Ngimbo
33 Enue athu abonga, mbenu miyelele ya gusuanguluga mukunda nu Yehowa.
Idi yatagana egi athu abonga amutumbuise.
2 Hanenu Yehowa mersi nu gitare;*
mutumbuisenu nu jingimbo* nu gima gia gushigila miziki gidi nu shinga kumi.
3 Muyimbilenu lungimbo luhe-luhe;
shigenu muabonga ima ya gushigila miziki idi nu shinga, mbenu nji milolo ya gusuanguluga.
4 Handaga mbimbi ya Yehowa idi ya giamatshidia,
ndaga jiagasue jiana tshita muene jidi jiatagana ha gushila mutshima.
5 Muene wana zumba ndaga jiabonga nu wana sophesa nu giamatshidia.
Mavu adi azala pha nu guzumba gua giamatshidia gua Yehowa.
6 Dilu diafugiwe mu njila ya mbimbi ya Yehowa,
ima yagasue idi mu dilu yafugiwe nu muhehe* wa mu kano dienji.
7 Muene wamagenesa meya a kianga gifua gibayi;
wamba meya adi mubulumuga muphushi mu jinzo jia gubambela ima.
8 Mavu agasue avile Yehowa woma.
Athu agasue adi ha mavu amuvile woma.
9 Handaga gula muene wazuela ndaga, yana tagenesewa;
gula wahaga mukhuala, wana katudiwa ndo.
11 Uvi malongo* a Yehowa mbaakhala mayilago;
matangi adi mu mutshima wenji mbaakhala indongo yagasue.
12 Gusuanguluga gudi nu gifutshi ginyi giana kombelela Yehowa,
athu atombele muene ha gukhala khapho dienji.
13 Yehowa Nzambi udi mu dilu, wana tala ha mavu;
wana mona ana a athu agasue.
14 Wana kengelela athu adi ha mavu,
ha fundo diana khala muene mu dilu.
15 Muene wana londa mitshima ya athu agasue;
wana tala muabonga midimo yawo yagasue.
16 Gushigo nga nu fumu mumoshi wajiya guhuluga handaga udi nu masuta avula;
muenya ngolo gajiyilego guhuluga handaga udi nu ngolo jiavula.
17 Muthu udi gudifelela egi gabalu gajiya gumuhuluisa* gu ita, udi gudihuiga.
Ngolo jienji jiavula jiajiyilego gumukuatesa ha gulenga.
18 Talenu! Meso a Yehowa adi mutala athu agasue ana gumuvila woma,
athu ana sha mutshima mu guzumba guenji gua giamatshidia,
19 ha guahuluisa mu gufua
nu ha guakuatesa mu sungi ya nzala hagula afuigo.
20 Tudi munengenena Yehowa.
Muene udi mukuateshi wetu, udi nji tshibu yetu.
21 Tudi nu gusuanguluga mu mitshima mukunda nu muene,
handaga tuana sha mutshima mu jina dienji dia gijila.
22 Oo Yehowa, guzumba guaye gua giamatshidia gukhale nu esue
hatudi gugunengenena.