Ezela
9 Gungima tangua akalegele ndaga eji, manene ajile gunguwambela egi: “Enya Isalele nu nganga-nzambi nu enya Levi adikhaphumuinego nu athu a mu ifutshi, abembelego nji makalegelo awo abola, makalegelo a enya Kanana nu a enya Hete nu a enya Phelese nu a enya Yebuse nu a enya Amona nu a enya Moaba nu a enya Ejipitu nu a enya Amole. 2 Abuishile ana a akhetu a mu ifutshi yene akaji’awo nu akaji’a an’awo. Uvi ene adi vungu* dia gijila, adibungisa nu athu a mu ifutshi iko. Athu a thomo atshitshi ndaga eyi yabola adi manene nu atuameji ako.”
3 Tangua ngavuile ndaga yene, ngatawile mulele wami nu gazagu gami gashigo nu mago, ngavujile ndambo ya sanga diami nu wevu wami, gungima ngakhalele hashi, ngavuile nji gikenene giavula. 4 Athu agasue anyi akhalele munemesa* mbimbi ya Nzambi wa Isalele angujietele mukunda nu gubola guakalegele athu akatugile mu uhiga, uvi ame ngalanduile gukhala hashi nu gikenene giavula uu nu mu tangua ana hana mulambu wa mbuto mu ngueze.
5 Mu ngueze, tangua ana hana mulambu wa mbuto, ngazugile ha fundo ngakhalele muvua gikenene nu mulele wami nu gazagu gashigo nu mago ganyi ngatawile, ngafugamele, ngathuphuile nji mago gosa gudi Yehowa Nzambi wami. 6 Ngazuelele egi: “Oo Nzambi wami, ngudi muvua musonyi, ngushigo ngatagana ha guthuphula phala yami gutuama diaye. Oo Nzambi wami, gubola guetu guadivudisa ha mito yetu, guakanduga uu nu mu dilu. 7 Gubola guetu guadivudishile muavula diago sendese mu masugu a akhakh’etu uu nu mangino; esue nu mafumu etu nu nganga-nzambi jietu tuahanewe ha mago a mafumu a ifutshi iko, tuashiyiwe nu phogo ya khusa, tuakuatewe mu uhiga, akuyile ima yetu, atuvuishile musonyi mukunda nu gubola guetu, gifua luholo idi mukalegewa mangino. 8 Uvi Yehowa Nzambi wetu watuvuila khenda mukunda nu tangua diazonda, wakuatesa athu asalele nu monyo mukatshi dietu ha gukatuga mu uhiga, watukuatesa nji ha gukhala mu guhuima ha fundo diaye dia gijila ha gutusuanguluisa,* Oo Nzambi wetu, watuhana nji guhuima mu uhiga wetu. 9 Ikhale tudi ahiga, Nzambi wetu gatubembelego mu uhiga; uvi watumonesela guzumba gua giamatshidia gutuama dia mafumu a gu Phelese ha gutuhana ngolo hagula tutunge luko inzo ya Nzambi wetu inyi yamuangewe nu ha gutuhana gibayi gia maseso* gu Yuda nu gu Yelusalema.
10 “Oo Nzambi wetu, itshi tuajiya giwa guzuela mukunda nu ndaga eji jiagasue? Handaga tuatumagelego mikhuala yaye 11 wahanele mu njila ya enya mudimo aye baprofete, wazuelele egi: ‘Gifutshi mudi mutshigina guya muzula gidi gia usala, handaga athu ana jinga muene adi a usala, makalegelo awo abola azalesa diago gifutshi giene nu ndaga jia usala. 12 Gishina giene muhanyigo an’enu a akhetu gudi an’awo a mala, an’enu a mala nji ashigo naye guzula an’awo a akhetu mu ulo. Mushigo naye gutshita ndaga mukunda nu guhuima guawo nga gubonga guawo, hagula mukhale nu ngolo jiavula, mudie ima yabonga ya mu gifutshi nu mugizule mukunda nu an’enu a mala ivo nu ivo.’ 13 Ndaga jiagasue jiatubuidile jiakhalele mukunda nu gubola guetu, uvi aye Nzambi wetu watukalegelego ndaga gifua mudi gubola guetu, wahuluishile athu adi haha mukatshi dietu mu uhiga. 14 Henyaha, tudi naye gushiya luko mikhuala yaye nu gukota gikotelo nu athu adi mutshita ndaga eji jiabola ha gudizula n’awo mu ulo ba? Mbawushigo gutuvuila khabu nu gutushiya mayilago mukut’etu agasue ba? 15 Oo Yehowa Nzambi wa Isalele, udi muthu wabonga handaga watuhuluishile, hene esue tuasalele nu monyo uu nu mangino. Henyaha tudi gutuama diaye nu gubola guetu, handaga ha gutadila ndaga tuatshitshile tuajiyilego gumagana gutuama diaye.”