Referanse jia Mukanda wa Gukalegela mu Gudibungisa gua Lujingu nu Mudimo wa Uklisto

JUILLET 1-7

UMONYI UDI MU MBIMBI YA NZAMBI | KOLOSAI 1-4

“Katulenu Umuthu Ukulu, Sudigenu Umuthu Uhe-Uhe”

(Kolosai 3:5-9, NWT) Hene, shiyenu itshinyi ya muila wenu idi ha mavu mu ndaga yatadila uthambi, ndaga jia usala, nzala yakola ya gubungisa muila yinyi muthu gajiyilego gukanga mutshima, ngina jiabola jia ima, ngina ya ima yangane idi gifua gukombelela gua isongo. ⁶ Khabu jia Nzambi jidi muza mukunda nu ndaga eji jiabola. ⁷ Hathomo muakhalele muwenda ngenyi, hamuakhalele muwendesewa gudi ndaga jiene. ⁸ Uvi henyaha, mudi naye gukatula ndaga jinyi jiagasue: khabu, gubundumuga, ndaga jiabola, mashingo, nu ndaga jia musonyi jidi muzoga mu makano enu. ⁹ Mudimbilago mambo. Katulenu umuthu ukulu nu matshitshilo enji,

w11-F 15/3 diyiji 9-10 par. 12-13

Tubembigo egi Nyuma ya ha Mavu Awa Ibolese Matangi Etu

¹² Makalegelo ami ana gumonesa egi nyuma itshi yana gungutuameza? (Tanga Kolosai 3:8-10, 13.) Nyuma ya ha mavu awa yana gutuma athu ha gutshita midimo ya muila. (Gal. 5:19-21) Nyuma yana gututuameza yanago gumonega tangua ndaga jiagasue jidi muya muabonga. Uvi yana gumonega muabonga gula phangi mumoshi wa Muklisto gashigo mutshigina luko gutumona, nga ndo watukalegela gubola, watuwambela ndaga ishigo gutusuanguluisa. Luko, khadilo dietu gudi enya fami yetu diana gumonesa diago nyuma yana gututuameza. Hene, muthu wagasue udi naye gukamba gujiya gula nyuma itshi gadi naye. Dihule egi: ‘Mu mbeji samano eji jiabalega, makalegelo ami amonesa diago egi umuthu wami udi gifua wa Klisto ba? Mbimbi jiami nu ndaga ngudi mukalagala, jidi mumonesa egi ngavutugila luko makalegelo abola ngakhalele nawo thomo ba?’

¹³ Nyuma ya Nzambi yajiya gutukuatesa ha “gukatula umuthu ukulu nu matshitshilo enji” nu ha gusudiga “umuthu uhe-uhe.” Nyuma yene mbayitukuatesa nji ha gukhala nu guzumba guavula nu gisemo. Ngenyi, mbatukhala hehi ha guditotesela gubola nu mutshima umoshi, ikhale tudi mujiya egi aphangi atukalegela gubola. Gula tuatagana nu ndaga jidi mumonega egi jiabola, mbatushigo muhagela athu ako ‘umbalagaji, guavila khabu, guabundumugila, guashila matululu, nu mashingo.’ Mbatutshita ngolo ha ‘guvuila athu ako khenda.’​—Ef. 4:31, 32.

(Kolosai 3:10-14, NWT) luko, sudigenu umuthu uhe-uhe, udi mubua uhe-uhe mu njila ya ujiyi wa giamatshidia mu gudivua nu gifuanesa gia Muthu wawufugile. ¹¹ Haha gushigo nu muenya Greki nga muenya Yuda, gumbiwa gu mukanda nu gutuna gumbiwa gu mukanda, ngenji, Sekutia, muhiga, nga muthu gashigo muhiga; uvi Klisto udi ima yagasue nu mu ndaga jiagasue. ¹² Handaga enue mudi athu atombewe gudi Nzambi, athu a gijila nu ana guzumba muene, sudigenu khenda jiavula, nu mutshima wabonga, nu gudibulumuisa, nu gisemo, nu guhuiminyina. ¹³ Landulenu gukolesela mu ndaga jia athu ako, landulenu nji guditotesela nu mutshima umoshi ikhale muthu muko udi nu mulonga nu muthu muko. Luholo Yehowa wamitotesele nu mutshima umoshi, enue nji mudi naye guditotesela nu mutshima wagasue. ¹⁴ Uvi holu dia ndaga eji jiagasue, sudigenu guzumba handaga guzumba guana gutubungisa mu luholo luatagana.

w13-F 15/9 diyiji 21 par. 18-19

Wasombegesele Gale Ba?

¹⁸ Hagula Mbimbi ya Nzambi itukuatese ha gusombegesa, tushigo naye phamba guyitanga nu guyijiya, uvi tudi naye nji gutshita ndaga jiko. Athu avula ana gutanga Biblia tangua nu tangua, ana gujiya muabonga ndaga Biblia yana guzuelela. Yajiya gukhala egi wataganele gale nu athu a luholo elu mu mudimo wa gulongesa. Athu ako mukatshi diawo, akuatele gale verse mu muto. Uvi, gujiya ndaga eji jiagasue guakuateselego ha gusombegesa matangi nu makalegelo awo. Itshi adi naye gutshita idi khenji akalegele gale? Hagula Mbimbi ya Nzambi itukuatese ha gusombegesa matangi nu makalegelo etu, tudi naye guyibemba egi ‘ilongese’ mutshima wetu. (Gal. 6:6) Hene, tudi naye guzula tangua dia gutangigiza ndaga tudi mulonguga. Luko, tudi naye gudihula gamba: ‘Ngudi diago nu gutshigina egi ndaga ngudi mulonguga jishigo phamba malongo a gikombelelo ba? Ame hakhami ngana mona egi ndaga jiene jidi jia giamatshidia ba? Ngana gumona luholo ngajiya gutumagela ndaga jiene, nga ndo ngana suanguluga phamba gujilongesa athu ako? Ngana gudivua egi Yehowa udi gunguwambela ame ba?’ Gula tuatangigiza mihu eyi nu tuakamba guhana mvutu, mbayitukuatesa ha gukolesa ufuta wetu nu Yehowa. Guzumba guetu mukunda nu muene mbagukula. Ngenyi gula ndaga tudi mulonguga jiakuata diago mitshima yetu, mbayitutuma ha gusombegesa diago umuthu wetu.​—Ish. 4:23; Luka 6:45.

