Ngimbo
Gudi mutuameji wa miziki. Idi naye gushigiwa mu “Lis.” Lungimbo lua Davidi.
69 Oo Nzambi, nguhuluise; meya azala muavula, ngasendesa gushiwuga.
2 Ngashiwuga mu ithotho, gushigo nu mavu alatenyi ha gumagana.
Ngashiwuga hakatshi dia jinga,
mushiya wa meya wanguhungumuna.
3 Ngahuila gami nu gutamega;
muminyo wangumigina.
Meso anguhola nu gunengena Nzambi wami.
4 Athu adi mulaba gungutuna
adi avula gubalega sanga dia gu muto wami.
Athu adi mukamba gungushiya,
mbalagaji jiami,* jiadivudisa.
Angushinjigile ha guvutula ima ngakuiyilego.
5 Nzambi wami, udi mujiya muabonga guheya guami,
udi mujiya nji ndaga jiabola ngakalegele.
6 Ubembigo egi athu ana gugushila mutshima avuishiwe musonyi mukunda nu ame,
Oo Fumu Wabalega Gukoma, Yehowa Nzambi wa masuta.
Athu ana gugukamba ahanewago musonyi mukunda nu ame,
Oo Nzambi wa Isalele.
7 Athu adi gungushinga handaga ngana gugukalegela mudimo;
ngahanewa diago musonyi.
8 Ngabua gifua ngenji gudi aphangi’ami,
gifua ngenji gudi ana a mama wami.
9 Gikhesa mukunda nu inzo yaye gidi mulema gifua tshuya mukatshi diami.
Mashingo a athu adi gugushinga adi mubua holu diami.
10 Tangua ngadibulumuishile nu ngatunyile gudia mukunda nu gukombelela,*
angushingile mukunda nu ndaga yene.
11 Tangua ngasudigile sagi ya ngombo;
ngabuile gifua gima gia gusegulula* gu meso awo.
12 Athu ana khala ha mufulo wa dimbo adi muzuelela ndaga jiami,
athu akuatewa matombe adi gunguyimba mu ngimbo jiawo.
13 Uvi gisambu giami gize gudi aye,
Oo Yehowa, mu tangua dinyi wajiya gugitshigina.
Mu guzumba guaye gua giamatshidia, Oo Nzambi,
nguhane mvutu, monesa egi udi muhuluishi wami.
14 Nguzole mu ithotho;
ubembigo egi ngushiwuge.
Nguhuluise ha mago a athu anago gunguzumba,
nu ha jinga dia meya.
15 Ubembigo egi meya anguhungumune,
ubembigo egi ngushiwuge ha jinga,
nga egi wina* dikangule kano dinguminye.
16 Nguhane mvutu, Oo Yehowa, handaga guzumba guaye gua giamatshidia gudi guabonga.
Mu khenda jiaye jiavula, balumuga ungutale,
17 usuegelago nji muenya mudimo waye phala yaye.
Nguhane mvutu muphushi, handaga ngudi mu lamba.
18 Iza hehi nu ame, nguhuluise;
ngukule ha mago a mbalagaji jiami.
19 Udi mujiya luholo ngudi mushingiwa, ngudi muhanewa musonyi nu ngudi museguluishiwa.
Udi mumona mbalagaji jiami jiagasue.
20 Mashingo angunamenesa gu mutshima, phuta yene yajiyilego gusagewa.*
Ngakhalele gudifelela egi mbaanguvuila khenda, uvi nga muthu ganguvidilego khenda,
ngakhalele gudifelela egi mbaaguhana gikhesa, uvi ngamonelego nga muthu wagunguhana gikhesa.
22 Ima yawo ya gudia yaabuile gifua muheto,
umonyi wawo waabuile gifua wanda.
23 Gu meso guabuite hagula amonyigo luko.
Makete awo alandule gudigita tangua diagasue.
24 Avuile khabu jiaye jiabala,
khabu jiaye jiabala jiakuate.
25 Phundo yawo ibue makhulu;
nga muthu mumoshi gakhadigo mu tenta jiawo.
26 Adi muhata muthu munu aye wawasele,
adi mulandula guta mene jia malamba a athu wanamenesele.
27 Lunda gubola mu gubola guawo,
waatadilago gifua athu abonga gu meso aye.
28 Majina awo akatudiwe mu mukanda wa athu a monyo,*
majina awo atangewago mukatshi dia athu abonga.
29 Uvi ame ngudi nu gikenene, ngudi mu lamba.
Oo Nzambi, ngolo jiaye jiana huluisa jingubambe.
30 Mbanguyimba ngimbo ha gutumbuisa jina dia Nzambi,
mbangumutumbuisa; mbangumuhana mersi.
31 Ndaga yene mbayisuanguluisa Yehowa muavula gubalega milambu ya ngombe jia milume,
gubalega mutumba wa ngombe ya mulume idi nu mbinga nu maboto.*
32 Athu a gudibulumuisa mbaamona ndaga yene, mbaasuanguluga.
Enue athu muana kamba Nzambi, khalenu nu gikhesa.*
33 Yehowa wana tegelela phutu,
muene mbagashigo musegulula athu enji adi mu uhiga.
34 Dilu nu mavu dimutumbuise,
kianga nu ima yagasue yana jinga muene.
35 Handaga Nzambi mbawuhuluisa Siona
nu mbawutunga luko membo a gu Yuda,
athu enji mbaazula* nu mbaakhala guene.
36 Ajigulu a enya mudimo enji mbaazula mavu,
athu ana zumba jina dienji mbaakhala mu mavu ene.