Ngimbo
99 Yehowa wabua Fumu. Athu adigite.
Udi ya gukhala ha nguasa yenji ya ufumu idi holu* dia basheribe. Mavu adigite.
2 Yehowa udi wakoma gu Siona,
udi holu dia athu agasue.
3 Athu atumbuise jina diaye diakoma,
handaga dikuatesa woma nu didi dia gijila.
4 Muene udi fumu wa ngolo, wana zumba ndaga jiabonga.
Aye wajigamesele muabonga mikhuala yaye yatagana.
Wabatele ndaga jiabonga nu jiatagana gudi Yakoba.
5 Tumbuisenu Yehowa Nzambi wetu, fugamenu ha fundo dienji dia guhagela malu;
muene udi Nzambi wa gijila.
6 Moize nu Alona akhalele mukatshi dia nganga-nzambi jienji,
Samuele nji wakhalele mukatshi dia athu akhalele mutamega jina dienji.
Ene akhalele mutamega Yehowa,
muene wakhalele guahana mvutu.
7 Muene wakhalele muzuela nawo mu kunji dia tuta.
Ene akhalele mutumagela malongo nu mikhuala yakhalele guahana muene.
8 Oo Yehowa Nzambi wetu, wakhalele guahana mvutu.
Wakhalele guatotesela gubola guawo,
uvi waahanele ndola mukunda nu ndaga jiabola akalegele.
9 Tumbuisenu Yehowa Nzambi wetu,
fugamenu* gutuama dia mulundu wenji wa gijila,
handaga Yehowa Nzambi wetu, udi Nzambi wa gijila.