Ngimbo
Lungimbo lua Davidi. Maskile.*
32 Gusuanguluga gudi nu muthu munu Nzambi watotesa gubola guenji nu watshuigi masumu enji.
2 Gusuanguluga gudi nu muthu munu Yehowa gashigo muwunguluga luko gubola guenji,
munu gashigo nu mambo mu mutshima wenji.
3 Tangua ngatunyile guzuela, muila wangulebele,
handaga ngakhalele mumba isugu lusugu luagasue.
4 Handaga koko* diaye diakhalele gungunemela phipha nu muanya.
Ngolo jianguhuile gifua meya amigina mu sungi ya muanya wabala. (Sela)
5 Gu gisugishilo ngaguwambelele gubola guami;
ngasuegelego gubola guami.
Ngazuelele egi: “Mbanguwambela Yehowa gubola guami.
Aye wangutotesele gubola guami. (Sela)
6 Gishina giene, muthu wagasue udi ya gujinginyina mbawugukombelela
mu tangua diajiya guguheta muene.
Ngenyi ikhale meya azala, ajiyilego guheta fundo didi muene.
7 Udi fundo diami dia gulengela;
mbawungubamba mu tangua dia lamba.
Mbawunguhaga mukatshi dia athu adi nu gusuanguluga luholo wana huluisa athu. (Sela)
8 “Mbanguguhana ndunge, mbangugutuameza mu njila udi naye guwenda.
Mbanguguhana malongo, mbangugutala muabonga.
9 Ukhadigo waheya gifua gabalu nga phunda,
inyi idi naye gujitshigiwa shinga gu kano ha gutuamezewa
gutuama egi isuene hehi nu aye.
10 Muthu wabola wana mona malamba avula;
uvi Yehowa wana monesa guzumba guenji gua giamatshidia gudi muthu wana gumushila mutshima.
11 Enue athu abonga, suangulugenu mukunda nu ndaga jidi mukalagala Yehowa;
enue athu mudi nu mitshima yabonga, mbenu miyelele ya gusuanguluga.