Aphangi Mbadi Atombewa ha Gukalagala Mudimo gu Hunji dia Akulu Atuameji

GU ASSEMBLEE générale akalegewe mu lusugu lua Samano 5 Octobre 2024, kominike imoshi yahanewe egi: Phangi Jody Jedele nu Jacob Rumph atombewa ha gukalagala mudimo gu Hunji dia Akulu Atuameji dia Matemue a Yehowa. Aphangi ene ana kalegela Yehowa mudimo nu mutshima umoshi sendese mualeha.

Phangi Jedele wavualewe gu Missouri gu États-Unis, mvuaji njienji jiakhalele Matemue a Yehowa. Mu dimbo diakhalele enya fami yenji guakhalelego nu Matemue a Yehowa avula. Gishina giene wayile gudibungisa nu aphangi akhalele muza mu membo a gudisha ha gulongesa nawo mu dimbo diene. Wasuangulugile muavula ha gumona guzumba gua aphangi nu luholo akhalele mu gudivua. Ndaga yene yamutumine ha guzula desizio dia gukombelela Yehowa. Hene wabatijiwe mu lusugu lua samano 15 Octobre 1983 hakhalele muene muvuala. Wakhalele musuanguluga muavula nu mudimo wa gulongesa, hene hamanesele muene khalasa, wasendesele mudimo wa muvundji wa njila wa tangua diagasue mu Septembre 1989.

Hakhalele muene muvuala, mvuaji jienji jiakhalele gumubata nu phangi’enji wa mukhetu ha guya mutala Betele. Luholo akhalele guabata ha gutala Betele, yaatumine ha gudishila felela dia gutshita mudimo gu Betele. Muyadi awo atagenesele felela diene. Phangi Jedele wasendesele gutshita mudimo gu Betele ya gu Wallkill mu Septembre 1990. Wakhalele thomo mutshita gu service de nettoyage, gungima wasendesele gutshita gu services médicaux.

Mu tangua diene, mahungu a zuelelo dia Espagnole akhalele mukula nu akhalele nu funu ya aphangi a mala. Phangi Jedele wakhalele mukatshi dia aphangi ayile mukuatesa guene, hene wasendesele gulonguga zuelelo dia Espagnole. Masugu azonda gungima, wadimonele nu phangi wa mukhetu Damaris wakhalele muvundji wa njila mu circonscription yawo. Gungima adizudile mu ulo, phangi Damaris wayile gumusanga gu Betele.

Mu 2005 azogele gu Betele ha guya mukuatesa mvuaji jiawo. Mu tangua diene, akhalele avundji a njila a tangua diagasue. Phangi Jedele wakhalele mulongeshi gu Khalasa dia Avundji a Njila, wakhalele nji mutshita gu comité de liaison hospitalier ya mu circonscription yawo nu gu comité yana tala mudimo wa gutunga jinzo jietu (services régionaux développement-construction.)

Mu 2013, phangi Jedele nu mukaji’enji atamegewe luko gu Betele ya gu Warwick ha gukuatesa mu mudimo wa gutunga. Gungima ayile mutshita mudimo gu Patterson nu gu Wallkill. Phangi Jedele wakhalele mutshita gu département yana tala midimo ya gutunga nu gu service d’information hospitalier. Mu Mars 2023, watombewe gifua mukuateshi gu comité pour le service. Phangi Jedele udi muzuela mukunda nu inemo yagasue yahetele muene egi: “Gula waheta inemo ihe-ihe, wajiya gubua tunga-tunga. Uvi mu tangua diene, udi naye gushila Yehowa mutshima handaga muene wana gutukuatesa ha gutagenesa inemo yene.”

Phangi Rumph wavualewe gu Californie gu États-Unis. Tangua diakhalele muene mona wazonda, gin’enji walebele genji mu nyuma, uvi wakhalele mutshita gikhesa ha gumulongesa giamatshidia. Khakha wenji wakhalele mukombelela Yehowa nu mutshima umoshi, givo nu givo phangi Rumph wakhalele muya gumutala. Khakha wenji muene wamukuatesele ha gusuanguluga nu giamatshidia. Tangua phangi Rumph watagenesele ivo 13, watogele ha gusendesa gulonguga Biblia. Wabatijiwe mu lusugu lua Lubingo 27 Septembre 1992 hakhalele muene muvuala. Ndaga yagusuanguluga idi egi, gin’enji wasuangulugile luko ha gukombelela Yehowa nu enya fami yenji agasue asendesele gukula mu nyuma nu abatijiwe.

Tangua phangi Rumph wakhalele muvuala, wakhalele mumona aphangi akhalele mutshita mudimo wa muvundji wa njila nu gusuanguluga. Hene hamanesele muene khalasa, wasendesele mudimo wa muvundji wa njila mu Septembre 1995. Mu 2000 wayile mu gifutshi gia Équateur handaga akhalele nu funu ya alongeshi guene. Guene adimonele nu phangi wa mukhetu Inga, wakhalele muvundji wa njila wakatugile gu Canada, gungima adizudile mu ulo. Gungima, asendesele gukuatesa hungu dimoshi dia gu Équateur diakhalele nu alongeshi azonda. Mangino hungu diene diabuile gale nu alongeshi avula.

Gungima dia masugu, phangi Rumph nu mukaji’enji abuile ba pionye spesiale, gungima asendesele mudimo wa mutadi muwendji. Mu 2011 a atamegele ha gungina khalasa dia 132 dia Gileade. Gungima dia khalasa diawo, a atumine mu ifutshi yavula nu akalegele midimo yavula yagudisha gifua: mudimo gu Betele, mudimo wa gimisionere nu mudimo wa mutadi muwendji. Phangi Rumph wahetele nji luendu lua gulongesa gu Khalasa dia Alongeshi a Ufumu.

Mu tangua dia misongo ya COVID-19 phangi Rumph nu mukaji’enji avutugile gu États-Unis. A atamegele ha gutshita mudimo gu Betele ya gu Wallkill, guene phangi Rumph wahetele formasio ya gutshita mudimo gu Département pour le Service. Gungima a avutudile luko gu Betele ya gu Équateur, phangi Rumph wakhalele mutshita gu komite ya filiale. Uvi mu 2023 a atumine gu Warwick. Mu Janvier 2024, phangi Rumph watombewe ha gubua mukuateshi gu comité pour le service. Phangi Rumph udi muzuela mukunda nu inemo yagasue yahetele muene egi: “Ishigo fundo diana tshita egi muthu asuanguluge nu mudimo udi mutshita muene, uvi athu adi mutshita nawo mudimo, ene ajiya gumukuatesa ha gusuanguluga nu mudimo wene.”

Tudi muhana aphangi awa a mala mersi mukunda nu mudimo wakola ana tshita nu tuana guazumba muavula.​—Fili. 2:29.