¹⁹ Gutanga Mbimbi ya Nzambi lusugu nu lusugu nu gutangigiza ndaga tuatangi, mbagututuma ha gulandula gutshita ndaga eji tuana gutshita gale: ‘Gukatula umuthu ukulu nu matshitshilo enji nu gusudiga umuthu uhe-uhe, udi mubua uhe-uhe mu njila ya ujiyi wa giamatshidia.’ (Kol. 3:9, 10) Yadiago, gula tudi mukotelesa muabonga Mbimbi ya Nzambi nu tudi guyitumagela, mbatulandula gusombegesa umuthu wetu. Umuthu wetu uhe-uhe wa Uklisto mbawutukuatesa ha gulenga miheto ya Satana.

Kamba Ndaga Jiko jia Ndando jia mu Nyuma

(Kolosai 1:13, 14, NWT) Watuhuluishile mu uhinyinyi wa phipha, watunginyishile mu ufumu wa Mun’enji gana guzumba. ¹⁴ Mu njila yenji, tuazolewe mu uhiga mu njila ya gibawu, yakotelesa egi gutotesela gua gubola guetu.

it-2-F diyiji 833 par. 4-6

Ufumu wa Nzambi

“Ufumu wa Mun’enji Gana Guzumba.” Tangua diakandugile Yesu mu dilu, masugu kumi gungima, wabunduile alandudi enji nyuma yabonga mu Pantekote ya givo 33 gia tangua dietu. Ngenyi, alandudi enji ahetele gijiyishilo giamonesele egi Yesu “wakanduishiwe gu koko gua madia gua Nzambi.” (Makal 1:8, 9; 2:1-4, 29-33) Mu tangua diene, “gikotelo gihe-gihe” giasendesele; ene abuile Aklisto a thomo a mu ‘gifutshi gihe-gihe gia gijila,’ yakotelesa egi Isalele ya mu nyuma.​—Heb 12:22-24; 1Phet 2:9, 10; Gal 6:16.

Mu tangua diene, Klisto wakhalele gu koko dia madia dia She’nji, nu wakhalele Fumu ya hungu dia Uklisto. (Ef 5:23; Heb 1:3; Fili 2:9-11) Biblia idi mumonesa egi sendese mu Pantekote ya givo 33 gia tangua dietu, alandudi enji ahetele ufumu wa mu nyuma. Tangua mupostolo Phaula wasonegelele Aklisto a gu Kolosai mukanda mu siekle ya thomo, wazuelele egi Yesu Klisto wakhalele nu ufumu. Muene wazuelele gamba: “[Nzambi] watuhuluishile mu uhinyinyi wa phipha, watunginyishile mu ufumu wa Mun’enji gana guzumba.”​—Kol 1:13, NWT; tala nji Makal 17:6, 7.

Sendese mu Pantekote ya givo 33 gia tangua dietu, ufumu wa Klisto wakhalele ufumu wa mu nyuma, wakhalele muhinyina Isalele ya mu nyuma, yakotelesa egi Aklisto avualewe mu nyuma ya Nzambi ha gubua ana a Nzambi a mu nyuma. (Yone 3:3, 5, 6) Tangua Aklisto awa ambiwe gale maji mu nyuma mbaya mu dilu, ene mbaashigo luko mukhala athu anyi ufumu wa Klisto mbawuhinyina ha mavu, handaga ene mbahinyina hamoshi nu Klisto mu dilu.​—Yat 5:9, 10.

(Kolosai 2:8, NWT) Temienu hagula muthu gamibuishigo ahiga mu njila ya ndunge jia ha mavu nu matangi a mambo nu a githuhu, adi gudivua nu shigu jia athu nu ndaga jia thomo jia ha mavu awa, uvi ndo mu gudivua nu Klisto;

w08-F 15/8 diyiji 28 par. 8

Ndaga jia Ndando Jidi mu Mukanda wa Galatiya, Efeso, Filiphi, nu wa Kolosai

2:8​—“Ndaga jia thomo jia ha mavu awa” jidi gututemesa mupostolo Phaula mu verse eyi jidi itshi? Jidi ima ya ha mavu awa a Satana. Tuajiya gutanga, ima nu mikhuala idi ha mavu awa, idi mutuameza mavu ene. (1 Yone 2:16) Mukatshi dia ima yene, tuajiya gutanga Ndunge jia athu (philosophie), nzala ya gukhala nu ima yavula-vula, nu ikombelelo ya mambo ya ha mavu awa.

JUILLET 8-14

UMONYI UDI MU MBIMBI YA NZAMBI | 1 TESALONIKE 1-5

“Landulenu Gudikolesa nu Gudihana Ngolo”

(1 Tesalonike 5:11-13, NWT) Hene, landulenu gudikolesa nu gudihana ngolo gifua muanatshita gale. ¹² An’etu, tudi gumitoga ha gunemesa athu adi mutshita mudimo wakola mukatshi dienu, anyi ana gumituameza mu Fumu nu ana gumitemesa; ¹³ khalenu guahana lukuma luavula, nu guzumba guagasue mukunda nu mudimo wawo. Khalenu nu guhuima mukatshi dienu.

w11-F 15/6 diyiji 26 par. 12

Khalenu ‘Munemesa Athu adi Mutshita Mudimo Wakola Mukatshi Dienu’

