agasue a mu gifutshi ajiye egi udi muhuluishi.
3 Oo Nzambi, athu agutumbuise;
athu agasue agutumbuise.
4 Ifutshi isuanguluge, imbe miyelele ya gusuanguluga,
handaga aye mbawusophesa athu mu luholo luabonga.
Mbawutuameza ifutshi ya ha mavu. (Sela)
5 Oo Nzambi, athu agutumbuise;
athu agasue agutumbuise.
6 Mavu mbaazola mbuto jienji;
Nzambi, Nzambi wetu, mbawutushimbiga.
7 Nzambi mbawutushimbiga,
athu a gu songi jiagasue jia ha mavu mbaamuvila woma.*