Ezela
5 Gungima, profete Hagai nu Zakaliya mujigulu wa Ido azuelele mukunda nu enya Yuda akhalele gu Yuda nu gu Yelusalema mu jina dia Nzambi wa Isalele wakhalele guatuameza. 2 Zolobabele mun’a Shalatiele nu Yeshua mun’a Yosadake asendesele gutunga luko inzo ya Nzambi inyi yakhalele gu Yelusalema; baprofete a Nzambi akhalele nawo ha guakuatesa. 3 Mu tangua diene, Tatenayi guvernere wa mavu a ha Sambua dia Muta* nu Shetale-Bozanai nu mafuta awo a mudimo ajile, ahudile enya Yuda egi: “Nanyi wamihanyi njila ha gutunga inzo eyi nu ha gumanesela mudimo owu?”* 4 Gungima a awambelele egi: “Tuhanenu majina a athu adi mutunga inzo eyi.” 5 Uvi Nzambi wakhalele mubamba* akulu a enya Yuda, hene athu ene a akangelego njila ha gutunga uu nu tangua atumile mbimbi gudi Fumu Daliyuse nu gunengena mukanda wakhalele nu mvutu yenji mukunda nu mulonga wene.
6 Eji ndaga jiakhalele mu mukanda atumidile Fumu Daliyuse gudi Tatenayi guvernere wa mavu a ha Sambua dia Muta nu Shetale-Bozanai nu mafuta enji a mudimo nu atuameji ako a mu mavu a ha Sambua dia Muta; 7 Amutumidile mukanda, asonegele egi:
“Gudi Fumu Daliyuse:
“Moyo Fumu! 8 Tudi gugujiyisa egi tuayile gu provense ya Yuda gu inzo ya Nzambi wakoma, enya Yuda adi mutunga inzo yene nu maseso akoma, adi nji mumba mabaya gu ibayi. Mudimo udi muya gutuama handaga athu adi guwutshita nu gikhesa giagasue. 9 Tuahudile akulu awo egi: ‘Nanyi wamihanyi njila ha gutunga inzo eyi nu ha gumanesela mudimo owu?’* 10 Tuahudile nji majina a athu ene, tuaasonegele hagula ujiye athu adi mutuameza mudimo wene.
11 “Atuhanele mvutu egi: ‘Tudi enya mudimo a Nzambi wafugile dilu nu mavu, tudi mutunga luko inzo yatungiwe ivo yavula yabalega gale, inzo yatungile fumu wakoma wa gu Isalele nu wayimanesele. 12 Uvi, luholo akhakh’etu ahanele Nzambi wa mu dilu khabu, muene waahanele ha mago a Fumu Nebukadenezale wa gu Babilona muenya Kaldea, munu wamuangele inzo eyi nu wabatele athu mu uhiga gu Babilona. 13 Mu givo gia thomo gia uhinyinyi wa Fumu Siluse wa gu Babilona, waahanele njila ha gutunga luko inzo ya Nzambi. 14 Fumu Siluse wazolele nji wolo nu ikadigilo ya utadi wa siliva ya mu inzo ya Nzambi inyi yakhalele mu tempelo ya gu Babilona. Nebukadenezale wazanguile ikadigilo yene mu tempelo gu Yelusalema, wayile nayo mu tempelo ya gu Babilona. Gungima ayihanele gudi Sheshabasale* munu Siluse watombele guvernere. 15 Siluse wamuwambelele egi: “Zula ima eyi, nda uyihage mu tempelo idi gu Yelusalema, enya Yuda atunge luko inzo ya Nzambi ha fundo yakhalele thomo.” 16 Gungima Sheshabasale wajile, wambile fondasio ya inzo ya Nzambi idi gu Yelusalema; sendese mu tangua diene inzo yene idi mutungiwa uu nu mangino, uvi khenji ihua gale ndo.’
17 “Henyaha gula idi ndaga yabonga mukunda nu Fumu Siluse, atume athu ha guya mukamba muabonga ha fundo ana bamba umonyi wa fumu nu mikanda gu Babilona, ha gujiya diago gula muene wahanele njila ha gutunga luko inzo ya Nzambi gu Yelusalema; gungima atuhane matangi’enji mukunda nu mulonga owu.”