Ngimbo
Maskile* a Etane mujigulu wa Ezela.
89 Mbanguyimba ndaga jidi mumonesa guzumba gua giamatshidia gua Yehowa mayilago.
Kano diami mbadilongesa gujinginyina guaye mu indongo yagasue.
2 Handaga ngazuedi egi: “Guzumba gua giamatshidia mbagukhala mayilago,
gujinginyina guaye guana khala tangua diagasue mu dilu.”
3 “Ngakotele gikotelo nu muthu ngatombele;
ngadilogele gudi muenya mudimo wami Davidi egi:
4 ‘Mbangutshita egi ajigulu* aye alandule gukhala ivo nu ivo,
mbangukolesa nguasa yaye ya ufumu mu indongo yagasue.’” (Sela)
5 Dilu didi mutumbuisa ndaga jiaye jia gushimana, Oo Yehowa,
ayi, hungu dia athu a gijila mbadilongesa gujinginyina guaye.
6 Handaga mu dilu, nanyi wajiya gufuanesewa nu Yehowa?
Mukatshi dia ana a Nzambi, nanyi udi gifua Yehowa?
7 Nzambi udi munemesewa muavula mu gudibungisa gua athu a gijila;
muene udi wakoma, udi muhana woma gudi athu agasue adi mu khulo yenji.
8 Oo Yehowa Nzambi wa masuta,
nanyi udi nu ngolo gifua aye, Oo Yah?
Wana khala ya gujinginyina mu ndaga jiagasue.
9 Wana hinyina muta udi musha matululu;
tangua matshipha-tshipha enji ana zoga, wana guahenesa.
10 Aye watshiongomuene Rahabe, wamushiyile.
Wamuangele mbalagaji jiaye nu koko guaye gua ngolo.
11 Dilu didi diaye, mavu nji adi aye;
Aye wafugile mavu ana zola mbuto nu ima idi ya guzala hene.
12 Aye wafugile khanda ya nord nu ya sud;
mulundu wa Tabola nu wa Helemona idi mutumbuisa jina diaye nu gusuanguluga guagasue.
13 Koko diaye didi nu ngolo jiavula;
ayi, koko diaye didi nu ngolo;
koko diaye dia madia didi dia guthuphula.
14 Gubonga nu giamatshidia, idi fondasio ya nguasa yaye ya ufumu;
guzumba gua giamatshidia nu gujinginyina gudi gutuama diaye.
15 Gusuanguluga gudi nu athu adi mumba milolo ya gusuanguluga.
Oo Yehowa, muanya wa phala yaye udi guahenyela hadi ene muwenda.
16 Adi musuanguluga mukunda nu jina diaye lusugu lua mudidi,
adi nji gudihala mukunda nu gubonga guaye.
17 Handaga wana hana athu aye ngolo nu lutumbu,
mu gutshigina guaye, ngolo* jietu jiana gudivudisa.
18 Handaga tshibu yetu yakatugile gudi Yehowa,
fumu wetu nji wakatugile gudi Muthu wa Gijila wa Isalele.
19 Mu tangua diene, wawambelele muthu waye wa gujinginyina mu vizio egi:
“Ngahanele ngolo gudi muenya ngolo,
ngakanduishile muthu watombewe mukatshi dia athu.
20 Ngamonele muenya mudimo wami Davidi;
ngamumbile maji ami a gijila.
21 Koko diami mbadimukuatesa,
koko diami mbadimuhana ngolo.
22 Gushigo nga mbalagaji mumoshi mbawumufutshisa gitadi,
gushigo nji nga muthu mumoshi wabola mbawumusagesa.
23 Mbangusasumuna mbalagaji jienji gutuama dienji,
mbangushiya athu anyi anago gumuzumba.
24 Mbangukhala ya gujinginyina gudi muene nu mbangumumonesela guzumba gua giamatshidia,
ngolo jienji mbajidivudisa mukunda nu jina diami.