¹² “Gutuameza” hungu gushigo mukotelesa phamba gulongesa. Mukanda wa 1 Timote 3:4 udi muzuelela nji mbimbi gutuameza. Mupostolo Phaula udi muzuela egi mukulu udi naye gukhala “muthu wana gutuameza enya inzo yenji mu luholo luabonga, nu udi nu ana adi mutumaga nu gunemesa guagasue.” Mu verse eyi, mbimbi “gutuameza” ishigo mukotelesa phamba gulongesa an’enji. Uvi idi mukotelesa nji gutuameza fami nu “gukhala nu ana adi mutumaga.” Yadiago, akulu ana gutuameza hungu luholo ana gukuatesa aphangi agasue a mu hungu ha gutumagela Yehowa.​—1 Tim. 3:5.

w11-F 15/6 diyiji 28 par. 19

Khalenu ‘Munemesa Athu adi Mutshita Mudimo Wakola Mukatshi Dienu’

¹⁹ Gula waheta kado gamoshi ngenyi galondewe phamba mukunda nu aye, itshi mbawukalagala? Mbawukalegela kado gene ha gumonesa egi udi musuanguluga nago, ishigo ngenyi? Mu njila ya Yesu Klisto, Yehowa waguhanele ‘kado gadi athu.’ Luholo lutshi wajiya gumonesa egi wana gusuanguluga nu akulu atombewe mu hungu? Tegelela muabonga akulu tangua adi mutshita ba diskur, tumagela nji ndaga ana gulongesa. Hana komantere jiawaha mu gudibungisa gua mu hungu. Dihane mu mudimo wa gulongesa udi ene mutuameza. Gula mukulu mumoshi waguhana longo (conseil), muhane mvudi yavula, muwambele nji gubonga wahetele mu longo diene. Gula mukulu udi mutshita mudimo wakola mukunda nu hungu, jiya egi mukaji’enji nu an’enji ana gutshigina egi asala ene hakhawo, amubembele tangua dia gudihana mu milonga ya mu hungu. Hene, khala muhana mvudi yavula gudi enya fami ya akulu a mu hungu dienu.

(1 Tesalonike 5:14, NWT) Gukhanda iko, an’etu, tudi gumibubila egi: Temesenu enya mualu, wambelenu athu adi nu gikenene mbimbi jidi mutulula mutshima, kuatesenu athu adi aleba, khalenu nu guhuiminyina gudi athu agasue.

w17.10-F diyiji 10 par. 13

“Guzumba . . . mu Makalegelo nu mu Giamatshidia”

¹³ Kuatesenu athu adi aleba. Gula tushigo nu guzumba gua giamatshidia, mbayikhala lamba ha gutumagela mukhuala owu wa Biblia udi muzuela egi, “kuatesenu athu adi aleba, khalenu nu guhuiminyina gudi athu agasue.” (1 Tes. 5:14) Athu avula anyi akhala nu gutshigina gualeba, ana gubua enya ngolo mu masugu adi muza. Uvi ako, yana gutoga egi tuamonesele guhuiminyina, nu tuakuatese ha gukolesa gutshigina guawo. Hene, tuajiya guzuelela nawo matangi a Biblia ha guakolesa; tuajiya guatoga ha guya nawo mu mudimo wa gulongesa, nga guzula tangua dia guategelela. Luko, hafundo dia gutangiza phamba egi phangi wa yala nga wa mukhetu udi “wakola” nga “waleba,” tudi naye gujiya egi mukut’etu agasue tuakhala athu akola, nu tuakhala aleba. Mupostolo Phaula nji wakhalele mujiya egi wakhalele nu guleba guenji. (2 Kol. 12:9, 10) Hene, mukut’etu agasue tuajiya guheta gubonga mu ukuateshi wa aphangi’etu a Aklisto.

w15-F 15/2 diyiji 9 par. 16

Landula Khadilo dia Yesu dia Gudibulumuisa nu dia Gisemo

¹⁶ Mbimbi jietu. Gukhala nu gisemo gudi athu ako guana gututuma ha guwambela athu adi nu gikenene “mbimbi jidi mutulula mutshima.” (1 Tes. 5:14) Itshi tuajiya guzuela ha gukolesa athu adi nu gikenene? Ha guakolesa, tudi naye guawambela egi tuana guazumba, nu tuana gudisagesa diago mukunda nu ene. Tuajiya guashimana mu giamatshidia giagasue ha guakuatesa ha gumona makalegelo nu ndaga jiawaha ana gutshita. Tuajiya guawambela luko egi Yehowa waananele gudi Mun’enji Yesu, handaga adi nu ndando yavula gu meso enji. (Yone 6:44) Tuajiya guawambela egi Yehowa wana gudisagesa muavula mukunda nu akombeledi enji adi nu ‘gikenene giavula.’ (Ngi. 34:18) Mbimbi jietu jia gisemo jiajiya gusaga mitshima ya athu adi nu funu ya ukuateshi.​—Ish. 16:24.

Kamba Ndaga Jiko jia Ndando jia mu Nyuma

(1 Tesalonike 4:3-6, NWT) Nzambi udi mutshigina egi mukhale athu a gijila nu mudikande gu uthambi. ⁴ Muthu nu muthu mukatshi dienu udi naye gujiya luholo lua gutuameza muila wenji mu gijila nu mu ginemua, ⁵ uvi ndo mu ngina, nu nzala yakola ya gubungisa muila idi lamba ha gukanga mutshima gifua mudi mutshita ifutshi ishigo mujiya Nzambi. ⁶ Mu ndaga eyi, nga muthu mumoshi gashigo naye gutshitshila phangi’enji gubola nga gukuata idi mutala monyo wenji, handaga Yehowa wana guhana ndola mukunda nu ndaga eji jiagasue, gifua luholo tuamiwambele gutuama nu tuamitemesele.

