Ngimbo
Gudi mutuameji wa miziki. Lungimbo lua Davidi.
41 Gusuanguluga gudi nu muthu udi mukuatesa phutu;
Yehowa mbawumuhuluisa mu lusugu lua lamba.
2 Yehowa mbawumubamba, mbawumubemba nu monyo.
Athu mbaazuela egi muene udi muthu wa gusuanguluga ha mavu;
Nzambi mbagashigo gumuhana ha mago a mbalagaji jienji.
3 Yehowa mbawumukuatesa ha gitanda gienji gia ukhashi;
tangua mbadikhala muene mukata, Nzambi mbawusombegesa diago gitanda gienji.
4 Ngazuedi egi: “Oo Yehowa, nguvile khenda.
Ngusage, handaga ngatshitshi gubola gutuama diaye.”
5 Uvi mbalagaji jiami jidi muzuela ndaga jiabola mukunda nu ame egi:
“Muene mbawufua tangua tshi hagula jina dienji ditote?”
6 Gula muthu mumoshi mukatshi diawo waza gungutala, wana zuela ndaga jia mambo.
Wana guza ha gujiya ndaga jishigo muyila muabonga
hagula aye nu gujimuanga gudi athu ako.
7 Athu anyi anago gunguzumba adi gudifetesa;
aya giphungi ha gungutshita gubola, adi muzuela egi:
8 “Ndaga ikuatesa woma yamubuila;
henyaha habua muene, guahui, mbagashigo muzuga luko.”
9 Nu muene muthu ngana khala n’enji muabonga, yago ngana shila mutshima,
munu ngakhalele mudia n’enji dipha, wangubalumugila.*
10 Uvi aye, Oo Yehowa, nguvile khenda, nguzugise,
hagula nguahane ndola mukunda nu ndaga jiabola angukalegele.
11 Mbangujiya egi wana suanguluga nu ame gula
mbalagaji jiami jiangubingilego.
12 Uvi mbawungukuatesa handaga ngudi ya gujinginyina gudi aye;
mbawungubamba gutuama diaye mayilago.