Ngimbo
Gudi mutuameji wa miziki. Lungimbo lua Davidi.
40 Ngashile mutshima wagasue gudi Yehowa,*
washiwugile ha gungutegelela, wavile luholo ngakhalele mudila ha gutoga ukuateshi.
2 Muene wanguzolele mu wina didi nu meya adi musha matululu,
wanguzolele mu ithotho.
Wahagele malu ami holu dia seso;
wahagele malu ami ha fundo dia ubambi.
3 Gungima wambile lungimbo luhe-luhe mu kano diami,
lungimbo lua gutumbuisa Nzambi wetu,
athu avula mbaamona ndaga yene, mbaavua woma,
mbaashila Yehowa mutshima.
4 Gusuanguluga gudi nu muthu udi mushila Yehowa mutshima,
muthu munu wana tuna gukhala hamoshi nu mbundudi nu enya mambo.
5 Oo Yehowa Nzambi wami,
aye wafugile ima yavula diago,
midimo yaye idi yabonga sha; tangua diagasue wana tangiza ndaga jiabonga mukunda nu esue.
Gushigo nga nu muthu wajiya gudifuana nu aye;
gula ngakamba guwambela athu ndaga jiene jiagasue,
ngajiyilego gujimanesela handaga jidi jiavula ha gujitanga!
6 Aye watshiginyilego* milambu nu misomo,
uvi wangukangudile matshui ha guvua.
Watogelego milambu ya guwotshia nga milambu mukunda nu gubola.
7 Ngazuelele egi: “Tala! Ngaza,
gifua luholo idi ya gusonega mu rulo* mukunda nu ame.
8 Oo Nzambi wami, ngana suanguluga* gutshita gutshigina guaye,
mukhuala waye wana khala mu mutshima wami.
9 Mbangulongesa lukuma luabonga lua ndaga jiabonga mukatshi dia athu avula.
Tala! Ame ngushigo mukanga kano diami,
Oo Yehowa, aye mujiya muabonga.
10 Ngushigo musuega ndaga jiaye jiabonga mu mutshima wami.
Ngudi mulongesa athu egi udi Nzambi wa gushila mutshima nu udi muhuluishi.
Ngushigo musuega guzumba guaye gua giamatshidia nu giamatshidia giaye mukatshi dia athu avula.
11 Oo Yehowa, utunyigo gunguvila khenda.
Guzumba guaye gua giamatshidia nu giamatshidia giaye, gungubambe tangua diagasue.
12 Malamba avula angubuila,* gushigo nu luholo lua guatanga.
Ndaga jiavula jiabola ngakalagala jiangulebesa muila, ngushigo mumona luko njila ya gulandula;
ndaga jiene jidi jiavula gubalega sanga dia gu muto wami,
muila wanguleba diago.
13 Oo Yehowa ngabuba, nguhuluise.
Oo Yehowa, iza muphushi ungukuatese.
14 Athu agasue adi mukamba gungushiya,*
ahanewe musonyi, aseguluishiwe.
Athu adi musuanguluga nu lamba diami
avutuge nu musonyi.
15 Athu anyi adi gungulela egi: “Aha! Aha!”
Avue woma mukunda nu musonyi mbawaakuata.
16 Uvi athu ana gugukamba
adihale nu asuanguluge mukunda nu aye.
Athu anyi ana suanguluga mu luholo wana huluisa, azuele tangua diagasue egi:
“Yehowa atumbuishiwe.”
17 Uvi ame ngushigo nu muthu wagungukuatesa, ngudi phutu;
Yehowa angutale.
Aye udi mukuateshi wami nu muhuluishi wami;
Nzambi wami, ushiphigo.