it-1-F diyiji 921 par. 2

Uthambi

Uthambi udi gubola gumoshi guakoma guajiya gutshita egi muthu akayewe (azolewe) mu hungu dia Uklisto. (1Kol 5:9-13; Heb 12:15, 16) Mupostolo Phaula udi muzuela egi Muklisto udi mukalagala uthambi, udi mutshitshila muila wenji gubola, handaga udi mukalegela muabola itshinyi yenji ya gubungishila muila. Muklisto muene wana gubolesa nji nyuma yenji, wana gubata usala mu hungu dia Nzambi. Luko, wajiya guheta misongo yajiya gumubatela gufua. (1Kol 6:18, 19) Wana gutshitshila aphangi’enji a Aklisto gubola (1Tes 4:3-7) luholo 1) gana gubata usala mu hungu nu ganago gunemesa lukuma lua hungu (Heb 12:15, 16), 2) ganago gunemesa mukhetu nga yala gatshitshi nenji uthambi. Gula muene udi ndumbu, mbagashigo mukhala luko waphelegeta tangua mbaadizula mu ulo nu mulumi’enji nga nu mukaji’enji, 3) wana gubolesa lukuma lua fami yenji, 4) wana gutshitshila mvuaji jienji gubola; wana gukalagala nji gubola gudi yala nga mukhetu, nga fiancé wa muthu atshitshi nenji uthambi. Muene gashigo mushiya mikhuala ya muthu, handaga matangua ako muthu ganago guhana ndola gudi muthu watshitshi uthambi. Uvi muene udi mushiya mikhuala ya Nzambi wana guhana ndola gudi muthu watshitshi gubola.​—1Tes 4:8.

(1 Tesalonike 4:15-17, NWT) Handaga milonga tudi gumiwambela mu gudivua nu mbimbi ya Yehowa yenyeyi: Esue athu tuasala nu monyo uu nu gu guza gua Fumu, mbatudiangigo gutuama dia athu afuile gale; ¹⁶ handaga Fumu hakhenji mbawubuluga mu dilu nu mulolo wa guhana mikhuala, nu dijui dia fumu wa anjelo wabalega ako, nu gudila gua phungi ya Nzambi. Athu afuile mu gudivua nu Klisto, mbaafuzumuga athu a thomo. ¹⁷ Hangima, esue athu tudi nu monyo nu mbatuhuluishiwa, mbatuzanguiwa hamoshi nu ene mu matuta ha gutagana nu Fumu gosa. Ngenyi, mbatukhala nu Fumu tangua diagasue.

w15-F 15/7 diyiji 18-19 par. 14-15

“Guhuluishiwa Guenu Guasuena Hehi”!

¹⁴ Itshi mbayikalegewa tangua Goga wa gu Magoga mbasendesa guluisa akombeledi a Nzambi? Matayo nu Mako asonegele ndaga yene egi: “[Mun’a Muthu] mbawutuma anjelo nu mbawubungisa athu anyi gatombele sendese gu khanda jiwana jia mavu, gu songi nu songi ya mavu.” (Mako 13:27, NWT; Mat. 24:31) Gubungisa ogu gushigo mutadila gubungisa gua gudiangela gua Aklisto ambiwe gale maji mu nyuma. Gushigo nji mutadila gumbiwa gua njimbu ya gisugishilo gudi Aklisto ambiwe maji mu nyuma anyi adi ha mavu. (Mat. 13:37, 38) Gumbiwa gua njimbu mbagukalegewa gutuama egi lamba diakoma disendese. (Yat. 7:1-4) Henyaha, gubungishiwa gutshi gudi muzuelela Yesu mu verse eyi? Yesu udi muzuelela tangua dinyi Aklisto 144 000 ambiwe maji mu nyuma adi ha mavu mbaheta gishimbigo giawo gia guya mu dilu. (1 Tes. 4:15-17; Yat. 14:1) Ndaga yene mbayikalegewa tangua Goga wa gu Magoga mbagasendesa guluisa akombeledi a Nzambi. (Ezek. 38:11) Hangima, mbimbi eji jia Yesu mbajitagenesewa. Wazuelele egi: ‘Mu tangua diene, athu adi abonga gu meso a Nzambi mbaahenya gifua kumbi mu Ufumu wa Shawo.’​—Mat. 13:43.

¹⁵ Ndaga eyi idi mukotelesa egi Aklisto ambiwe maji mu nyuma mbaya mu dilu nu muila wawo wa umuthu ba? Ikombelelo yavula yana guzuela egi Aklisto mbaakatudiwa ha mavu ha guya mu dilu nu muila wawo. Ngenyi, ana gutangiza egi Yesu mbawuvutuga nu muila wa muthu ha guhinyina mavu. Uvi, Biblia idi muzuela haphelo egi ‘gijiyishilo gia Mun’a muthu’ mbagimonega mu dilu, Yesu mbawuza “mu matuta a mu dilu.” (Mat. 24:30) Mbimbi eji mbadi jidi mumonesa egi Yesu mbagashigo muza nu muila wa muthu. Luko, ‘muila nu mahatshi yajiyilego guhinyina Ufumu wa Nzambi.’ Hene, Aklisto anyi mbaya mu dilu adi naye thomo ‘gusombegesewa, dishimbu ndo, mu gukamuna gua meso, hadila phungi ya gisugihilo.’ (Tanga 1 Kolinto 15:50-53.) Mu longo edi, tushigo mukalegela mbimbi “guzudiwa” handaga idi muhana matangi abola. Ikhale ngenyi, Aklisto ambiwe maji mu nyuma anyi adi ha mavu, mbabungishiwa mu tangua dimoshi nu dishimbu ndo.