25 Mbanguhaga koko* guenji holu dia kianga
mbanguhaga koko guenji gua madia holu dia mita.
26 Muene mbawungutamega mu dijui diakola egi: ‘Udi Tata wami,
udi Nzambi wami nu Seso diami diana gunguhuluisa.
27 Mbangumubuisa gifua mona wa somi,
mbangumukanduisa holu dia mafumu a ha mavu.
28 Mbangumumonesela guzumba guami gua giamatshidia mayilago,
gikotelo giami nu muene mbagikhala mayilago.
29 Mbangutshita egi ajigulu* enji alandule gukhala ivo nu ivo,
nguasa yenji ya ufumu mbayikhala mayilago gifua dilu.
30 Gula an’enji abemba mikhuala yami
nu ashigo muwenda mu gudivua nu mikhuala yene,
31 gula ashiya mikhuala yami
nu ashigo mutumagela ndaga ngaawambelele,
32 ngenyi mbanguahana ndola, mbanguawasa muhango mukunda nu gulumbuga guawo,
mbanguakhuphula fimbo mukunda nu gujimbila guawo.
33 Uvi mbangushigo mubemba gumumonesela guzumba guami gua giamatshidia,
mbangutagenesa nji ndaga ngamulayele.*
34 Mbangushigo mushiya gikotelo giami,
mbangushigo nji musombegesa ndaga kano diami diazuelele.
35 Luholo ngudi Muthu wa Gijila, ngadilogele mbala imoshi;
mbangushigo muhuiga Davidi.
36 Ajigulu* enji mbajinga mayilago;
nguasa yenji ya ufumu mbayikhala ivo nu ivo gifua kumbi gutuama diami.
37 Mbayijigamesewa mayilago gifua mbeji
gifua temue wa gujinginyina mu dilu.” (Sela)
38 Uvi aye hakhaye wamubishidile, wamutunyile;
wavidile muthu waye wambile maji khabu jiakola.
39 Wabolesele gikotelo wakotele nu muenya mudimo waye;
waseguluile gipho gienji gia ufumu tangua wagibishidile mu mavu.
40 Wamuangele ibayi yenji ya maseso;
wabuishile mafundo enji akola makhulu.
41 Athu agasue adi mubalega hehi n’enji adi mukuya ima yenji;
athu ana khala hehi n’enji adi gumusegulula.
42 Wabingishile mbalagaji jienji;*
wasuanguluishile mbalagaji jienji jiagasue.
43 Wavutuile nji phogo yenji ya khusa gungima,
wamukuateselego ha gubinga ita.
44 Wamukatudile lutumbu luenji,
wasendumuine nguasa yenji ya ufumu mu mavu.
45 Wahihishile masugu a ulenge wenji;
wamusudigishile musonyi. (Sela)
46 Oo Yehowa, uu nu tangua ditshi mbawulandula gudisuega? Mayilago ba?
Khabu jiaye mbajilandula gulema gifua tshuya ba?
47 Ujimbilago egi masugu a monyo wami adi azonda!
Walabele gaye gufuga athu agasue ba?
48 Muthu mutshi wajiya gukhala genji mayilago gufua ndo?
Muene wajiya gudihuluisa gu ngolo jia Malumba* ba? (Sela)
49 Oo Yehowa, guzumba gua giamatshidia wakhalele mumonesa ha thomo gudi gui?
Wadilogele nu gujinginyina guagasue ha gumonesela Davidi guzumba guene.
50 Oo Yehowa, wunguluga mashingo athu ashingile athu aye;
wunguluga nji luholo ngudi naye gukolesela mu mashingo adi mushingana athu agasue.
51 Wunguluga luholo mbalagaji jiaye jia shinganele, Oo Yehowa;
luholo jiashingile muthu waye wambile maji mu nyuma fundo diagasue diakhalele muya muene.
52 Yehowa atumbuishiwe mayilago. Amen, amen.