JUILLET 15-21

UMONYI UDI MU MBIMBI YA NZAMBI | 2 TESALONIKE 1-3

“Mushiyi wa Mikhuala Wajiyiwa”

(2 Tesalonike 2:6-8, NWT) Henyaha, mudi mujiya gima gidi mukanga muthu wabola njila, handaga muene mbawumonega mu tangua diahagewe mukunda nu muene. ⁷ Ngolo jia gusuega jia gubola jiasendesele gale gukalagala mudimo, uvi ndaga eji mbajibua khuta gula muthu udi mujikuata wakatudiwa. ⁸ Ngenyi mu tangua diene, mushiyi wa mikhuala mbawumuenega. Fumu Yesu mbawumushiya nu nyuma ya kano dienji, mbawumubuisa gima gia githuhu tangua gukhala guenji mbagumonega.

it-1-F diyiji 221 par. 5

Gujinginyina Gudi Nzambi

Mu verse eyi, gudi nu ndaga imoshi ya gushimana idi yagudisha diago nu ‘ndaga ya gijila ya Yehowa yasuegewe.’ Ndaga yene idi “ngolo jia gusuega jia gubola.” Ndaga yene yakhalele ya gusuegewa gudi Aklisto a giamatshidia handaga mu tangua dia mupostolo Phaula, “mushiyi wa mikhuala” gakhalelego diago mumonega nu mujiyiwa haphelo. Ikhale “mushiyi” muene wasendesa gujiyiwa, athu avula mbashigo gumujiya handaga muene mbawukalagala ndaga jiabola mu jina dia Nzambi ha gumonesa egi udi wagujinginyina gudi Nzambi. Ndaga yene mbayikhala diago apostasie handaga ishigo gujinginyina gua giamatshidia gudi Nzambi. Mupostolo Phaula wazuelele egi mu masugu enji, “ngolo jia gusuega jia gubola” jiakhalele jiasendesa gale gutshita mudimo, handaga mu hungu dia Uklisto guakhalele nu athu akhalelego munemesa mikhuala. Ndaga yene yakhalele naye gubata apostasie mu hungu. Uvi Yesu Klisto mu tangua dia gukhala guenji, wakatudile muthu wakhalele mubata apostasie mu hungu. “Muthu” muene udi mutuamezewa gudi Satana, mbawudizangula “holu dia muthu wagasue udi mutamegewa egi ‘nzambi’ nga gima athu ana gukombelela.” Hene, mbalagaji owu wakoma wa Nzambi, wago Satana wana gukalegela, mbawudimba athu nu mbawushiyisa athu avula ana gulandula makalegelo enji. “Mushiyi wa mikhuala” mbawudimba diago athu handaga gubola guenji mbagusuegewa mu gujinginyina gua mambo gakhala nago gudi Nzambi.​—2Tes 2:3-12; fuanesa nu Mat 7:15, 21-23.

(2 Tesalonike 2:9-12, NWT) Uvi gukhala gua mushiyi wa mikhuala gudi gudivua nu mudimo wa Satana, hamoshi nu ndaga jia gushimana nu ndaga jia mambo, nu ijiyishilo ¹⁰ nu mambo agasue ashigo nu nduedi mukunda nu athu a gutota, gifua ndola handanga atshiginyilego nu azumbilego giamatshidia hagula ahuluishiwe. ¹¹ Gishina giene Nzambi wana gubemba egi ngolo jia mambo jiadimbe, hagula atshigine ndaga jia mambo, ¹² hagula asophesewe mukuta wawo agasue handaga atunyile ndaga jia giamatshidia, asuangulugile nu ndaga jishigo jia nduedi.

it-2-F diyiji 255 par. 7

Mambo

Yehowa Nzambi wana gubemba egi “ngolo jia mambo” jidimbe athu ana gusuanguluga nu mambo “hagula atshigine ndaga jia mambo,” hafundo dia gutshigina lukuma luabonga luatadila Yesu Klisto. (2Tes 2:9-12) Ndaga eyi idi mumonega muabonga mu mulonga wabuidile Fumu Ahaba mu Isalele Ikulu. Ba profete a mambo amuwambelele egi mbawubinga ita mbayilua muene nu Lamota mu mavu a Gileada. Uvi Mikaya, profete wa Yehowa wazuelele gutuama egi lamba mbadiabuila. Luholo profete Mikaya wayimonele mu vizio, Yehowa wahanele njila egi muanjelo wenji mumoshi abue ‘nyuma idi muhuiga’ mu kano dia baprofete a Ahaba. Mu guzuela guko, muanjelo muene mbawutuma baprofete a Ahaba hagula azuedigo ndaga jia giamatshidia, uvi akhale muzuela ndaga jidi ene mutshigina nu eji Ahaba wakhalele muzumba gutegelela. Ngatshima Yehowa wadiangele gutemesa Ahaba, muene watshiginyile genji gulandula mambo a baprofete enji, hene yamubatele gufua.​—1Maf 22:1-38; 2Gudi 18.

Kamba Ndaga Jiko jia Ndando jia mu Nyuma

(2 Tesalonike 1:7, 8, NWT) Uvi enue athu adi musagesewa, Nzambi mbawumituluisa mutshima nu esue hamoshi tangua mbadimonega Fumu Yesu gosa nu anjelo enji a ngolo ⁸ mu tshiuya tudi mulema, tangua mbadivutula muene gubola gudi athu ashigo mujiya Nzambi nu gudi athu anago gutumagela lukuma luabonga lua Fumi’etu Yesu.

it-1-F diyiji 890 par. 6

Tshiuya

Phetelo wasonegele gamba: ‘Dilu nu mavu ya tangua edi idi mubambewa mukunda nu gushiyiwa mu tshiuya.’ Ha gutadila verse jiko nu verse jidi gutuama nu gungima dia 2 Phetelo 3:7, idi yadiago egi tshiuya adi muzuelela tudi tshiuya tua gifuanesa, yakotelesa egi gushiyiwa gua mayilago. Mvula ya Nowa yashiyilego dilu nu mavu, uvi yashilyile phamba athu abola. Luholo lumoshi nji, gumonega gua Yesu Klisto nu anjelo enji a ngolo mu tshiuya tudi mulema, mbagukotelesa egi gushiyiwa gua mayilago phamba gua athu abola, nu gua ulondegi wa khuta udi athu ene mukatshi.​—2Phet 3:5-7, 10-13; 2Tes 1:6-10; fuanesa nu Yesh 66:15, 16, 22, 24.

(2 Tesalonike 2:2, NWT) mubembigo egi mitshima yenu idisagese mu phushi nu muvue woma handaga athu adi muzuela egi lusugu lua Yehowa luaza. Ikhale ene adi muzuela ngenyi mu njila ya mbimbi ya nyuma, nga mu njila ya mbimbi ya mu kano nga mu njila ya mukanda udi mumonega gifua wakatuga gudi esue.

it-1-F diyiji 1188 par. 1

Mbimbi jia nyuma

“Mbimbi jia Nyuma”​—Jia Giamatshidia nu Jiamambo. Mu mikanda yasonegele apostolo, akhalele mukalegela mbimbi ya zuelelo dia Greki pneuma (nyuma) mu luholo luko. Tufezegese gale. Mu 2 Tesalonike 2:2, mupostolo Phaula wawambelele Aklisto a gu Tesalonike egi mitshima yawo idisagesago gula “athu adi muzuela egi lusugu lua Yehowa luaza. Ikhale ene adi muzuela ngenyi mu njila ya mbimbi ya nyuma, nga mu njila ya mbimbi ya mu kano nga mu njila ya mukanda udi mumonega gifua wakatuga gudi esue.” Idi mumonega haphelo egi mu verse eyi, mupostolo Phaula udi mukalegela mbimbi ya Greki pneuma (nyuma) ha guzuelela luholo lua guta maga nu athu, gifua “guawambela mbimbi mu kano” nga ndo guasonegela “mukanda.” Gishina giene, mukanda umoshi Theologisch-homiletisches Bibelwerk (diyiji 110) wabalumuiwe gudi J. P. Lange, udi muzuela egi, tangua mupostolo Phaula wazuelele egi “mbimbi ya nyuma,” wakhalele muzuelela ndaga jiajiya gukhala jiazuelewe mu njila ya nyuma, nga ndaga jiakhalele jia mambo, nga ndo ndaga jiazuelele baprofete. Mukanda Les deux épîtres de saint Paul aux Thessaloniciens, wasonegewe gudi Masson, udi muzuela egi, mbimbi “Gudi nyuma, jidi muhana matangi a muthu adi muwambela ndaga mu vizio, gifua luholo luakhalele mukalagala baprofete mu ikombelelo ya mu tangua dikulu.” Mu verse ya 1Tesalonike 2:2, Biblia jiko jiana gubalumuna mbimbi pneuma egi “nyuma.” Uvi Biblia jiko jiana gubalumuna egi “mbimbi yamonesewe gudi nyuma” (PV), “profesi yamonesewe mu vizio” (TOB), “ndaga yamonesewe gudi nyuma” (Od; Sg), “mbimbi ya nyuma” (NWT).

JUILLET 22-28

UMONYI UDI MU MBIMBI YA NZAMBI | 1 TIMOTE 1-3

“Tshigina Gukalagala Mudimo Wabonga”

(1 Timote 3:1, NWT) Eyi idi mbimbi ya gushila mutshima: Gula muthu watshigina gubua mukulu, muene udi mutshigina mudimo umoshi wabonga.

w16.08-F diyiji 21 par. 3

Udi Mumona Funu ya Gukula mu Nyuma Ba?

³ Tanga 1 Timote 3:1. Mupostolo Phaula wakhalele mushimana aphangi akhalele ‘mutshigina gubua’ akulu mu hungu. Gula muthu watshigina guzula gima gidi gualeha nu muene, udi naye gukalagala ngolo. Matangua ako yana gutoga egi asunune koko guenji ha gukuata gima giene. Itshi tuajiya guzuela mukunda nu phangi udi mutshigina gubua mukuateshi wa mudimo mu hungu? Muene udi naye gukalagala ngolo ha gulondega makalegelo enji a Uklisto. Gula muene wabua mukuateshi wa mudimo, udi naye gulandula gukalagala ngolo ha gukudisa makalegelo ajiya gumukuatesa ha gubua mukulu mu hungu.

(1 Timote 3:13) Handaga akuateshi adi mutshita mudimo wawo muabonga mu hungu adi munemesewa, nu ajiya guzuela nu ngolo jiagasue mukunda nu gutshigina tudi nago mu Klisto Yesu.

km-F 12/78 diyiji 4 par. 7

Ene ‘Adi Munemesewa’

⁷ Idi ndaga yaleba ha gumona mukunda natshi mupostolo Phaula wazuelele egi athu a luholo elu adi naye “gunemesewa.” Uvi ishigo naye gukhala gifua luholo athu ana gunemesewa mu ikombelelo ya ha mavu awa. Akuateshi a mudimo “adi mutshita mudimo wawo muabonga mu hungu,” ana guheta gishimbigo gudi Yehowa nu Yesu. Luko, aphangi a mu hungu ana guanemesa nu ana guakuatesa. Yadiago, ana “guzuela nu ngolo jiagasue mukunda nu gutshigina tudi nago mu Klisto Yesu.” Ana gutagenesa ginemo giawo muabonga. Aphangi a mu hungu ana guanemesa mukunda nu mudimo wawo wawaha ana gukalagala. Gutshigina guawo guakhala guakola, nu anago guvua woma ha gulongesa athu ako.

Kamba Ndaga Jiko jia Ndando jia mu Nyuma

(1 Timote 1:4, NWT) luko, ahagigo matshui awo mu ndaga jia mambo nu mu senga jia iphuta. Ndaga jia luholo elu jianago guzola nga gima gimoshi gia ndando, uvi jiana guzola khuta matangi a phamba, ha fundo egi jizole gima gimoshi giakatuga gudi Nzambi giatadila gutshigina.

it-1-F diyiji 979-980 par. 2

Senga ya Giphuta

Gulonguga nu guzuelela muavula ndaga jia luholo elu yakhalelengo muzola nga gima gimoshi gia ndando. Yakhalele mukalegewa muavula tangua muposto Phaula wasonegele Timote mukanda. Yakhalelego luko nu ndando egi athu azuelele senga jia iphuta ha gumonesa fundo diakatugile ene, handaga mu hungu dia Uklisto, Nzambi gakhalelego luko mukhaphumuna enya Yuda nu athu akhalelego enya Yuda. (Gal 3:28) Luko, senga jia iphuta jiakhalele jiamonesa gale egi Klisto mbawuvalewa mu giphuta gia Davidi. Tangua Phaula wasonegele mbimbi eji, matangua azonda gungima, dimbo dia Yelusalema diakhalele naye gumuangewa hamoshi nu mikanda ya giphuta gia enya Yuda. Nzambi gajiyilego gubamba mikanda yene. Hene, Phaula wakhalele mutshigina egi Timote nu mahungu a Uklisto, abembigo ndaga jia ndando ha gukamba senga jia iphuta nu ndaga jiko jishigo nu ndando, handaga jiajiyilego guakuatesa nga hazonda ha gukudisa gutshigina guawo. Senga jia iphuta jiasonegewe mu Biblia jidi jiatagana ha gumonesa egi Yesu udi Masiya. Yene senga idi nu ndando yavula gudi Aklisto. Uvi, senga jiko jia iphuta jidi mu Biblia jiana gutukuatesa ha gujiya egi ndaga jiasonegewe mu Biblia jiakhala jia giamatshidia. Jiana gumonesa luko egi mene jia athu Biblia yana guzuelele jiakhala mene jia giamatshidia lume.

(1 Timote 1:17) Ginemua nu lutumbu ikhale ivo nu ivo gudi Fumi’a indongo yagasue, udi gajiyilego gufua, udi gajiyilego gumonega, Nzambi mumoshi’a mumoshi. Amen.

cl-F diyiji 12 par. 15

“Yowu Muene Nzambi Wetu”

¹⁵ Yehowa phamba wana gutamegewa egi, “Fumi’a indongo yagasue.” (1 Timote 1:17; Yatuwuwe 15:3) Idi mukotelesa itshi? Yehowa wana gujinga mayilago. Muene gashigo nu gisendeselo nga nu gisugishilo. Ikhale esue athu ashigo atagana, tuanago gukotelesa ndaga eyi. Mukanda wa Ngimbo 90:2 udi muzuela egi: “Aye wakhalele Nzambi wa ivo nu ivo, nu mbawukhala gaye Nzambi wa masugu agasue.” Yadiago, Yehowa gakhala ndo nu gisendeselo. Muene wakhala guene ivo yagasue. Gishina giene Biblia yana gumutamega egi “Mukulutu wa Masugu.” Muene wadiangele gujinga ivo nu ivo gutuama egi muthu wagasue nga ndo gima giagasue gifugiwe! (Danyele 7:9, 13, 22, NWT) Nanyi wajiya diago gusha giphapha (gumba maya) mukunda nu ufumu wenji wa gukhala Fumu Wabalega Gukoma?

JUILLET 29–AOUT 4

UMONYI UDI MU MBIMBI YA NZAMBI | 1 TIMOTE 4-6

“Khala Wagujinginyina Gudi Nzambi Uvi gu Umonyi Ndo”

(1 Timote 6:6-8, NWT) Yadiago, gukhala wagujinginyina gudi Nzambi gudi nu ndando yavula gula tudi musuanguluga nu ima tudi nayo. ⁷ Handaga tuajilego nga nu gima gimoshi ha mavu awa, nu mbatuyigo nga nu gima gimoshi. ⁸ Hene, gula tudi nu ima ya gudia nu milele ya gusudiga, tudi naye gusuanguluga nu ima eyi.

w03-F 1/6 diyiji 9 par. 1-2

Itshi Yajiya Gutukuatesa ha Gukhala nu Gusuanguluga?

Gima giakhalele mukuatesa mupostolo Phaula ha gukhala diago nu gusuanguluga guavula gidi egi, muene wakhalele mujiya gusuanguluga nu ima gakhalele nayo. Uvi, gusuanguluga nu ima tudi nayo gudi mukotelesa itshi? Guakotelesa egi gusuanguluga nu ima yajiya gutukuatesa diago ha gujinga. Mukunda nu ndaga yene, mupostolo Phaula wawambelele Timote gamba: “Yadiago, gukhala wagujinginyina gudi Nzambi gudi nu ndando yavula gula tudi musuanguluga nu ima tudi nayo. Handaga tuajilego nga nu gima gimoshi ha mavu awa, nu mbatuyigo nga nu gima gimoshi. Hene, gula tudi nu ima ya gudia nu milele ya gusudiga, tudi naye gusuanguluga nu ima eyi.”​—1 Timote 6:6-8.

Tujiyenu egi, mupostolo Phaula wamonesele gudivua gudi mukatshi dia gukhala wagujinginyina gudi Nzambi nu gusuanguluga nu ima tudi nayo. Wamonesele luko egi gusuanguluga gua giamatshidia guanago gukatuga mu umonyi nga mu ima iko tudi nayo. Tuajiya gukhala nu gusuanguluga gua giamatshidia, gula tudi agujinginyina gudi Nzambi, nga ndo gula tudi musha mudimo wenji ha fundo dia thomo. “Ima ya gudia nu milele ya gusudiga” idi ima yakhalele mukuatesa Phaula ha gulandula gukhala wa gujinginyina gudi Nzambi. Gima giakhalele mukuatesa Phaula ha gukhala nu gusuanguluga gidi guzegemena guenji gudi Yehowa mu ndaga jiagasue akhalele mutagana najio.

(1 Timote 6:9) Uvi athu adi mutshigina gukhala amonyi, ana gubua mu gulolelewa, ana gukuatewa mu muheto wa ngina jiavula jiaheya nu jiabola jidi mubuisa athu mu gubola nu jidi muanethela gufua.

g-F 6/07 diyiji 6 par. 2

Gutshigina Gukhala Muenya Umonyi Guajiya Gutubatela Malamba

Idi yadiago egi athu avula anyi ana gukamba gukhala enya umonyi anago gufua. Uvi, tangua adi gudihana ha gukamba umonyi wene, ajiya gutotesa ima iko ya ndando ya monyo wawo. Luko, usageshi ana gutagana nawo gu mudimo, nu milonga ya falanga, yana guakatesa muto nu misongo ya kiandji (estomac), nu yana guabandesa gikole-kole. Ngenyi, ajiyilego gujinga muavula. Gungima, muthu wajiya gukamba gusombegesa, uvi mu tangua diene malamba ajiya gukhala amubuila gale. Mukaji’enji gajiyilego luko gumushila mutshima, an’enji ajiya gukhala nu malamba ako, muene hakhenji wajiya nji gukata. Malamba ako ajiya gawo guhua, uvi mbayitoga ndaga jiavula. Athu avula ataganele nu ndaga jia luholo elu, “adihuile gikenene giavula mu mitshima yawo.”​—1 Timote 6:10.

(1 Timote 6:10) Handaga guzumba gua falanga gudi muji wa ndaga jiagasue jiabola. Athu avula akhalele nu ngina yavula ya guheta ima, atotesele gutshigina guawo, adihuile gikenene giavula mu mitshima yawo.

g-F 11/08 diyiji 6 par. 4-6

Ndaga 6 Tudi Naye Gukalagala ha Gubinga mu Lujingu

Gifua luholo tuayimonyi mu longo dia thomo, athu ana gutangiza egi ha gubinga mu lujingu, adi naye gukhala nu umonyi. Hene, ana gudihana muavula ha gukamba umonyi. Uvi gukamba umonyi gudi gifua muthu udi mulandula muhehe. Hene, athu ana gukamba gukhala nu umonyi, akhala ndo nu gusuanguluga gua giamatshidia, nu ana gudibatela malamba avula. Ako ana gubemba fami jiawo ha gukamba umonyi, nu yana gubolesa ufuta wawo nu mafuta awo. Ako anago gumona tulo gu meso. Gikenene nu ndaga jiko ana gutagana najio gu mudimo, yanago guabandesa tulo. Mukanda wa Mulongeshi 5:12 udi muzuela egi: ‘Muenya mudimo nga wadia yazonda nga wadia yavula udi mubanda tulo tuabonga, uvi muenya umonyi ngatshima wadia muavula udi mubanda gikolekole.’

Falanga jiakhala fumu mumoshi wabola, nu jiana guhuiga athu. Yesu Klisto wazuelele ndaga yatadila “guhuiga gua umonyi.” (Mako 4:19) Umonyi wana gumonesa athu egi mbakhala nu gusuanguluga, uvi wanago guahana gusuanguluga gua giamatshidia. Wana guahana phamba nzala ya gukhala nawo wavula. Mukanda wa Mulongeshi 5:10 udi muzuela gamba: ‘Muthu udi muzumba falanga gana gujikutago.’

Yadiago, guzumba gua falanga guanago gubatela muthu gusuanguluga gua giamatshidia. Uvi guana guhana phamba gikenene, khabu nu shidi. (Ishima 28:20) Ha gubinga mu lujingu nu gukhala nu gusuanguluga, tudi naye gukhala nu guzumba, nu makalegelo abonga, nu khadilo dia guhana, nu dia gutotesela athu ako gubola, nu gudihana mu ndaga jia mu nyuma.

Kamba Ndaga Jiko jia Ndando jia mu Nyuma

(1 Timote 4:2) Ene mbaphambumuishiwa gudi enya mambo, anyi mutshima wawo wafuile gale gifua wawotshiewe mu kiamo gia tshuya.

lvs-F diyiji 23-24 par. 17

Gukhala nu Mutshima Wawaha Gutuama dia Nzambi

¹⁷ Mupostolo Phetelo wasonegele egi: “Khalenu nu mutshima wawaha.” (1 Phetelo 3:16, NWT) Uvi ndaga ya gikenene idi egi, athu ako ana gulandula gushiya mikhuala ya Yehowa. Mutshima wawo wanago guawambela egi adi mutshita gubola. Mupostolo Phaula wazuelele egi mutshima wa luholo elu “wafuile gale gifua wawotshiewe mu kiamo gia tshiuya.” (1 Timote 4:2) Wahile gale tshiuya ba? Gula tshiuya tuaguhia, gilema gia hama hene giana gukola tenyi, wajiyilego guvua nga gima hene. Luholo lumoshi nji, gula muthu udi mulandula gutshita ndaga jiabola, mutshima wenji wana gubua gifua “wawotshiewe” gale. Wanago gumutemesa luko gu gubola.

(1 Timote 4:13, NWT) Ha udi munengena guza guami, dihane ha gutanga ha meso a athu avula, nu ha guakolesa nu ha gulongesa.

it-2-F diyiji 122 par. 1-2

Gutanga ha Meso a Athu Avula

Mu Hungu dia Uklisto. Mu siekle ya thomo, athu azonda phamba akhalele nu rulo jiavula jia Biblia. Gishina giene gutanga ha meso a athu avula guakhalele nu ndando. Phaula watogele egi mikanda yenji itangewe ha meso a athu avula mu gudibungisa gua mu hungu. Wawambelele nji Aklisto ha guditumina mikanda yene hagula itangewe nji mu mahungu ako. (Kol 4:16; 1Tes 5:27) Mupostolo Phaula wawambelele Timote, wago wakhalele mukulu wa muvuala, ha gudihana ha “gutanga ha meso a athu avula, nu ha guakolesa nu ha gulongesa.”​—1Tim 4:13.

Muthu udi mutanga ha meso a athu avula, udi naye gutanga kiawaha lume. (Hab 2:2) Gutanga guana gulongesa; hene, muthu udi mutanga udi naye gutala muabonga ndaga jidi muene mutanga. Udi naye nji gukotelesa muabonga matangi a muthu wasonegele ndaga jiene. Luko, udi naye gutema tangua adi mutanga hagula ndaga jidi muene mutanga jihanyigo matangi abola gudi athu adi mutegelela. Mukanda wa Yatuwuwe 1:3 udi muzuela egi, athu adi mutanga profesi eyi mu mbimbi yakola, nu athu adi mutegelela mbimbi jiene nu gujitumagela, mbakhala nu gusuanguluga.